بنجائی حکومت نا کنڈ آن منی بجٹ اس اتنگ نا فیصلہ

کراچی: حکومت اخیر منی بجٹ اس اتنگ نا فیصلہ کرینے، تاکہ جہانی مالیاتی فنڈ (آئی ایم ایف) نا ایلو گڑتی تے ہم مُر کننگ مرے، ولے دڑان کبینی ٹی پین ودکی نا گمان ہم ارے۔ بے باور سیاسی حالیت آک زرگزرانی بحالی نا کسر اٹ چیلنج نا سوب مننگ اٹی ءُ۔ ایلو کنڈ آ سودکچ اٹ اسہ درسد ودکی و کبینی نا بھا زبڑز انگا کچ، عالمی اقتصادی کراری، گڑا تا بے پک نہاد و روس یرکرین کٹپروک آ جنگ انا سوب آن بے باور جہانی چاگڑد ہم بھلو چیلنج اس جوڑ ءِ۔ حکومت ءِ دا فیصلہ غان پد پنجاب، خیبرپختونخوا و مچ آ ملک اٹی لس گچین کاری تیان مست بھاز سخت ءُ فیصلہ اس ہلوئی تمنگ ءِ، ہرا کہ وونٹ بٹوک آتے کن خرین ءُ گولی اس ہم مریک۔ بجلی نا نہاد آتیٹی ہچ مف 30 درسد ودکی، گیس انا نہاد اٹ 60، 70 درسد یا اوکان ہم زیات ودکی، پوسکن ءُ بُنگ خلنگ و سودکچ اٹ ودکی بروک آ زرگزرانی زمبہیر نا پیدوار انگا پد مرو۔ چاہندار آتا رد اٹ دا گام گیج آتا اسیجائی زہم آن کبینی ٹی5، 10 درسد پین ودکی مریک، ہرا مہالو آن 25 درسد نا داپار ایپار آن لُڈنگ اٹی ءِ۔ پی ٹی آئی و ساڑی حکومت ہڑتوم آتتون خڑک زرگزران چاہندار اسے نا رد اٹ دانا سیاسی زہم مریک، ودا بھاز خرین ہم مریک۔ ولے چاہندار آتا پاننگ ءِ کہ دا گام گیج آتتون اوار اوار دا وخت آ ساڑی مسہ جتا جتا فارن ایکسچینج مارکیٹ آتا برخلاف فیصلہ ئی کریک ڈاؤن نظام اٹی بھلو بگوڑ اسے مُر کننگ کن کمک رسینگک۔ وخت اس کہ درملکی زرمبادلہ گڑیفوک کچ اسکان مہالو آن کمتی نا گواچی ءِ۔ او پن درشان کپننگ نا شڑت آ پارے کہ دا ہندن ءُ نازرک ءُ حالیت اسے ہراتم زرگزران سلوک مرے، دا وخت آ ٹرپل فاریکس مارکیٹ نا سوب آن برآمد و زرراہی تس اٹ کمتی بننگ اٹی ءِ، و سپلائی سائیڈ نا ویل آتا سوب آن کبینی ودنگ اٹی ءِ۔ ولے دا گام گیج آتا مفننگ آن کبینی منہ ہفتہ اسکان پنجا درسد اسکان ہم ہننگ کیک، دن کہ سری لنکا و گھانا ٹی مسوسس۔ اوڑے داسہ کبینی نا کچ 70 درسد و 50 درسد آن گدرینگ انگ اٹی ءِ۔ دا حالیت نا بحالی نا کسر مرغن و ڈکھیائی مریک، دا حکمران جماعت و اپوزیشن ہڑتوم آتے کن اسہ سبخ اسے کہ اوفک آئی ایم ایف پروگرام نا بابت پامداری اٹ کسر اس پک کیر، انتئے کہ زرگزرانی فیصلہ غاتا بابت بروک آ حکومت ءِ داکان ہم زیات سخت ءُ حالیت اسے تون مون تروئی تمک۔ دا رد اٹ چاہندار آک پارہ کہ آئی ایم ایف پروگرام نا سیبو کل آن اہم و اسٹ انگا گام ئس، ہرادے مارکیٹ و جہانی برادری ءِ اسہ کنڈ اس پک کننگ کن ہفتہ و تُو تا کچ اٹ مست ہرفوئی ئس، ولے پد تمنگ آن پد ہم دا فیصلہ غاتیا عمل آن پد بے باور حالیت ءِ وختی وڑ اٹ کم کننگ اٹ کمک رسینگک، و فریشان انگا واپاری تپہ ءِ دا اشارہ ملک کہ مخلوط حکومت تینا سیاسی نسخان آن پد ہم سنجیدہ گام گیج کننگ کن تیار ارے۔ آئی ایم ایف تون معاہدے نا پک مننگ آن پد کم و وَد اسہ ارب 20 کروڑ ڈالر دمدستی جاری مریک۔ وداڑان سعودی عرب، متحدہ عرب امارات و چین کون آ سنگت آتتون اوار وام تروک آتیان مالی کمک دوئی کننگ نا بابت کمک ہم رسینگک۔

(آن لائن)