کورونا دین انا چٹنگ اٹ اِرا سال لگنگ کیک، ڈبلیو ایچ او
Get real time updates directly on you device, subscribe now.
جنیوا (آن لائن) جہانی ادارہ جانجوڑی (ڈبلیو ایچ او) نا سروک انتونیو گوئتروس پارینے کہ کورونا نا چٹنگ اٹ ارا سال لگنگ کیک‘ درملکی خبر رساں ادارہ نارد اٹ تینا بیان اٹ ٹیدروس پارے کہ 1918 ٹی ہسپانوی فلو نا دین ءِ چٹفنگ اٹ 2سال لگاسس ولے داسہ ٹیکنالوجی نا دنیا ٹی شونداری ناسوب آن وائرس ءِ کم وخت اٹ توننگ اٹ کمک رسینگک۔ اوپارے کہ زیات اوڑدہی آن دا وائرس نا تالان مننگ نا گمان ارے ولے دا وخت آ نن تون دادے توننگ کن ٹیکنالوجی و علم ارے‘ منہ دے مست جہانی ادارہ جانجوڑی (ڈبلیو ایچ او) نا ایمرجنسی پروگرام نا سروک ڈاکٹر مائیک ریان پاریسس کہ کورونا وائرس نا پوسکن آ بش مروک لہر انا برخلاف ردعمل ءِ ترند کننگ ناگرج ءِ۔ ڈاکٹر مائیک ریان پارے کہ کورونا نا پوسکن آ لہر اتون اسیجائی اٹ جنگ تننگ نا گرج ءِ‘ سخت گام گیج آن کورونا وائرس نا پوسکن آ لہر ءِ توننگ مریک‘ داکان مست جہانی ادارہ جانجوڑی کورونا وائرس نا توننگ کن بھاز آ ملک آتا کنڈآن کروک گام گیج آتیا بے پتی نا درشانی ءِ کرسا پاریسس کہ بھاز آملک آتا کوشست آک غلط انگا کنڈ آ ہننگ اٹی ءُ۔