دستکاری تون گنڈوک بندغ آتا ویل آتے ایسر کننگ کن المی گام گیج کننگے‘نذرمحمدبلوچ

کوئٹہ : صوبائی محتسب بلوچستان نذر محمد بلوچ ایڈووکیٹ پارینے کہ سمال انڈسٹریز ونگ بلوچستان نا دستکاری گڑاتے ٹی ننا ہڑدے ئی زند انا ربیدہ ئی گڑاتا تیاری و بہا کننگ آن نن دا اہم انگا بشخ ءِ شون تننگ تون اوار تینا زیبا غا دود ربیدہ ءِ ءِ ہم مچ آدنیا ٹی مونی دننگ کینہ۔ دا خیال آتا درشانی ءِ او تدوک آ دے کوئٹہ شار اٹ سمال انڈسٹریز ونگ بلوچستان نا ہینڈی کرافٹس شاپ انا دورہ ناوخت آ کرے۔ داوخت آ ڈائریکٹر محتسب سیکرٹریٹ سعید احمد شاہوانی، بنجائی محتسب بلوچستان کے ریجنل ڈائریکٹر غلام سرور بروہی، پروٹوکول آفیسر آفتاب احمد، رجسٹرار بنجائی محتسب بلوچستان امیر محمد رند وایلوفک ہم ساڑی ئسر۔ صوبائی محتسب دستکاری گڑاتا اہمیت‘ فائدہ و پیشن ملک اٹ خواست آتا بارو اٹ ہیت وگپ کرسا پارے کہ دا گڑاتا دکان و اسٹال تے ملک اٹ انٹرنیشنل ائیرپورٹ، ریلوے اسٹیشن وایلو اہم انگا ہند آتیا خلنگے تو دافتیان تینا زرمبادلہ نا کوڑی تے ودفنگ کینہ انتئے کہ دو اٹ جوڑ کروک گڑاتا نہاد مشین تا جوڑ کروک گڑاتیان زیات ءِ۔ او پارے کہ دابشخ تون گنڈوک کاریمی تا است بڈی ءِ کرسا اوفتے مون تروک ویل آتے ایسر کننگ کن ہم المی گام گیج کننگے تاکہ او پین استخواہی اٹ کاریم کرسا زیات گڑا جوڑ کرسا پین ہنرمند بندغ ودی کننگ کیر۔ ڈائریکٹر جنرل انڈسٹریز اینڈ کامرس سمال انڈسٹریز ونگ بلوچستان محبوب حسن دشتی صوبائی محتسب ءِ تینا ادارہ نا کارکڑد و ہینڈی کرافٹس شاپ اٹ ساڑی دستکاری گڑاتا بارو اٹ سرجم معلومداری تس۔

(خ ن)