فیڈل کاسترو (8)
ڈاکٹر شاہ محمد مری
براہوئی بدل: جیلانی الفت
ولے…… دا جلہو بے سُہب مس۔ کاسترو نا نیمہ بندغ آک دا جنگ اٹی خلنگار۔ بھاز آک دزگیرکننگار، ہرافتے بتستا نا سپاہیک وڑ وڑ انا ظلم و تادی تے ترسا اوفتا ہم سا ءِ کچکی اٹ ہلکُر۔ مخلوق ءِ سبخ تننگ کن کل ءِ تا کسفنگ نا پرمان کننگا۔ و چندی چنا، نیاڑی، نرینہ و پیر انگا سم تا گواچی کننگا۔ کاسترو نا جند مَش تیٹی تینے ڈکا۔ ولے اسہ نن او خاچوک ئس کہ دزگیر مس۔ او تینا اصل پن ءِ تو پاتو، ولے اوڑتون اوار اوار زور اٹ دا پڑو ءِ کرسا کرے کہ ”نن آزاتی نا جنگ انا سپاہی تا وارث اُن۔“ سپاہیک اوڑا توفک آتے توریر ولے اوفتا لیفٹیننٹ اوفتے دا پارسا تورے ”نظریہ غاتے خلنگ مفک، نظریہ غاتا سا ءِ ہلنگ مفک۔“
ہمو مندر انگا بندغ فیڈل ءِ مرک آن بچفے۔ اونا شرافت ءِ ہُرسا شریف انگا کاسترو اودے تنیائی ٹی تینا اصل پن ءِ پارے۔ پدا او افسر پاریسُس۔ ”پین کس ءِ تینا پن ءِ پاپیس۔“ او لیفٹیننٹ اودے بھلا واکدار آتیا یا فوجی چھاؤنی اسکان دننگ نا جاگہ غا عدالت نا رد اٹ اسہ سول تھانہ اسے آ سر کرے۔ ہراڑے کہ اودے بیدس مقدمہ غان شوٹ کننگ متوکہ بلکن مقدمہ تو عدالت اٹی چلینگک…… دا لیفٹیننٹ نئے کیمونسٹ اس ئسکہ نئے سیاسی بندغ اس…… بس اسہ خوانندہ وشریف ءُ بندغ اس ئسکہ۔
کاسترو عدالت اٹی تینا مقدمہ ءِ تینٹ سنبھالا۔ تینا گچین انگا لیڈر (کماش) مارٹی نا قول و کیوبا نا پینل کوڈ نا مدت و کمکی اٹ، نوشت آن بیدس تینا پنچ کلاک مرغن انگا تران اٹی او بھاز بامعنی آ دلیل آتیٹی ہیت کرے۔ او فوجی زوراکی ءِ بد پارے…… یات سلے کہ دا جھیڑہ ٹی کاسترو نا سنگت آتا گڑا تیٹی سوویت یونین آن شینک مروک آ لینن نا اسہ کتاب اس ہم مِلاسُس۔ ہرادے کہ کاسترو ہوانا غان ہلکوسُس۔ عدالت اٹی دا کتاب ءِ گوریلا تا خلاف اسہ سلہہ اسے نا وڑ اٹ مون آ اتنگا۔ و ہنداڑے کاسترو دا ہیت ءِ پاریسُس۔ ”ہراسٹ کہ لینن ءِ خوانتنے او اسہ جاہل اسے۔ گڑا نی لینن ءِ خوانانُس۔“
فوجی زوراوار آتا رد اٹ عدالت آک تو بس پن انا عدالت ئسرہ۔ اگہ خوڑت ہُننگے تو جمہوریت اٹی ہم عدالت آک ہزگار آتا مریرہ۔ ہراوڑکہ آئین ءِ پیسہ والا باسک آک جوڑ کرینو و ہراڑے بھَلا بھَلا وکیل آک پیسہ ٹی ہلنگرہ اوڑے بے پیسہ غا بندغ آک بیدس عدالت آن سلرہ۔
و داڑے تو کاسترو آمریت زوراکی والا عدالت اسے نا مون اٹی ئس۔ بیرہ انصاف اٹ فیصلہ مننگ نا تو ہچ ءُ اومیت اس مننگ کتوکہ۔ او کمرہ عدالت اٹی کیوبا کن انقلابی بدلی تا حق اٹ دلیل ترسا کرے۔ دا بندغ داخس چنک سنی ٹی دا وڑ عالم آتیانبار ءُ تران اس کریکہ کہ انسان خننگ تون حیران مسکہ۔
دا بیان اٹی کاسترو بغاوت نا سوب آتے بیان کرے بتستا نا ظلم و ڈوہ تے تالان کرے، مخلوق نا بد حالیت و غریبی و بے سروسامانی، و ملکی صنعت کشت و کشار نا پد تمنگ آ گپ کرے۔ ولدا 26 جولائی نا جنگ انا سرجم آتے سرجمی اٹ درشان کرے و ہمو ناتڑسی تا یاتی ءِ کرے ہرا کہ اونا سنگت آتیا کننگاسُس۔
او مانٹیسکو و متکن آ چین، یونان نا شاری ریاست و متکن انگا روما و اونا بھاز مُتکن آ قول آتے یات کرے و جن سالسبری، سینٹ تھامس آکیناس، مارٹن لوتھر، فرانسیسی مصنف فرانکوئس ہاٹمین، سکاٹ لینڈ نا اصلاح پسند جان فوکس، 1668ء انا انقلاب انگلستان، 1775ء انا امریکی انقلاب و 1789ء انا انقلاب فرانس نا حوالہ غاتے ترسا دلیل آتے ایتک۔ کاسترو نا علم نا اندازہ دا چنک سنی ٹی ہم دا عدالتی بیان ءِ خواننگ آن پد جوانی اٹ مریک۔ دا مُرغُن انگا و پُرمغز عدالتی بیان History will Absolve ”تاریخ کنے بری کیک“ نا پن اٹ پنی ءِ۔ دنیا نا ہر بھلا بولی (بیدس بلوچی، براہوئی و اردوآن) ٹی دانا ترجمہ غاک مرسا کرینو۔
ہفتئی تلار
تاک: 39
10-16 Oct, 2020
پنہ: 03