فیڈل کاسترو (26)

ہرا وخت آ نن سمجھنہ کہ داوڑ انا اسہ بڑز ءُ خیال اس اودے انسپائر کرے‘ تو نن ہمو ورنا تے ہیروازم نا تصور اٹ پیش کرون‘ ہرا کہ سنتیا گو ٹی تمّار کسکُر۔ نن تون ساڑی کم ازباب و گڑاک ننا پک انگا سرسہبی ءِ تورینو‘ ہرا وخت سپاہی تے پاننگا کہ پرایو ننے اسہ ملین ”پیسو“ تسنے، اوفتے رجیم نا کل آن بھلا راستکی ءِ چَپ چوٹ کرسا نشان تننگ نا کوشست کننگا۔ راستکی دادے کہ ننا تحریک نا مستین نا سیاستدان آتتون ہچ ءُ تعلقداری اس الو۔ دا کہ دا تحریک اسہ پوسکن ءُ کیوبائی چین اسے۔ و دا پوسکن انگا تصور آتا بیداد نا برخلاف بش مننگ نا چر اسے، و دا ہم کہ دا تحریک ورنا غا بندغ آتیان جوڑ مسنے۔ ہرا کہ او وخت آ بیرہ 7 سال انا ئسرہ۔ ہرا وخت آ کہ بتستا 1934ء اٹی تینا ڈوہ تا اولیکو چر ءِ بنا کرے، ملین پیسو نا دروغ داڑان زیات بے ہودہ مننگ کتوکہ، اگہ نن 20 ہزار آن ہم کم پیسو تیا 165 بندغ سلہہ بند کرین، و اسہ رجمنٹ و اسہ اسکواڈرن اسے آ جلہو کرین، تو اسہ ملین پیسو تیان نن 8000 بندغ سلہہ بند کننگ کرینہ۔ و ہندن او 50رجمنٹ 50 اسکواڈرن آتیا جلہو کننگ کریرہ، و ہفتہ 26 جولائی آ سہب اتون 5:15 بجہ غا اگالڈے کیریلو ءِ دا گڑا ءِ ہُروئی ئس، ای نمے باور کرفوہ کہ ہر ہمو بندغ ہرا کہ جنگ اکن بسوسر، سلہہ نا کمبوتی نا سوب آن 20 جوان ءُ ہیلکار جنگ کننگ کتوس۔ ہرا وخت آ او ورناک مارٹی نا سد سالی آ اسٹوڈنٹ جلوس اٹی ہوانا نا گلی تیٹی مارچ کریر۔ تو اوفک سوگو وڑ اٹ 6 بلاک پیک کریسُر۔ اگہ بیرہ 200 پین بندغ جنگ کننگ نا وڑ اٹ مسرہ یا نن تون پین ہینڈ گرنیڈ مسکہ تو مننگ کیک دا شرفدار آ عدالت اینو نا دا خواری تیان بچّاکہ۔

سیاستدان آک ضمیر آتے ہلنگ کن ملین آ روپئی تے خڑچ کیرہ۔ وخت اس کہ پش اٹو کچ اسے ٹی کیوبائیک ہرا کہ تینا ملک انا عزت ءِ بچفنگ خوارہ فنڈ آتا کمبوتی نا سوب آن دو خالی اوفتے مرک انا مون ءِ ہروئی تما۔ داڑان سما تمک کہ ہرا وڑ اینو پہ دے اسکان ملک سخی و ہشری بندغ آتیان آخا بلکن ننا پبلک زندگی نا دف چٹ یعنی سیاسی بھتہ خور آتا دوتیٹی مسنے، ای نمے بھا زبھلو گمر اسے ٹی پاوہ کہ تینا اصول آتا رد اٹ نن گدرینگوک آ یا داسہ نا اسہ سیاستدان اسے آن ہم پائی اس خواتنُن۔ ننا وسیلہ غاک بیش بہا قربانی تیان مُچ مسُر دن کہ اپلیڈ یوسوسا، ہفا، ہرا کہ تینا روزگار ءِ بہا کرے۔ و اسہ دے اس ”کاز“ اکن 300پیسو تون اوار کنے آ بس۔ فرنانڈو چنارڈ تینا فوٹوگرافی نا گڑا تے بہا کرے، ہراڑان او تین کن باخو اس کٹاکہ۔ پیڈرو ماریرو چندی تُو انا تنخواہ ءِ چندہ ٹی تس، و ہرادے کہ تینا اُرانا فرنیچر آتے بہا کننگ آن نن تورین۔ آسکر الکالڈے تینا فارما سیوٹیکل لیبارٹری ءِ بہا کرے۔ جوزی مونٹین تینا پنچ سال انا بچت آتے تس۔ و داوڑ ایلو چندی بندغ آتا مثال ءِ تننگ کیوہ۔ ہرافتتون انت اس کہ ئس او تسر تا۔

