9 مئی آ ریڈ لائن کراس کننگا، کس ءِ بشخپنہ، شہباز شریف

اسلام آباد : وزیر اعظم شہباز شریف پیدوار کرینے کہ تحریک انصاف نا شرپسند آک 9 مئی آ ریڈ لائن ءِ کراس کریر‘ ہندا سوب آن اوفتیکن ہچ ءُ معافی اس اف‘ چاہے اخس کہ سفارش کننے ڈوہدار تے الیپنہ و بے گناہ تے سزاتننگپک۔ شہید آک ننا ہیروک ءُ اوفتا تکریم ءِ لتاڑ کننگ کن الیپنہ‘ شہید آتا خاہوت آتا ہر حال اٹ خیال ءِ تخنگک‘ اوفتے وزیراعظم یوتھ اسکیم نا رد اٹ آسان شڑت آ وام ہم تننگک و ایلو آسراتی تے ہم فراوان کننگک۔ دا خیال آتا درشانی ءِ او چار شنبے نا دے جناح کنونشن سینٹر اٹ تحفظ شہداء کنونشن آن تران کراس کرے۔ وزیراعظم پارے کہ اینو دا کنونشن آن تران کننگ آ کنے بھاز خوشی وگمر مننگ ءِ انتئے کہ نن ہمو شہید آتے خراج عقیدت پیش کننگ کن اسیجا مسونن‘ دا ہمو شہید آک ہرافک پاکستان نا مِش و دا وطن نا رکھ اکن تینا جان تے ندر کریر‘ دتر اٹ دیر تسر و نن شہید آتے ہچ گہس گیرام کپنہ‘ دا ننا میرات و قومی ہیروک ءُ‘ پاک فوج‘ کانود نافذ کروک ادارہ‘ پولیس، سیکورٹی ایجنسی تا افسر و ورناک دا ملک اکن قربانی تسنو،86 ہزار آن زیات قربانی تا سوب آن ملک اٹ امن و سوگوی بس ولے انت کہ 9 مئی آ مس اوفتے گیرام کننگ مفک‘ دادے مدام اسہ تہار ءُ دے اسے آنبار یات تخنگک۔ تحریک انصاف نا شرپسند و اوفتا سروک عمران خان ہرا وڑ مخلوق ءِ کاریم اٹ ایس دا کل گڑاک ڈٹ بندی نا وڑ اٹ کننگار‘ ہرانا ماسٹر مائنڈ عمران خان ئس و تینے کشنگ کپک‘ اسہ سیاسی جماعت اس ہم دا وڑ کننگ کپک کہ دزگیری آن پد ریاست آ جلہو کے۔ ہراتم عمران خان حکومت اٹ بس تو او مچ آ اپوزیشن ءِ جیل کرے نن ہچ پرغ بٹ کتون‘ دزگیری تسن‘ جیل آتیا ہنا‘ کس ءِ نسخان تتون‘ ریاستی ورکھی ادارہ غاتا برخلاف ہیت ہم کتون۔ ذوالفقار علی بھٹو ءِ پاہو تننگا‘ گودی بے نظیر بھٹو شہید مس‘ نواز شریف ءِ جلاوطن کننگا‘ ولدا دوارہ اونا حکومت ءِ چٹفنگا ولے اسہ سیاسی جماعت اس ہم تینا ملک یا اونا بیرک ءِ نسخان رسیفتو ولے عمران خان ہرادے آ دزگیر مس‘ پرغ بٹ‘ خاخر تننگ‘ رکھی و فوجی ملکیت آتیا اونا شرپسند آک جلہو کریر ہرافتے کانود نا کٹہرے ٹی سلفنگ انگ ءِ‘ اوفتیکن ہچ ءُ معافی اس اف‘ اوفتا ڈوہ ریاست آ جلہو‘ ریاست نزور اف‘ شہید آتا فوٹو و یاتگار تا بے حرمتی کننگا۔ وزیراعظم پیدوار کرے کہ اسہ گناہ گار اس ہم بچپک و نن بے گناہ تے دزگیر کپنہ‘ گناہ گار تا برخلاف سخت کانود نا رد اٹ کارروائی کینہ تاکہ آخبت اٹ کس ءِ دا وڑ انا جیرت مف۔ او دا وخت آ شہید آتا خاہوت آتے باور کرفے کہ اوفتا کل ویل آک ایسر مریرہ‘ اوفتے وزیراعظم اسکیم نا رد اٹ وام تننگک و پین آسراتی ہم تننگک و زوت ای اوفتتون اوڑدہی ہم کیوہ۔ داوخت آ بنجائی امین الحق و شیری رحمان اسک ہم تران کریر و وزیراعظم آن خواست کریر کہ 9 مئی نا زموار تے اسُل بشخنپگ۔ ریاست آ جلہو کروک آک محب وطن مننگ کپسہ‘ ہرافک دا وڑ کرینو اوفتے کانود نا کٹہرے ٹی سلفنگ بھاز المی ءِ۔ دا وخت آ شہید آتے خراج عقیدت پیش کننگ کن دستاویزی فلم ہم نشان تننگا۔

(آن لائن)