اسپیکر قومی اسمبلی سوج ورندی تا وخت آ تعلقدار کمامدار آتا مفننگ آ ترند

اسلام آباد، قومی اسمبلی نا دیوان اسپیکر سردار ایاز صادق نا کماشی ٹی بنا کرے‘ تو سوج ورندی نا وخت آ وزارت بین الصوبائی رابطہ نا کنڈ آن سوج انا ورندی بفننگ و تعلقدار کمامدار آتا غیر حاضری آ اسپیکر سخت ترندی نا درشانی ءِ کرے۔ اسپیکر سردار ایاز صادق سوج کرے کہ دا سوج انا ورندی انتئے بتویسس؟ وزارت بین الصوبائی رابطہ نا ورندی انتئے بتویسس؟ او پارے کہ اگہ سنجیدگی اٹ بزنس ہلپیرے تو سوج ورندی کپنہ۔ سردار ایاز صادق پارے کہ بین الصوبائی رابطہ نا کنڈ آن ہچ ءُ افسر اس بننگ نا خواری کتو‘ اوفتا اسٹاف ہم بننگ خواتو۔ اسپیکر سیکرٹری بین الصوبائی رابطہ تون اوار ایلو تعلقدار کمامدار آتے بٹنگ انگ نا پارت کرے۔ اسپیکر قومی اسمبلی خبردار کرے کہ اگہ آخبت اٹی تعلقدار کمامدار آک دیوان اٹی بتوس تو وزیر پارلیمانی باندات و تعلقدار افسر نا برخلاف تحریک استحقاق اتنگ مریک۔ سوج ورندی ناوخت آ وزارت اوورسیز پاکستانیز نا وزیر نا غیر حاضری نا باندات ہم مون آ بس، ہراڑا اسپیکر کل تعلقدار بندغ آتا اواری ءِ پک کننگ کن قومی اسمبلی نا دیوان ءِ 15 منٹ اکن پد بٹے۔