بیڈ و آکسیجن نا گرج آک پورو، رکھی گام گیج آتیان گچین ءُ حوال مون آ بسنو،عمران خان

اسلام آباد(آن لائن) وزیرِ اعظم عمران خان بیڈ و آکسیجن نا گرج آتے پورو کننگ کن کروک آ گام گیج آتیا اُست جمی نا درشانی ءِ کرسا پارینے کہ کورونا نا توننگ نا بابت اٹ دوئی کروک آ حکمت عملی نا جوان ءُ نتیجہ مون آ بسنے، بھلا عئید ءِ مون آ تخسا ایس او پیز آتے صوبائی حکومت آتا سلاہ ٹی زوت اس جوڑ کرسا اوفتے عمل کرفنگ ءِ پک کننگے، دا وار بھلا عئید ءِ سخت ءُ حالیت اسے ٹی اڈ تننگ انگ ءِ۔ اُلس نا رکھ اکن واضح ءُ ایس او پیز زوت اس جوڑ کرسا اوفتے آ سختی ٹی عمل کرفنگے۔ وزیرِ اعظم دا خیال آتا درشانی ءِ ملک اٹ کورونا نا حالیت و وائرس نا توننگ نا بابت اٹ دوئی کروک آ حکمت عملی نا بابت اٹ جاچ ہلوک دیوان نا کماشی ءِ کرسا کرے۔ دیوان اٹ کورونا نا حالیت، مچ آ ملک انا ہسپتال آتیٹی آکسیجن بیڈ آتا کچ اٹ ودکی نا حالیت، آکسیجن نا خواست و سپلائی، ملک انا بھلا شار تا زہمی آ علاقہ غاتیٹی سمارٹ لاک ڈاون نا نافذ کرفنگ و بھلا عئید نا بابت اٹ جوڑ کروک آ ایس او پیز نا بابت اٹ معاملہ غاتیا خوڑتی اٹ سجفنگا۔ وزیرِ اعظم ءِ ہر چار آ صوبہ غاک، آزاد جموں و کشمیر و گلگت بلتستان نا ہسپتال آتا کوویڈ اکن خاص انگا بیڈ آتا کچ اٹ ودکی کن کروک آ کوشست و دا وخت اسکان نا پیش رفت آتیا بریفنگ تننگا۔ وزیراعظم عمران خان پارینے داسکان ای پہہ متوٹ کہ سندھ اٹ ریڑھی والا تے انتئے بند کننگا، اگہ صوبہ کنے آن ارفیکہ تو دُن ءُ لاک ڈاون اس متوکہ۔ دود آن تران اٹ وزیراعظم عمران خان پارینے کہ پاکستانی قوم نا فنڈنگ نا جوزہ ءِ تکوہ، شوکت خانم ہسپتال کن اُلس فنڈ تس، پاکستان اٹ 30 سال اٹ کل آن زیات فنڈ ای مُچ کریٹ۔ او پارینے کہ پاکستانی اُلس چندہ تروک آ قوم تیٹی کل آن مون آٹے، زمی جمب بس تو کل چندہ تننگ کن بالاکوٹ آ ہنارہ۔ او پارینے کہ یورپ ءِ ہُرسا پاکستان اٹ لاک ڈاون کننگا، یورپ و پاکستان نا حالیت آتیٹی بھاز فرق ارے، کنے آن اگہ صوبہ غاک ہرفیرہ تو داوڑ نا لاک ڈاون کننگ کن اُسل التوٹہ، بھاز تنقید مس ولے شکر ءِ کنا ہیت بننگا۔