جیل آتے راجی چاگڑد اٹ بدل کننگ المی ءِ، ڈاکٹر ربابہ بلیدی

کوئٹہ : سپریم کورٹ آف پاکستان نا پارت آتا روشنائی ٹی بلوچستان نا جیل آتیٹی اصلاح آتیکن پارلیمانی سیکرٹری کانود و پارلیمانی امور سائنس اینڈ انفارمیشن ٹیکنالوجی ڈاکٹر ربابہ خان بلیدی نا کماشی ٹی خاص ءُ سلاہ اس دیوان اس تدوک آ دے مشاورتی وزارت کانود اٹ اڈ ہلک۔ دیوان اٹ آئی جی جیل خانہ جات بلوچستان ملک شجاع الدین کاسی، جیل سپرٹنڈنٹ سنٹرل جیل کوئٹہ محمد اسحاق زہری، ڈپٹی سپریٹنڈنٹ نوشین اسٹاف افسر اسد خان، سئنیر میڈیکل افسر سنٹرل جیل ڈاکٹر منیر احمد مینگل،  کمیشن آن اسٹیٹس آف ویمن بلوچستان نا چیئرپرسن فوزیہ شاہین، ڈائریکٹر پارلیمانی افیئرز سعید اقبال خان اسک بشخ ہلک۔ دیوان اٹ جیل کانود و مینوئل نا جوان ءُ جاچ اس ہلنگا۔ او جوانی کن گام گیج آتا سلاہ تننگا۔ دیوان اٹ سنٹرل جیل کوئٹہ نا درکار آ ڈغار تیا گرج آتا رداٹ مسہ منزلہ بلڈنگ نا جوڑی، میڈیسن نا سالی بجٹ اٹ ودکی، پریزنر ویلفئر فنڈ آتا جوڑی، صوبہ نا کل جیل آتیٹی نیاڑی تیکن جتا ویٹنگ روم تا جوڑی، نیاڑی بندی تا پیشی و نقل و حمل کن خاص ءُ وین، جیل آتیٹی میڈیکل افسر تا خالی پوسٹ آتیا ڈاکٹر آتا تعیناتی، جیل اسٹاف کن فکس ڈیلی الاؤنس آتا جاری کننگ تون اوار بنداوی آسراتی تا فراوانی کن سفارش جوڑ رکینے۔

(خ ن)