نن عئید انا نوک افن کہ وار وار آ خننگک، سردار اختر مینگل

 کوئٹہ(آن لائن) بلوچستان نیشنل پارٹی نا کماش سردار اختر جان مینگل پارینے کہ نن عئید انا نوک افن کہ ہر وار خننگن، 70سال تا سے بیرہ یقین دہانی کرفنگ انگ ءِ، ولے داسہ دُن مفک، حکومت اخس اُرے کیک اپوزیشن نا مقناطیس ہموخس ننے تینا کُنڈ آ چِکک ہراتم آن کہ حکومت آن جتائی ءِ تینائی کرین تو تو ہر دھول آ چاپ خلنگ والا کڑد ءِ امر ادا کرون، ملک اٹ اسہ محکمہ اس ہم جوان اف، ایلوفتے الے جوڈیشری ءِ ہم بشخنگتو، ریفرنس دائر کروک آک یا ہرافتا پاننگ آ دائر کننگا کڈ مننگ نا ہیت ءِ، وڈی خوری نا ایسری نا فارمولہ اس تو مرو ءِ، ہراتم نُم تینا داپار ایپار، چَپ راست، مون پد ءِ ہلسا اپوزیشن اٹ دُو شاغسہ تو او احتساب اس متو وخت اسکہ بدلہ اس پاننگک، وزیراعظم نا برخلاف تحریک عدم اعتماد کن اپوزیشن ءِ تینا صف آتے سوگو کروئی مریک دُن مف کہ چیئرمین سینیٹ نا برخلاف تحریک عدم اعتماد نا وڑ بے سہبی دوئی مرے، کورونا نا تالانی ٹی نہ بیرہ حکومت وخت اسکہ بنجائی حکومت ہم زموار ءِ، دا خیال آتا درشانی ءِ او تدوک آ دے خاص ءُ انٹرویو اس ترسا کرے، بلوچستان نیشنل پارٹی نا کماش سردار اختر جان مینگل پارینے کہ بلوچستان نیشنل پارٹی نا 6 ٹِک آن پاکستان ناہر سیاسی کارندہ واقف مسنے ولے ہرافتا زمواری ئس او داڑان ناواقف ءِ، کل ءِ سما ءِ کہ 6 ٹِک آتیٹی انت ءُ او ایلو معاہدہ نا 9 ٹِک اٹ انت ءُ، پاکستان تحریک انصاف نا مخ تفی آ اُلس نا ملنڈ و تنقید آتے سگسا کرین نن اولیکو مرحلہ ٹی سال اسے نا وخت تسن تا وخت اس کہ ہمو وخت آ ہم دا واضح کریسن کہ سد درسد عمل مفک تو کم از کم بیست آن پنجا درسد اسکان عمل کننگے تانکہ تینا اُلس ءِ ورندی تننگ کین انتئے کہ نن تینا اُلس نا مون آ ورندی تروئی ءِ، نن گچین کاری تیا مست و پد آن ہندا شش ٹِک انا بنداو آ اُلس آن ووٹ ہلکونن او پارینن کہ اگہ نن حکومت اٹ مسن یا حکومت نا اتحادی مسن تو ہندا ویل آتے ایسر کرفنہ یا ولدا اپوزیشن اٹ مسن تو ہندا ویل آتے ایوان اٹ ہرفنہ۔