اے این ایف نا کارروائی تا چربرجا، منشیات دوئی، دوبہ دار دزگیر

اسلام آباد: اینٹی نارکوٹکس فورس (اے این ایف) نا انسداد منشیات نا کارروائی تا چرجوئی برجاءِ۔ دوشنبے نادے آ اے این ایف نا ترجمان نا رداٹ اسلام آباد انٹرنیشنل بالی پٹ فلائٹ نمبر PK287آن قطر آ ہنوک آ خیبر نا ہنکینی دوبہ دار اسے دزگیر کرسا دوبہ دار نا پڈ آن 79 ہیرون و 11 چرس آن پُر کیپسول دوئی کرے۔ اسہ پین کارروائی اسے ٹی اسلام آباد موٹروے ٹول پلازہ نا خڑک کار اسے آن 9 کلو 600 گرام چرس، 7 کلو 200 گرام ہفیم و 2 کلو آئس دوئی کرے و پشاور و نوشہرہ نا ہنکینی 2 دوبہ دار ءِ دزگیر کرینے۔ لاہور جوہر ٹاؤن اٹی واقع نجی کوریئر آفس اٹی لندن آ گدریفوک آ پارسل آن 2 کلو 560 گرام ہیرون دوئی کننگا، دوئی مروک ہیرون پارسل کروک آ کمبل، زالبول آتا پچ و رزان تیٹی اودیم کننگاسس۔ اسہ پین کارروائی اسے ٹی کراچی سہراب گوٹھ نا خڑک کارروائی کرسا 26 کلو 400 گرام چرس دوئی کرے۔ کراچی نا ہنکینی زالبول و دوبہ دار ءِ دزگیر کننگا۔ اسہ پین کارروائی اسے ٹی کراچی شاہراہ فیصل آ واقع نجی کوریئر آفس اٹی آسٹریلیا غا مون تروک آ پارسل قالین اٹی اودیم کروک آ پیپ آتیان آئس دوئی کرے۔ پیپ آتا جم وزن 2 کلو ءِ۔ اسہ پین کارروائی اسے ٹی ڈیرہ اسماعیل خان آن پنجاب منشیات اسمگلنگ نا کوشست ءِ بے سہب کرے۔ یارک ٹول پلازہ انڈس ہائی وے آ پک اپ آن 166 کلو 800 گرام چرس و 7 کلو 200 گرام ہفیم دوئی کرے۔ دتہ خیل نارتھ وزیرستان نا ہنکینی دوبہ دار اسے دزگیر کرے۔ اے این ایف و ایف سی نا خیبراٹی اسیجائی کارروائی ٹی پلاسٹک نا تھیلہ غاتیان 11 کلو چرس دوئی کریر۔ کوئٹہ کچلاک بائی پاس نا خڑک کارا سے آن 100 کلو چرس دوئی کریر۔ کوئٹہ نا ہنکینی دوبہ دار اسے دزگیر کریر وخت اس کہ مستی جاست وپاست آن پد دوبہ دار تینا ایلو سنگت آتا پیدواری ءِ کرے، اوکان پد ایلو دوبہ دار آتا تعاقب ءِ کرسا کوئٹہ کراچی روڈ انا خڑک آن قلات و کوئٹہ نا ہنکینی 2 دوبہ دار ءِ دزگیر کریر و 1 گاڈی اسے ہم کوزہ ٹی ہلنگا۔ اسہ پین کارروائی اسے ٹی کوئٹہ کچلاک بائی پاس نا خڑک کار اسے آن 90 کلو چرس دوئی کریر۔ قلع عبداللہ نا ہنکینی دوبہ دار اسے دزگیر کریر۔ دزگیر دوبہ دار آتا برخلاف منشیات تور ایکٹ نا رداٹ مقدمہ درج کرسا جاست وپاست نا بناءِ کننگانے۔

(اے پی پی)