زندان نا ڈائری(سال 1973ء)…………12

ڈاکٹر سلیم کرد

0

Get real time updates directly on you device, subscribe now.

ڈسٹرکٹ جیل نا اسیر آک

سید امان اللہ شادیزئی:۔

سید امان اللہ شادیزئی جماعت اسلامی نا طلبہ تنظیم اسلامی جمعیت طلباء نا اہم ءُ راہشون اس ئس۔ اسٹوڈنٹس ایکشن کمیٹی نا برانزی تحریک آتیٹی مون نا تیان ئس۔ بلوچستان نا طالب علم سرکڑدہ غاتیٹی ”مستقل مزاج“ طالب علم لیڈر نا حیثیت اٹ پنی ئس۔ اودے اولیکو وار ای ایوب خان نا بھلا آمریت نا برخلاف 26 فروری 1969ء نا دے کشنگوک آ برانزی ریلی ٹی خناٹ۔ بلوچ اسٹوڈنٹس آرگنائزیشن نا راہشون و ورکر آتتون اونا گَنڈ یاری اس ئسکہ۔ جوان ءُ ترانکار اس ئس۔ بھاز دلیل اٹ تینا بیانیہ ءِ مون آ ایسکہ۔

26 فروری 1969ء نا دے ون یونٹ، ایوبی آمریت نا فسطائیت، ظلم و بیداد نا برخلاف بلوچستان نا طالب علم آتا کنڈ آن کشنگوک آ ریلی آ ایوبی آمریت نا مخ تف آتا کنڈ آن اسہ سازش اسے نا رد اٹ لٹکاری، ڈوکاری کرسا جلہو کننگا تو اوٹی او ٹھپی مس۔ راستیکو خن آتے کاری ءُ ٹھپ اس مس۔ کیہی دے سول ہسپتال اٹی درمان مس۔ ڈاکٹر آتا کوشست آتیان خن تے زیان مننگ آن بچا۔ ہمو دے تیٹی او علی احمد کرد انا جُٹ یار پاننگاکہ۔ و علی احمد کرد اتون حکومت مخالف برانز آتا رد اٹ دزگیر ہم مسوسس۔

امان اللہ بازئی کوئٹہ نا کیبی علاقہ نوحصار اٹ رہینگاکہ۔ شارع لیاقت و پرنس روڈ نا نیام اٹ کوئٹہ نا پنی آ سینما گھر ”عصمت سینما“ نا مالک آتیان ئس۔ سیاست نا بناءِ پاکستان پیپلز پارٹی آن کرے۔ 1970ء نا گچین کاری تیٹی کوئٹہ نا پیپلزپارٹی نا سربر ءُ جیالہ اس پاننگاکہ۔ نیشنل عوامی پارٹی نا بلوچستان اٹی حکومت نا زور اٹ اینک کننگ آ تینا پارٹی تون اختلاف تخا۔ و ہمو دے تیٹی پیپلزپارٹی نا آمرانہ رویہ و سازشی چم بازی تا سوب آن پارٹی آن جتا مس۔ و طلباء ایکشن کمیٹی ٹی سرجز آتے بنا کرے۔ علی احمد کرد، عطاء اللہ محمد حسنی، امان اللہ شادیزئی نا اواری ٹی دا دے تیٹی طالب علم آتا برانزی ریلی و جلسہ غاک جم و جوش اٹ ئسر۔ ہمو دے تیٹی علی احمد کرد، امان بازئی و امان اللہ شادیزئی نا ٹرائیکا بھاز پنی ئسکہ۔ جمہوری ادارہ غاتا بحالی نا خواہندار ئس، بھاز جوزہ ٹی تران کریکہ۔ 13 مارچ 1973ء نا دے منان چوک طلباء ایکشن کمیٹی نا اڈ ہلوک آ جلسہ، ہرا بلوچ ورنا تتون جھیڑہ نا گواچی مننگ مس، و ایلو طالب علم آک دزگیر کننگار، اوٹی او ہم دزگیر کننگاسس۔

عطاء اللہ بزنجو:۔ 

عطاء اللہ بزنجو بی ایس او نا سرگرم آ راہشون آتیان ئس، آواران نا رہینگوک اس ئس، بلوچستان یونیورسٹی نا ہشار انگا طالب علم آتیٹی حساب مسکہ۔ عطاء اللہ بزنجو نا قبیلہ محمد حسنی ءِ۔ دزگیری نا وخت آ اخبار تیٹی خبر آتیٹ عطاء اللہ بزنجو نا پن اٹ پنی مس۔ دا اخباری خبر تیان پد ہر اسٹ اودے عطاء اللہ بزنجو نا پن اٹ کوک کریکہ۔ لس بندغ آک اودے بزنجو اس تکارہ۔

عطاء اللہ بزنجو ہم 13 مارچ 1973ء نا ہڑدڑ آتیان پد دزگیر کننگاسس۔

یعقوب پیل:۔ 

یعقوب پیل نا تعلقداری بلوچ اسٹوڈنٹس آرگنائزیشن آن ئس، پولی ٹیکنیک انسٹی ٹیوٹ سریاب اٹی خواناکہ۔ ہمو دے تیٹی او پولی ٹیکنیک اسٹوڈنٹس یونین نا صدر ئسکہ۔ فٹ بال نا جوان ءُ گوازی گر اس ئسکہ۔ ہندا سوب آن برازیل نا پیلے نا پن انا سوب آن پیل اٹ پنی ئس۔ کالج نا رہی آ ٹیلفون نا تار تے گڈنگ نا دوبہ ٹی ہاسٹل آ پولیس چھاپہ خلک و اودے دزگیر کریسس۔

