ملک اٹ یوریا نا کاختی آن کشارگر تا خواری گڑتی نا سوب ءِ، شہباز شریف

لاہور (آن لائن) پاکستان مسلم لیگ (ن) نا صدر و قائد حزب اختلاف شہبازشریف ملک اٹی یوریا نا کاختی و کشارگر آتے مون تروک ویل آتیا گڑتی نا درشانی کرینے۔ و پارینے کہ کشارگرک درپدر مسنو۔ کھد انا اسمگلنگ و بلیک اٹی بہا مننگ نا چرجوئی برجا ءِ، حکومت مست آنبار داسہ ہم خن تیان اودیم ءِ۔ جہانی منڈی ٹی یوریا نا نہاد زیات ءِ تو گڑا اسمگلنگ ءِ توننگ کن ہم گام گیج کننگپ؟ تدوک آ دے تینا بیان اٹی شہباز شریف پارے کہ ڈی اے پی و یوریا نا اسمگلنگ ءِ توننگے، کشارگر تا استحصال ءِ بس کننگے، ہر باندات حکومتی نابودی، و دزخواجہی کل آ پاش مسنے، و دانا دسوک آتے الس و کشارگر تے روتوئی تمنگ ءِ۔ او پارے کہ کشارگرک پوہاڑ کننگ اٹی ءُ کہ اسمگلنگ مننگ اٹی ءِ، ولے حکومت خاچوک ءِ۔ جہانی منڈی ٹی یوریا نا نہاد آک زیات ءُ تو اسمگلنگ نا توننگ کن انتئے گام گیج کننگپک؟ پیشگی بست و بند انتئے کننگتو؟ یوریا نا کاختی پی ٹی آئی نا بدانتظامی و کرپشن نا پد ءِ۔ ہرا اونا پن آ لچانے۔ یوریا مفننگ نا مطلب کشاری پیداوار اٹی کمتی ءِ، ہرانا پد پوسکن انگا ویل آک ودی مریرہ۔ بد بختی نا ہیت دادے کہ اسہ کشاری ملک اس ہرا خولم و بورہ برآمد کریکہ، ایون خولم و بورہ پیشن ملک آن خواہنگ اٹی ءِ۔ ننا دور اٹی ڈیپ 2400 آ گونی ئسکہ، اینو کشارگر تے 10 ہزار اٹی ہم رسینگ پننگ اٹی ءِ۔ حکومت نا نہاد آتا کنٹرول مفننگ بے سہبی نابودی و بدانتظامی نا انتہاء ءِ۔ 2015-16 ٹی ننا دور اٹی پٹی نا ریکارڈ پیداوار اسہ کروڑ چِل لکھ بیل اسکان مسوسس۔ ساڑی حکومت نا پُٹی نا پیداوار نا بارو اٹی حساب آک غلط بیانی ءُ۔ وزیر اعظم نواز شریف 2015ء ٹی تاریخی کشارگر پیکیج اس تس، کشارگر تے لیٹ آن مرکو نسخان تیٹی ارب آ روپئی تا کمک تننگا۔ چنکا کشارگر تیان شانزدہ لکھ ءِ 32 ارب روپئی تننگا۔ شہباز شریف پارے کہ دا پروگرام سیالکوٹ و لودھراں ٹی 5 نومبر2015ء غا پی ڈی ایم اے نا کمک اٹ بنا کریسس۔ 33 ضلع ٹی 166 ہند جوڑ کننگاسر۔ پی آئی ٹی بی، نادرا، بینک آف پنجاب و این بی پی نا نمائندہ غاک ہم داڑی ئسر۔ ون ونڈو آپریشن نا کمک اٹ ہر ہند آن 200 کشارگر ءِ ہڑدے نا کاٹم آ کمک رسیفنگاکہ۔ دا اسہ تاریخی ءُ ریلیف پیکیج اس ئسکہ، ہرا چنکا کشارگر تے تینا نت تیا سلفنگ اٹ سرسہبی نا نشان مس۔ اینو کشارگر تتون اوار الس نا حالیت ءِ ارّفوک ءُ کس اف۔