بنجائی حکومت آن جتائی نا فیصلہ یا پڑو کتنن، جام کمال خان

کوئٹہ (خ ن) وزیراعلیٰ بلوچستان جام کمال خان پارینے کہ بلوچستان عوامی پارٹی نا کنڈآن بنجائی حکومت آن جتائی نہ پڑو اس کرینن و نہ فیصلہ اس کرینن، بنجائی پی ایس ڈی پی نا بابت اٹ نن تینا اعتراض آتے بنجائی حکومت نا مون آ تخانن، وزیراعظم عمران خان ءِ سما ءِ کہ نن پی ایس ڈی پی نا معاملہ غا ہیت ہم کینہ و برانز ہم کینہ، ننا برانز بیرہ پی ایس ڈی پی کن ءِ تو ہیت ہم بیرہ پی ایس ڈی پی آ کینہ، دُن آخا برانز نا پد اٹ وزارت یا پین فائدہ اس السا چُپ مرین، بنجائی وزیر اسد عمر ننے تسلی تسنے کہ بلوچستان نا ڈٹ آتا اینخو ستمبر اٹ ٹینڈر کننگک و بنجائی و صوبائی کمامدار آک ڈٹ آتا بابت اٹ ہر تُو آ جاچ ہلوک ءُ دیوان اس اڈ ایترہ، این ایف سی ٹی بلوچستان نا بشخ ءِ آئینی رکھ دوئی ءِ ہندا سوب ءِ کہ ننے اوور ڈرافٹ نا کنڈآ ہننگ نا گرج اف، بجٹ نا خسارہ ءِ پورو کننگ کن ڈٹ بندی تیار کننگانے، دا خیال آتا درشانی ءِ او بلوچستان ڈیلی نیوز پیپر ایڈیٹر کونسل نا اسہ ڈل اسے تون ہیت و گپ کرسا کرے، وزیراعلیٰ پارینے کہ صوبہ ہر وخت روایتی سیاست اٹ اختہ مسنے وخت اس کہ اصلاحات یا بنداو نا کنڈآ اسل سجفنگتنے، گورننس اٹ بیدس اصلاحات اتنگ آن مونی اننگ و بنجاہ نا اُست خواہی ءِ دوئی کننگ ممکن اف، او پارینے کہ مالو فنڈ آک زیان مسر، غلط ڈٹ بندی نا سوب آن شونداری کاریم تیٹی اڑاند بس، 1997ءنا ڈٹ آک ہم اینو اسکان ناپورو ءُ، ساڑی صوبائی حکومت 1997 آن 2017 اسکان نا ناپورو آ اسکیم تا پوروی کن 18ارب روپئی جتا کرینے۔