غلام نبی راہی نا کتاب آتے اونا پن آ کننگے

غلام نبی راہی ریڈیو پاکستان کوئٹہ ٹی اسہ سینئر ءُ پروڈیوسر اسے نا حیثیت اَٹ وخت تیر کرے‘ دا ریڈیو ءِ راہی داخس زیبائی تس‘ ہراڑا براہوئی زبان و ادب ءِ ہم گمر ءِ۔ ”خلقی کچاری“ و ”شاہ بیگ وتاخ“ راہی صاحب نا یادگار آ پروگرام آتیان ءُ۔ دا پروگرام آتا وڑ اٹ بلوچ مخلوق نا رسم و رواج و تول/ و بش نا وڑ و ڈول نا درشانی مریک۔ ”رابی“ و ”لاڈی“ کون ءُ افسانہ نوشتہ کروک آءِ دیر اُست آن دننگ کیک۔ ”پڈ گیر“ ”زراب“ و ”خاخر“ کون آ ٹی وی ڈرامہ غاتے ہُروک آک اودے ہراکان است آن درور۔ راہی صاحب شاری زند و اونا ویل آتے بھاز کم تینا نوشت اَٹ ایسکہ‘ اودے خلقی زند و اونا خلقت تون مہر ئس۔ او زند تو شار اَٹ تیر کریکہ ولے او خلق اَٹ رہینگوک آ کودک آ بندغ نا غٹ آ جوانی تیان پُر ئس۔ اودے وڑوک آ پروگرام بلکن کل ءِ وڑوک آ پروگرام ”شاہ بیگ وتاخ“ اٹ راہی صاحب خلقی راج اٹ زند تیر کروک آ مخلوق نا‘ و اوفتا نیام اٹ جوڑ مروک آ و پنوک آ رشتہ غاتے و اوفتا ویل آتے تینا نوشت اَٹ ایسکہ۔ ”تلار“ بھاز وخت مہالو راہی صاحب نا ڈرامہ غاتیان بیدس اونا افسانہ‘ انشائیہ و کالم آتے مچ کننگ و شینک کننگ نا گرج آ زور شاغاسس، داسہ نن خننہ کہ راہی صاحب نا بھاز آ ڈرامہ غاک تو مچ کرسا شینک کننگانو، ولے دا کتاب آتا ٹائٹل آتیا اونا پن اودیم ءِ۔ ہرا یخین اٹ اسہ بھاز بھلو ادبی خیانت اسے۔ ادارہ تلار زور شاغسا خواست کیک کہ نئے بیرہ دا کہ دا کتاب آتا ٹائٹل آ راہی صاحب نا پن و فوٹو شینک کننگے، بلکن دا ہم کہ دا مواد آتا رائلٹی ءِ ہم بایدے راہی صاحب نا خاہوت ءِ تننگے۔

ہفتئی تلار

تاک:04

28-22 جنوری 2022ء

پنہ: 01