محمد قاسم پندرانی:۔

محمد قاسم پندرانی بلوچ اسٹوڈنٹس آرگنائزیشن نا سرگرم آ کارندہ غاتیان ئس۔ کوئٹہ سریاب نا پولی ٹیکنیک انسٹی ٹیوٹ اٹی تعلیم نا سہت آن شپ مننگ ئس۔ محمد قاسم بی ایس او نا مسکوہی راہشون و بلوچستان نیشنل ورکرز فیڈریشن نا صدر صوفی عبدالخالق بلوچ نا خوارزادہ ئس۔ اودے ہم پولی ٹیکنیک انسٹی ٹیوٹ نا ہاسٹل آ چھاپہ نا وخت آ دزگیر کننگاسس۔ اوڑا ہم ٹیلفون نا تار تے دزنگ نا دوبہ خلنگاسس۔

عبدالقیوم ساسولی:۔

عبدلقیوم ساسولی بلوچ اسٹوڈنٹس آرگنائزیشن بلوچستان نا سینئر صوبائی صدر ئس۔ بی ایس او نا متحرک انگا راہشون تیٹی حساب مسکہ۔ قلات نا رہینگوک اس ئسکہ۔ سردار عبدالکریم ساسولی نا فرزند ئس۔ بلوچستان یونیورسٹی ٹی خواناکہ۔ عبدالقیوم ساسولی، حاضر جواب اس تو اَلو، ولے ٹوک ٹکار نا ماہر زندہ دل ءُ ورنا اس ئسکہ۔ او ننے آن مست مچھ بولان آن دزگیر کننگاسس۔ مچھ اٹی بی ایس او مچھ زون انا کنڈ آن اسہ برانزی جلسہ اسے نا پروگرام نا رد اٹ او مچھ آ ہناسس، جلسہ نا بنا ٹی جلسہ گاہ نا تہٹی بلوچ ورنا پنی ءُ تنظیم اسے نا باسک آک دستی بمب اسے نا کمک اٹ دھماکہ اس کرسا ہڑدڑ کرفیر۔ دستی بمب دھماکہ غان پد جلسہ گاہ ٹی ہڑدڑ اس تالان مس۔ پولیس کاروائی کرے، اسٹیج آن عبدالقیوم ساسولی، خورشید جمالدینی، حنیف بلوچ صدر بی ایس او مچھ زون و مچھ بی ایس او نا سرگرم کا رکن خالق داد بگٹی دزگیر کننگار۔ بی ایس او مچھ زون انا راہشون تے سنٹرل جیل مچھ اٹی تخار۔ عبدالقیوم ساسولی و خورشید جمالدینی ءِ کوئٹہ ٹی جوڑ ایلو بھلا مقدمہ غاتا رد اٹ کوئٹہ ڈسٹرکٹ جیل آ ایسوسر۔

خورشید جمالدینی:۔

خورشید جمالدینی نا تعلقداری نوشکے نا کلی جمالدینی آن ئس۔ بلوچ اسٹوڈنٹس آرگنائزیشن نا چُست و تیز راہشون تیان ئس۔ بھاز کاریمی ءُ طالب علم اس ئس۔ بلوچستان یونیورسٹی ٹی خواناکہ۔ عبدالقیوم ساسولی و امان اللہ شادیزئی نا کلاس فیلو ئسکہ۔ برانزی ریلی و جلسہ غاتیٹی کل آن مون مستی خننگاکہ۔ عبدالقیوم ساسولی نا بھاز خڑک انا سنگت و جوڑی دار اس ئسکہ۔ طب اٹ عبدالقیوم ساسولی آنبار زندہ دل، مون ملوک ءُ بندغ اس ئس، ٹوک ٹکار اٹ ہم ماہر ئسکہ۔ جلسہ غاتیٹی مخالف آتے شیف شاغنگ نا چم ءِ چاہسکہ۔ عبدالقیوم و خورشید جمالدین نا جوڑی سیاسی تپہ غاتیٹی بھاز پنی ئسکہ۔ سیاسی شرہ غاتیٹی قلاتی و نوشکوی مون پہ مون نا بندغ آ مدام زور مسکہ۔ خورشید جمالدینی داکان مست 13 مارچ 1973ء نا دے اسٹوڈنٹس ایکشن کمیٹی نا کنڈ آن اڈ ہلوک جلسہ، ہرا منان چوک کوئٹہ نا ہند آ اڈ تننگاسس، بلوچ ورنا تا کنڈ آن سم کاری نا وخت آ نت اٹ سم اس لگنگ آن ٹھپی ہم مسوسس۔ دا جنگ اٹی بی ایس او، و اسپیشل ہائی اسکول نا یونٹ سیکرٹری عبدالقیوم شاہوانی و بی ایس او نا فیض اللہ مینگل اس ہم ڈوکاری و پولیس شیلنگ و لٹکاری آن ٹھپی مسوسر۔ خورشید جمالدینی خوش تب، خوش بیان ءُ طالب علم راہشون اس ئس، ہمو دے تیٹی خورشید جمالدینی، عبدالقیوم ساسولی تون اوار مچھ اٹی بلوچ اسٹوڈنٹس آرگنائزیشن نا جلسہ غاتیٹی بلوچ ورنا نا کنڈ آن ہڑدڑ و جھیڑہ نا وخت آ دزگیر کننگاسس۔ بنا ٹی سنٹرل جیل مچھ، و اوکان پد ڈسٹرکٹ جیل کوئٹہ غا اتنگاسس، داڑے اوڑا کیہی مقدمہ غاک درج کننگاسر۔

ہفتئی تلار 

تاک: 39

10-16 Oct, 2020

پنہ: 02

Get real time updates directly on you device, subscribe now.

Leave A Reply

Your email address will not be published.