وزیر اعلیٰ نا پارت آ السی غاو تا ایسری کن گام گیج مننگ ءِ، ڈی سی خضدار

کوئٹہ:ڈپٹی کمشنر خضدار میجر ریٹائرڈ محمد الیاس کبزئی پارینے کہ وزیر اعلیٰ بلوچستان چیف سیکریٹری بلوچستان و کمشنر قلات ڈویژن نا کماشی ٹی اُلس نا چیدہ چیدہ و بنداوی ویل آتا ایسری کن اسہ وڑن اسے نا رداٹ ودنگ اٹی ءِ۔ اُلس نا مفاد آک ننے بے کچ عزیز ءُ۔ اُلس نا بیدس فرق آن خدمت ءِ تینا فرض تکنہ۔ اُلس نا ویل آتا ایسری کن درکار آ وسیلہ غاتیٹی رہنگسا ہر وڑ نا گام ہرفنگ کن تیار اُن۔ و آخبت اٹ گام گیج کرسا کینہ و آخبت اٹ ہم داوڑ نا کاریم تے پورو کرسا کینہ۔ وخت اس کہ آخبت اٹ ہم گام گیج کرسا کینہ حوال نا رداٹ وزیر اعلیٰ بلوچستان نا پارت آ خضدار اٹ اُلسی ویل آتا بابت کھلی کچھری اس اڈ تننگا۔ کھلی کچھری ٹی خضدار سٹی و کل تحصیل آتا شاری تا بھلو کچ اس بشخ ہلک۔ او وخت آ ڈپٹی کمشنر خضدار میجر ریٹائرڈ محمدالیاس کبزئی و کل محکمہ جات غا نمائندہ آفیسرک اُلس نا ویل آتے بننگ کن اوار ئسر۔ شاری تا کنڈ آن تعلیم جانجوڑی، کشت وکشار، بجلی، کننگ کن ساف ءُ دیر، بی ایم ای، پی پی ایچ آئی، منشیات، ٹرانسپورٹرز، نادرا، پرائس کنٹرول کمیٹی، خضدار ٹاؤن، کنجھڑ ماڑی و سی پیک روڈ، این ایچ اے، معذور تتون اوارایلو ویل آتیا سائل آک تینا بنداو آ ویل آتے ضلعی منتظم آتا مون آ تخار۔ اُلسی ویل و سختی تیان اوفتے معلومدار کریر و جھیڑہ غاتے کوتاہی و کمتی تا بارواٹ ویل ڈپٹی کمشنر خضدار و ایلو افسر تے معلومدار کریر۔ سیاسی و راجی علاقائی نمائندہ و راہشونک صابر حسین قلندرانی عبدالوہاب غلامانی عبدالحمید ادو مردوئی آغا ذوالفقار شاہ مولانا جلیل احمد جلالی سیکریٹری عنایت اللہ زہری میر ندیم خدرانی محمد یعقوب نتھوانی عبدالقدیر قلندرانی ڈاکٹر حضور بخش زہری عبدالرزاق شاہوانی اسک اُلسی ویل آتے بیان کریر۔ او وخت آ ڈپٹی کمشنر خضدار میجر ریٹائرڈ محمد الیاس کبزئی و ایلوفک سائل آتے ورندی تسر۔ گڑاس ویل آتے وخت آ ایسر کننگ نا پارت جاری کریر۔

(آن لائن)