دن انگا گڑا ءِ ہمو کیک ہرا نا تینا ملک آ بھلو ایمان اس مریک۔ آئیڈیلزم نا دا گام تا یات آک کنے سدھا ہمو رکھ انا خرین انگا ہیت آتا یاتی ءِ کرفرہ۔ دا ہمو نہاد ءِ ہرا ظلم و بیداد آن آزات کننگ نا است خواہی آ اوفتیان دوئی کریٹ۔

اے محبوب بے شک! نم اگہ

وخت اس کنا لُمہ وطن نا اومیت ئسرے

کنا پیشانی آ شاغبو!

تینا سڑوک آ ہڈ آتے چورہ غاتے

تینا یخ انگا دوتیٹ کنا است ءِ ابُّو

کنا خف تیٹی نی ہوغ

کنا فریاد آتیٹی ہر اسہ

اسہ پین زوراک اسے نا

خڑینک آتیٹی بدل مریک!

کنا داپار ایپار آن مُچ مبو

تاکہ کنا ہروہ نما ہروہ تے دوئی کے

دا خاطر آن کہ خڑینک آک گنج افس

ہرا وخت آ کہ اسہ بے پن ءُ مے مولدی سیٹی رہینگوئی تمے

اگہ نم 27 نومبر 1871ء نا ڈوہ تے دہ اٹی ضرب ایتبو تو گڑا نم اوریانٹے نا صوبہ 26، 27، 28 و 29جولائی 1953ء نا گندہ انگا و بھلا بھلا ڈوہ تیا رسینگ کیرے۔ دا داسکان ننا جوان است آ بریک، ولے اسہ دے اس ہرا وخت آ سال آک گدرینگور۔ ہرا وخت آ قوم انا آسمان اسہ وار ولدا سفا مرو۔ ہرا وخت آ تب آک آسرات مرور۔ و ہرا وخت آ خلیس ننا ہروہ غاتے پین عذاب کپرو۔ گڑا نن دا کل ڈکھیائی تا کنڈ آ ہنسا دا کشت و خون ءِ جوانی اٹ ہُننگ نا بناءِ کرون۔ و آخبت نا چین تا ہمو وخت آ اپاخ آک پرینگور۔ ہراتم اوفک مون ءِ ہڑسسا پدی ہمو ناتڑسی و قہر انا ہمو گام تے ہُرور۔ ہرافتا مٹ ننا تاریخ اٹی ملپک۔

ولے ای خار اٹی بننگ خواپرہ۔ کنے مزغ اٹی شفافیت و تینا است ءِ بھلن کروئی تمک۔ کہ حقیقت آتے اخس کہ مننگ کرے اسہ وڑ اسے ٹی اوفتے ڈرامائی جوڑ کننگ آن چپ سادہ وڑ اٹی بیان کیو۔ بلکن ہمو وڑ بیان کیوتا ہراوڑ اٹی او مسنو۔ کیوبائی اسے نا حیثیت اٹ ای دا ہیت آ شکی اُٹ کہ سخت است والا بندغ آتے داوڑ انا گمان آن پیشن ڈوہ کننگ کن کسر تننگا۔ ہرافتیان ایلو دنیا نا مون آ ننا قومی بے شرفی مس۔

ظالم آ آمر بتستا وخت اس ہم خوڑت سجفوک ءُ بندغ اس متنے۔ او تینا قوم اتون غضبی ءُ دروغ تڑنگ آن ہچ گہس ابجینگتنے۔ تینا 10 مارچ انا غداری ءِ جواز جوڑ کننگ نا خاطر آن او آرمی ٹی خیالی بغاوت نا بارو اٹ کِسہ اس گنڈا۔ ہراکہ فرضی وڑ اٹ اپریل اٹی مننگ کن شیڈول مسوسس۔ ہرافتے کہ او پد بٹنگ خواہسکہ۔ تاکہ رپبلک دتر چر مف۔ دا ملنڈی آ کِسہ غا ہچ گہس ہم کس باور کتو۔ و ہرا وخت آ او رپبلک ءِ تینٹ دتر چر کننگ خواہس، ہموتم کہ ہراتم کیوبا نا ورناک برحق بغاوت کریر، ہراکہ اونا مے مننگ خواتوسہ۔

ہفتئی تلار
تاک: 11
19-13 فروری 2021ء
پنہ: 03