سو، سوزی و ایلو گڑاک اُلس نا وس آن پیش تمار‘نیشنل پارٹی

دالبندین: نیشنل پارٹی نا پریس ریلیز اٹ پارینے کہ دالبندین اٹ ڈی سی چاغی نا کنڈآن سرکاری نرخنامہ ءِ دکاندارک کچرہ دان اٹ شاغسا تینا اُست انا ہیت آتے برجا تخانو۔ اُلس رمضان شریف نا بابرکت تو اٹ سرکاری ریلیف وسرکاری نرخنامہ نا رداٹ گڑا ہلنگ کننگ اٹی افس۔ بیان اٹ پارینے کہ ڈپٹی کمشنرچاغی نا کنڈآن اُلس ءِ ریلیف تننگ کن سرکاری نرخنامہ دکاندار آتے ترسا اوفتے پابند کننگاسس کہ او سرکاری نرخنامہ نا پابندی ءِ کیر ہراکہ اسہ جوان ءُ کاریم اس ئس۔ ولے اُست ہسونی دادے کہ داسہ ہچ ءُ دکاندار اس داڑا عملدرآمد کننگ اٹی افس و دکاندار آتا من مانیک مالو آن زیات مسنو۔ اُلس نا وس آن سو، سوزی و ایلو گڑاک پیش تمانو۔

(آن لائن)