ساڑی حکومت نا 2 سال نا کارکڑد آن الس خو ش ءِ، میر ضیاء اللہ لانگو
Get real time updates directly on you device, subscribe now.
کوئٹہ (خ ن) صوبائی وزیر داخلہ میر ضیاء اللہ لانگو پارینے کہ ساڑی صوبائی حکومت نا 2 سال انا کارکڑد آن صوبہ ٹی الس نا پت بحال مسنے‘ 2 سال مست ہراتم ساڑی حکومت اقتدار اٹ بس تو اودے ول ویچڑ ویل آک مون تروک ئسر۔ ولے وزیراعلیٰ بلوچستان جام کمال خان و اونا ٹیم دے ونن خواری کرسا صوبہ ٹی گوڈ گورننس ءِ پک کے‘ کرپشن ءِ چٹفسا صوبہ ٹی میرٹ نا بحالی و اصولی سیاست ءِ شون تننگا۔ صوبائی وزیر داخلہ میر ضیاء لانگو پارے کہ ساڑی صوبائی حکومت صوبہ نا ہر علاقہ ٹی ریکارڈ شونداری کاریم تا بناءِ کرے ہرانا فائدہ غاک داسہ خننگ انگ ءُ‘ صوبہ نا 33 ضلع ٹی اسپورٹس کمپلیکس نا منظوری و تعمیر آن ورنا چین تینا آخبت ءِ روشنا خننگ ءِ انتئے کہ غیر نصابی سرجز آتا شون آن ورناتا جوان ذہنی نشونما مریک و او جوان وڑاٹ شون ہلنگ کیرہ‘ داکان بیدس صوبائی حکومت 2500 کلومیٹر آن زیات سڑک جوڑ کرسا الس نا آسودہی ءِ پک کے‘ کورونا غان پد ہم جانجوڑی نابشخ اٹ ریکارڈ جوانی خننگا و صوبائی حکومت محکمہ سوشل ویلفیئر نا کمک اٹ 1000 آن زیات غریب و بیوس ناجوڑ آتا درمان ءِ کرفے ہرانا مستین مثال رسینگپک‘ وزیرداخلہ صوبائی حکومت نا کارکڑد نا ستاءِ کرسا پارے کہ ساڑی حکومت بنجائی حکومت آن بلوچستان کن 200 ارب مالیت نا 900 اسکیم ہم منظور کرفینے۔