قلات پولیس نا قربانی تا سوب آن امن بحال مسنے‘ آغا محمدیوسف

قلات (تلار حوالکار) ڈی آئی جی قلات و خضدار رینج آغا محمدیوسف پارینے کہ قلات پولیس نا قربانی تا سوب آن امن بحال مسنے‘ قلت پولیس ناکارکڑد ایلو علاقہ غاتیان بھاز جوان ءِ‘ قلات پولیس کل آن زیات اشہاری دوبہ دار تے دزگیر کرسا جوان کارکڑد نشان تسنے ہراڑکن ای ودے مبارکبادی ایتوہ‘ شاریک پولیس نا جوان کارکڑد آ پولیس نا است بڈی ءِ کیر۔ دا خیال آتادرشانی ءِ او پولیس تھانہ صدر قلات اٹ پوسکن تعمیر مروک ماڑی نا بناءِ کننگ نا وخت آ میڈیا نا نمائندہ غاتتون ہیت وگپ کرسا کرے۔ دا وخت آ ایس پی عبدالحق عمرانی‘ ڈی ایس پی غلام حسین باجوئی‘ ایس پی لیگل منظور احمد مینگل‘ ایس ایچ او حبیب نیچاری‘ ایڈیشنل ایس ایچ او نذیر احمد عمرانی و پولیس ناایلو افسر وکارندہ غاک ہم ساڑی ئسر۔ ڈی آئی جی پولیس قلات رینج محمد یوسف قلات پولیس تھانہ نا پوسکن تعمیر مروک ماڑی نا جاچ ءِ ہلک و اونا چندی بشخ آتے ہُرا‘ داکان گڈ او پولیس لائن نا دورہ ہم کرے و شہید آتا یادگار آ پھل شاغا۔او مستی پارے کہ قلات اسہ بھاز زیباءُ شار اسے و دا جاگہ نا بندغ آک پرامن و پولیس تون کمک کیرہ۔ او پارے کہ اینو بلوچستان اٹ ہرا امن ءِ دانا کریڈٹ پولیس لیویز وایلو سکیورٹی کارندہ غاتیکن کاہک۔ اوپارے کہ امن وایمنی کن قلات پولیس نا شہید آتے مدام یات تخنگک۔