یو این، لیبیا ٹی 2016ءآن پد انا خلاف ورزی تا جاست وپاست نا پرمان

اقوام متحدہ (اے پی پی) اقوام متحدہ نا رداٹ انسانی حق کونسل اسہ قرارداد اسے نا منظوری ءِ تسنے ہرانا کمک اٹ خانہ جنگی نا گواچی لیبیا ٹی 2016ءآن انسانی حق انا کانود نا خلاف ورزی و انسانیت مخالف ڈوہ تا راستکی تے مچ کننگ کن اسہ مشن اسے نا ٹہیفنگ نا پرمان کرینے۔ جنیوا ٹی انسانی حق کونسل دوشنبے نادے آ داقرارداد نا وونٹ آتیان بیدس امنائی اٹ منظوری ءِ تسنے۔ داٹی لیبیا ٹی بیدادی نا غٹ کارروائی تا ترند انگالوز آتے ٹی مذمت ءِ کننگانے و داٹی انسانی حق کمشنر میشیل بیشلیٹ آن خواست کننگانے کہ او دمدستی وڑاٹ راستکی تے یکجا کروک آ اسہ مشن اس ٹہیفسا جنگ زدہ ملک آ گدریفے۔ جنیوا ٹی اقوام متحدہ ٹی متعین لیبیا نا سفیر تمپم بائیو دااومیت نا درشاننی ءِ کرینے کہ دا قرارداد آن دا پک مریک کہ ملک اٹی بلا استثناانسانی حق انا خلاف ورزی تیان پین ہچ ءُ رورعایت اس کننگپک۔ دا قرارداد نا مسودہ مارچ اٹی افریقی ملک آتا اسہ پڑک اس 47 باسک آتیا تالان انسانی حق کونسل اٹ پیش کریسس ولے کورونا وائرس نا سوب آن کونسل نا سالانہ دیوان نا اڈتننگ اٹ مسہ تُو اسکان تاخیر مسنے ہرانا سوب آن داڑا رائے شماری ہم موخر مرسا کرینے۔ سوئٹزر لینڈ نا کنڈآن کورونا وائرس نا توننگ کن خلوک آ پابندی تیٹی نرمی آن پد تدوک آ ہفتہ کونسل نا چِل ءُ سہ می دیوان بناکریسس و اونا ایسری سیشن اٹ لیبیا نا بارواٹ قرارداد امنائی اٹ منظور کننگانے۔ داقرارداد اٹی ”تشدد“ جن و صنف انا بنداو آ تشدد و زندان و حراستی ہند آتے ٹی بندی و دزگیرمروک بندغ آتا سخت انگا حالیت آتا بابت رپورٹ آتیا گڑتی نا درشانی ءِ کننگانے۔