زرگزرانی شونداری و جمہوریت نا سوگوی کن باندات آتے اواری اٹ ایسر کروئی تمک،وزیراعظم محمد شہباز شریف

اسلام آباد، وزیراعظم محمد شہباز شریف اپوزیشن ءِ اسہ وار ولدا مذاکرات نا سلہ خلسا پارینے کہ داسہ اپوزیشن آٹے کہ او اخہ زوت تعمیری گپ و تران کن تیار مریک، پاکستان نا زرگزرانی شونداری و جمہوریت ءِ سوگو کننگ کن باندات آتے تولسا ایسر کروئی تمک۔ پنچ شنبے نادے بنجائی کابینہ نا دیوان آن تران کرسا وزیراعظم پارے کہ وزارت پٹرولیم نا کوشست آتیان ڈیزل نا نہاد اٹی 32 روپئی فی لیٹر کمتی کرین، ہرا ستاکڑزک، حکومت لس بندغ ءِ ہراکان کہ مننگ کرے بچت کرسا ریلیف ایتک۔ او پارے کہ خلیج و آبنائے ہرمز اٹی ہرا حالیت ءِ اونا سوب آن نئے بیرہ پٹرولیم نا سپلائی ٹی ویل آتے بلکن کیہی ملک آتا تینا ریفائنری و گیس انا پلانٹ آک بند تموک ءُ، مچ آ ڈیہہ بھلو مشکل حالیت اسے آن گدرینگ انگ ءِ، پاکستان ہم اونا گواچی ءِ انتئے کہ ننا ملک توانائی نا بھاز بھلو ہلوک اسے۔ وزیراعظم پارے کہ حکومت جنگ بنا کننگ تون پی ایس ڈی پی آ کٹ خلسا 128 ارب روپئی فراوان کریسس تانکہ الس ءِ یکدم آسمان ءِ سر مروک آ پٹرولیم نا نہاد آتیان بچفنگ مرے، حکومت لس بندغ ءِ بچفنگ کن زوت گام گیج کرے، صوبہ غاک ہم داٹی تینا کڑد ءِ ادا کریر۔ او دا اومیت نا درشانی ءِ کرے کہ بروک آ دے تیٹی حالیت گچین مریک۔ او پارے کہ پاکستان نا کوشست آک بھرم اتیرہ، نن کوشست کننگ اُن کہ بے چیٹی ٹی کمتی برے، حکومت دونیم سال اٹی زرگزران نا گچینی کن ہرا گام گیج آتے کرینے اونا بھرم آک کرار کرار آ مون آ بننگ ءُ، امن نا حالیت آتا جوان مننگ داڑکن المی ءِ۔ وزیراعظم پارے کہ حکومت درو ریٹیلرز آتے کن ایپ اسے نا بناءِ کرینے ہراڑان اومیت ءِ کہ پوریاگربرادری ہرافتا سلابت اٹ گام گیج کننگانے است جم مریک، ایف بی آر ءِ پیدوار پارت کرینے کہ پوریاگر آتا سلابت اٹ ڈٹ بندی کننگے و اوفتے اگہ کس اس تنگ کننگ نا کوشست کرے تو او سزا کن تیار مرے، او دا بابت وزیر خزانہ و وزیر مملکت خزانہ و اوفتا ٹیم انا کارکڑد نا ستاءِ کرسا پارے کہ پوریاگرآتیکن اولیکو وار حکومت اسہ گچین اسکیم اس ایسنے۔ وزیراعظم پارے کہ آئی ٹی نا برآمد آتیٹی پدریسہ ودکی مننگ ءِ، جولائی 2026 اٹی داٹی 18 درسد ودکی مس، دا بھلو سرسہبی اسے ہراڑکن ای بنجائی وزیر انفارمیشن ٹیکنالوجی و اونا ٹیم ءِ مبارکباد ی ایتوہ۔ وزیراعظم پارے کہ گوگل نا اسہ ڈل اس پاکستان آ بسنے ہرافتتون اِرا دے مست اوڑدہی مسوسس، گوگل نا پاکستان اٹی دفتر نا بنامسنے، حکومت ہر بشخ اٹی ڈیجیٹلائزیشن کن گام گیج کننگ ءِ، گورننس نا مچ آ نظام بایدے ڈیجیٹل مرے۔ وزیراعظم پارے کہ حکومت اپوزیشن تون مسختی گپ و تران کن تیار ءِ، قومی اسمبلی ٹی ہم ای دانا سلہ خلکوسٹ و کابینہ ٹی ہم و اینو ولدا دا ہیت ءِ دوارہ کننگ خواوہ کہ نن تیار اُن و دا فورم آن اپوزیشن ءِ سلہ خلیوہ کہ او برے و تولے ہیت کے، باندات آتے گپ و تران اٹ ایسر کیر تانکہ پاکستان نا زرگزرانی شونداری و جمہوریت ءِ سوگو ی تننگ مرے ولے چاپ اِرا دو ٹی مریک داسہ اپوزیشن آٹے کہ او اخہ زوت تعمیری گپ و تران کن تیار مریک۔