ملک ءِ لٹوک آتتون خیر ءِ قوم اتون غداری اس تکوہ، عمران خان

اسلام آباد: وزیراعظم عمران خان پارینے کہ ملک ءِ لٹوک آتتون خیر ءِ قوم اتون غداری اس تکوہ، پاکستان نا زرگزرانی ردوم کورونا نا سوب آن 5.37 درسد اسکان سر مس، برآمد آک 31 ارب ڈالر نا ریکارڈ کہول آٹو،کشارگر آتا کٹیا ٹی 73 درسد ودکی مسنے، کورونا نا مون ءِ سرسہبی اٹ تورین، کبینی نا ہم مون ءِ تورنہ، نن پاکستان ءِ اسلامی آسودہی ریاست اس جوڑ کننگ کن گام گیج کننگ اٹی اُن، اولیکو وار پنچ اسکان اسہ وڑ نصاب تعلیم اس درستی راستی کرفین، الس وڈی خور سیاست دان آتے کن پیش تمپک، کبینی جہانی ءُ ویل اسے، ہرا وڑ کورونا غان پیش تمان، ہندن کبینی آن ہم پیش تمنہ، پرسجو ءِ جہاد اس تکوہ، ملک انا کریمنل جسٹس سسٹم اٹی گچینی اتنگ اٹی اُن، بلدیاتی گچین کاری تا بروک آ ریسہ ٹی ٹکٹ آتا بشخنگ و اومیتدار آتا لائخی ءِ تینٹ ہُروہ۔ بھلا گاڈی و اُرا تیٹی رہینگوک آک خراج ایتر، عمران خان حکومت آن پیش تمنگ آن پد وڈی خور آتے کن پین زیات خطرناک مریک۔ نواز شریف نا پدی بننگ کن ہُروک اُٹ۔ قوم اتون قول کیوہ کہ ٹیکس دوئی کننگ نا کچ ءِ 8 ہزار ارب اسکان دیوہ۔ یک شنبے نا دے ”آپ کا وزیراعظم آپ کے ساتھ“ اٹی براہ راست الس نا سوج آتا ورندی تے ترسا وزیراعظم پارے کہ ای کوشست کیوہ کہ ہر تُو اِرا تُو آن پد ہندا وڑ فون آ الس تون ہیت کیو، اوفتا سوج آتا ورندی تے ایتو۔ ای پارلیمنٹ اٹی سوج آتا ورندی تے تننگ خواہسٹء، ولے اوڑے این آر او خواہوک آک ہیت اکن الیپسہ۔ او پارے کہ پاکستان اسہ عظیم ءُ تغ اسے نا پن ءِ، دا ننا نظریاتی لیڈر علامہ اقبال نا تغ ئسکہ، ہندن ءُ ریاست اس جوڑ مرے کہ مچ آ دنیا نا مسلمانک دادے خنر ہیل کیر کہ اسلامی آسودہ ریاست امر مریک؟ او پارے کہ ای داسہ زُوت آتیٹ اسہ آرٹیکل اس لکھاٹ، تو اوڑا پاننگا کہ دا دین انا رند اٹ ڈکنگ ءِ تینے۔ کنے اللہ جان ہر گڑا تسوسس، کنے سیاست اٹی بننگ نا گرج اَلوکہ۔ کنے سیاست اٹی بننگ آن مست ہم ہراسٹ چاہسکہ، ولے ایلو سیاست دان آتے سیاست اٹ بننگ آن مست کس تتوکہ۔ کنا سیاست اٹ بننگ نا مسخت اس اس ارے کہ ہرادے ای 25 سال مست تینا منشور اٹی تسٹ، ہرا مسخت کہ قرار داد مقاصد اٹی لکھوک ئسکہ کہ مدینہ نا اسلامی آسودہ ریاست نا بنداو آ اسہ اسلامی آسودہ ریاست اس جوڑ کروئی ءِ، ای تو دن پاتنٹ کہ ملک ءِ ایشیائی ٹائیگر جوڑ کیوہ۔ وزیر اعظم پارے کہ ہندوستان نا مسلمان تے سما ئس کہ اوفک پاکستان اٹی بننگ کپسہ، ولے ولدا ہم اوفک قائداعظم تون تَفیر، ہرانا سوب آن دا ملک جوڑ مس۔ اگہ دانا مسخت ءِ مونی دپنہ، تو سرسہب ہم مفنہ۔ کبینی نا بابت سوج انا ورندی وزیراعظم پارے کہ اینو انفارمیشن ٹیکنالوجی و موبائل نا دور ءِ، ای سہب اتون گھنٹہ اس کل معلومداری تے دوئی کیوہ۔ کبینی کنے کیہی وار ننکان دریہو ایتک۔ وزیراعظم الس آن خواست کرے کہ او ترندی اٹ تالان مروک پنچمی ریسہ ٹی رکھی گام گیج آتے پک کیر۔ ماسک بینر۔ او پارے کہ نن تیان کاروبار تے بند کپنہ، اپوزیشن کورونا نا بنا ٹی مسہ تُو اسکان اسمبلی فلور آ ننا پالیسی تے شیف خلک، ولے ننا نیت نا سوب آن دنیا ٹی ننا پاننگک کہ دافتا کسر ءِ دوئی کبو۔ نن کورونا غان سرسہب پیش تمان، داسہ کبینی آن ہم ہندن سرسہبی اٹ پیشن یپش تمنہ۔

(اے پی پی)