بلوچستان نا ڈویژنل و ضلعی ہسپتال آتیٹی کورونا ٹیسٹنگ لیبارٹری جوڑ کننگ نا پارت

کوئٹہ (خ ن ) وزیراعلیٰ بلوچستان جام کمال خان ڈویژنل و ضلعی ہسپتال آتیٹی کورونا وائرس نا ٹیسٹنگ لیبارٹری تا جوڑ کننگ نا بنداو ءِ تخنگ نا پارت کرسا ضلعی کہول آ کورونا وائرس نا ٹیسٹنگ نا بنا ءِ زوت اس پک کننگ نا گرج انا پارینے، کورونا وائرس نا ساڑی حالیت وائرس نا تالانی نا خلیس او ہسپتال آتیٹی ایمرجنسی آسراتی تا مننگ نا بابت ویل آتا جاچ ءِ ہلنگ کن اڈ ہلوک بڑزکو کہولی دیوان نا وخت آ تینا خیال آتا درشانی ءِ کرسا وزیراعلیٰ ترندی ٹی پارت کرے کہ حکومتی دیوان تا وخت آ کروک آ فیصلہ غاتیا اونا روح انا رداٹ عملدرآمد ءِ پک کننگے تانکہ دا فیصلہ غاتا جوان ءُ نتیجہ مون آ بننگ کے، دیوان اٹ کوئٹہ شار اٹ وائرس نا تالانی آ اُست ہسونی نا درشانی ءِ کرسا اُلس آن اسہ وار ولدا خواست کرینے کہ اوفک ماسک انا کاریم ات اتنگ تون اوار ایلو کل رکھوک آ گام گیج آتیا ہم عملدرآمد ءِ پک کننگے، دیوان اٹ فیصلہ کننگا کہ اُلس نا مفاد اٹ وائرس نا تالانی نا توننگ کن سخت ءُ گام گیج ہم ہرفنہ، دا بابت اٹ منہ اہم ءُ فیصلہ کننگااو ہمو ادارہ غاتے اوفتیا عملدر آمد کننگ نا پارت کننگا، دیوان اٹ پی ڈی ایم نا کنڈآن کورونا وائرس آن زہمی آ ہمو بندغ آک ہرافک تینا اُراتیٹی آئسولیٹ ءُ اوفتے تینا مدافعتی نظام ءِ سوگو کننگ کن جوان ءُ کُن خور ہلنگ نا وس اف اوفتے کن کُن و خور پروگرام نا رداٹ فوڈ پیکیج نا تننگ نا جاچ ءِ ہم ہلک، دیوان ءِ دا پاننگا کہ زوت اس پروگرام آ عملدرآمد نا بنا ءِ کننگک او دن انگا بندغ آتے پی ڈی ایم اے کنٹرول روم تون حال احوال کرسا تینا کوائف نا تننگ آ پروگرام اٹ اوار کننگک۔ صوبائی وزیرک میر ظہور بلیدی، میر سلیم کھوسہ، چیف سیکرٹری فضیل اصغر آئی جی پولیس محسن حسن بٹ، سیکرٹری جانجوڑی دوستین جمالدینی، سیکرٹری سپورٹس وانچارج بی سی او سی عمران گچکی، ایڈیشنل آئی جی پولیس عبدالرزاق چیمہ، ڈاکٹر پروفیسر سکندر سلطان ، ڈی جی جانجوڑی ڈاکٹر سلیم ابڑو و ایلو کمامدار آک ہم دیوان اٹ بشخ ہلکر۔