زمیندار تا ویل آتا ایسری کن کاریم کننگ انگ ءِ، کریم جعفر

کوئٹہ: محکمہ کشت وکشار حکومت بلوچستان نا ترجمان عبدالکریم جعفر پارینے کہ زمیندار آتا ویل آتے ایسر کننگ کن محکمہ کشت وکشار غٹ دوئی وسیلہ غاتے کاریم اٹ اتنگ ءِ ہر ضلع نا کہول آ کشت وکشار توسیع نا دفتر ءِ زمیندار آتا وٹس ایپ گروپ نیز فیلڈ ڈیز،ڈیموپلاٹس پین پین نا کمک اٹ زمیندار آتون رابطہ ءِ و ہر ا حوال کشت وکشار نا بابت مون آ بریک اوڑا دمدستی کارروائی کننگک۔ داڑے جاری مروک اسہ بیان اسے ٹی ترجمان پارے کہ مسکوہی اسپیکر بلوچستان اسمبلی جمال شاہ کاکڑ نا بابت ہندی اخباراٹی شینک مروک آ خبر ہراٹی پاننگانے کہ مارکیٹ اٹی خولم نا نہاد کم مفننگ ءِ و نوشکی ٹی کوٹخ نا فصل ءِ دیر ملپننگ نا حالیت اٹ خراب مننگ نا گڑتی ظاہر کننگانے داہیت انا وضاحت ءِ کننگک کہ محکمہ کشت وکشار زمیندار آتا مشکل آتے ہر کہول آ مون آ تخسا کاریم کننگ ءِ تاریخ اٹ اولیکو وار 2.2 ارب روپئی نا خولم نا بج مفت مچ آ بلوچستان اٹی کشارگرآتیٹی بشخنگا ہندا وڑ برنج نا فصل اکن نصیر آباد ڈویژن نا ضلع نصیر آباد، جعفرآباد، صحبت پور و اوستہ محمد نا 60 ہزار کشارگر آتے مفت بج بشخنگ انگ ءِ۔ ترجمان پارے کہ زوت آتے اٹ بگریڈابگ نا جلہو نا حوال نا دروشم اٹ رکھی گام گیج آتا دمدستی مشورہ تننگا ہراڑان الحمداللہ ویل زیات ودیتو ہراتسکان بجلی نا سوب آن دیر اٹی کمتی نا ہیت ءِ تو دا دویل محکمہ کشت وکشار نا اف البتہ محکمہ کشت وکشار سولر رعایتی نرخ آتیا تننگ ءِ ہرانا سوب آن بجلی نا لوڈشیڈنگ نا ویل آ ایسر ی نا کنڈآ پیشر فت مسنے داہیت انا پیدواری ءِ کننگ انگ ءِ کہ خولم نا داوار فصل بھاز جوان مس ہراتسکان نہاد آتا تعلق ءِ اونا تعلق بیرہ پیدوار آن آخا بلکن اوڑا بھاز انگا عوامل اثرانداز مریک ہراکہ محکمہ کشت و کشار نا اثرآن پیشن ءِ البتہ گچین فصل انا سوب آن اومیت کننگ انگ ءِ کہ خولم نا نہاد ودنگ نا جاگہ غا کم مریک۔

(اے پی پی)