زیبا غا مکران۔۔۔۔۔۔سیل و چکر۔۔۔۔۔۔ (5)۔

غلام یاسین تون ملاقات:۔

غلام یاسین تربت نا بھلا شار اٹی رہینگک۔ نن جوان اسٹ ایلوءِ بخیر کرین، او پرویز بلوچ تون اونا گاڈی ٹی توس و ننے پدی ہِننگ کن پارے۔ و جَٹ دم اسے آن پد بازار آن مرسا نن تربت نا اسہ خلق اسیٹی سر مسن۔ و اَسہ متُکن ءُ درگہ اسے نا مون آ تینا گاڈی تے سلفین، دا بھلا درگہ مَلنگا و نن تینا گاڈی تے حویلی ٹی درین سلفین۔ نیاڑی تا کسر شونی کن غلام یاسین نا مارک سلوک ئسر، ہرا اوفتے اُراٹی مون تسر۔ ہراڑے اوفتا نیاڑیک انتظاری ئسُر۔ و نن ہم اُراٹی جوڑ وتاخ اٹی ہِنان۔ اول اٹ ننے دِیر تسر اوڑان پد حال حوال مس۔ ہراٹی مہمان و مہماندار تینا مچ آ حوال ءِ ایترہ، اوڑان پد ”خوب گزرے گی جب مل بیٹھیں گے دیوانے دو“ نا وڑ اٹ ننا مجلس لگا و جوان لگا۔ انتئے کہ نن اِرٹ آخا بلکن مسہ دیوانہ ئسن۔ لس وڑ اٹ مکران نا حالیت، تربت شار و داڑے ”جماعت“ و ”الخدمت“ نا کاریم تیا ہیت مس، و ای تینا دا خیال انا درشانی ءِ کریٹ کہ ”تربت شار اکن اَنت اس کننگے کہ ہراڑان جہی آبادی ءِ فائدہ مرے۔“ ہیت و گپ مرغن مس و چندی سرحال آتیا ہیت و گپ مرسا کرے، و اخیر اٹی دا ہیت آ امنا کننگا کہ جان سلامتی نا بشخ ہمو بشخ ءِ ہرا ٹی دا جاگہ نا بندغ آتیکن آسراتی ودی کننگ مریک۔ و نن کل دا پارین کہ ہندا رد اٹ سہب اتون مچ آ تربت شار انا جاچ ءِ ہلین و اَنت اس کہ مننگ کریکہ دا جاگہ نا بندغ آتیکن کرون۔

ہیت و گپ مننگ اٹی ئس کہ اِرغ تیار مس و کندوری شاغنگا، نن ہم تینا ہیت و گپ ءِ ایسر کرین و اِرغ کننگ اٹی لگان۔ ارغ آن جٹ و دم اس تولنگ آن پد پرویز بلوچ تینا اُرا ہرا کہ تربت شار انا خڑک ”گوگدان“ اٹی ءِ ہِننگ کن موکل خواہس و نن سہب اتون 9بجہ غا ولدا یاسین بلوچ نا اُراٹی مِلنگ نا پروگرام ءِ کرین۔

پرویز بلوچ نا ہِننگ آن پد عبدالکریم و عبدالرحمن پنی آ غلام یاسین نا اِرا مار وتاخ اٹی نن کن بسترہ غاتے شاغار۔ دے انا دَم درینگ نا سوب آن دا نن زو خاچان سہب انا نماز ءِ نن اُراٹی خوانان اوڑان پد ای تینا بسترہ غا ہناٹ ولے دن کہ نمے سما ءِ کہ خلق آتیٹی مخلوق نا سہب انا نماز آن پد خاچنگ نا رواج اف۔ غلام یاسین ہم ہمو بندغ آتیان ئس او قرآن مجید ءِ ہرفے و بھلو وخت اس اسکان تلاوت کرسا کرے اوکان پد تینا موبائل نا کلہو آتا ورندی ءِ تننگ اٹی اختہ مس۔ ہرا وخت اُرانا خواجہ تولوک مرے اوڑتون نی اخس کہ خڑک مریس بندغ ءِ تغ بفک۔ ای ہم تینا بسترہ غان بش مسٹ۔ نن مکران نا یخ انا چھٹی تیٹی بسوسُن ولے داڑے دن کہ باسنی زیات مریک ہندا سوب آن داڑے اسکول آک مَلوک ئسُر۔ بلکہ چُنا تا اسکول آتیٹی اوفتا امتحان آک مننگ اٹی ئسُر۔ یاسین ایلم ننے اسہ جوان ءُ نہاری اس کرفے ہنداخسے اٹی پرویز ایلم ہم سر مس۔ وخت اس کہ یاسین ایلم ننے نہاری کرفنگ آن پد تینا ہڑتوم آ چناتے تینٹ اسکول آ سر کننگ کن پیش تما ہرافک ہموڑے اسہ پرائیویٹ اسکول اسیٹی خواننگ اٹی ئسر۔

(برجا ءِ)

ہفتئی تلار
تاک:41
30 اکتوبر 05- نومبر 2021ء
پنہ: 05