غزل

یوسف عجب

0

Get real time updates directly on you device, subscribe now.

 

دڑد انا موسم ہنو ءِ نی خنوس

دا خرین آ نن تدو ءِ نی خنوس

نی خنوسک لیلڑی پارور کل

پالن انگا خن تتون مخور کل

نی خنوسک پرک آک آجو مرور

وا پدا گیرام کل غم تے کرور

نی خنوس آباد ہر خلق ءِ تینا

ہر گدانی ءِ خنوسک خوش پدا

نی خنوس ہر بزگل ءِ خواجہ مرو

ہر شوان تو مہر انا قصہ مرو

نی خنوسک نن مرونک خواجہی

ڈیہہ انا ہر بوچ پن و پھل اٹی

بیوسی ہم دم ترو ءِ نی خنوس

دڑد انا موسم ہنو ءِ نی خنوس

نی خنوسک لنگڑی دن سلپرو

نت شپادی بزگی دن سلپرو

خنپروسک نت تے ٹی ہم پوتڑو

بارن انگا جوڑ تے ہم کس بنو

دڑد انا درمان داڑے نی خنوس

پورو ءُ ارمان داڑے نی خنوس

نی خنوسک ظلم رسوائی خنو

نی خنوسک ملک زیبائی خنو

نی امن نا بیرک ءِ بڑزا خنوس

ہر کپوت ءِ خوش نی زیبا خنوس

خنپروس بوتار نا رعب ءِ پدا

پد بٹوس سرکار نا رعب ءِ پدا

مہر ہر است اٹ مرو ءِ نی خنوس

دڑد انا موسم ہنو ءِ نی خنوس

نی خنوسک تینے تینٹ پہہ مرون

نن ادب تاریخ ءِ تینا خوانفون

شاعر ءِ نن قوم انا شان اس ترون

رکھ ءِ ہم تینا ثقافت نا کرون

نی خنوس گل خان و نوری نا سبق

کپرونک ہچ وڑ اٹ تینے سبک

دیر ءُ دا یوسف عزیز و ہاشمی؟

پہہ مرو ءِ ہر چنا دا گواچنی

نن کرون تینا دوی تا وارثی

فلسفہ علم و ادب سائنس اٹی

پختہ ءِ یوسف عجب ایمان ہرس

دا شعور ءِ نن کرون تالان ہرس

شون انا جمر تفو ءِ نی خنوس

دڑد انا موسم ہنو ءِ نی خنوس

ہفتئی تلار
تاک: 11
19-13 فروری 2021ء
پنہ: 03

Get real time updates directly on you device, subscribe now.

Leave A Reply

Your email address will not be published.