9 مئی نا کیس آک فوجی عدالت آتیٹی چلیفنگرہ، شہبازشریف

لاہور: وزیراعظم شہبازشریف پارینے کہ 9 مئی نا کیس آک فوجی عدالت آتیٹی چلیفنگرہ، بے گناہ تتون بیداد مفک، ڈوہدارک بچنگ ہم کپسہ، عمران نیازی تیان ضد و مَر انا سوب آن ملک ءِ بھاز نسخان رسیفے، ملک، قوم و ادارہ غاک کل ننا ءُ، دافتے نسخان تروک آک ملک انا خیرخواہ افس، وزیرک ملک و قوم انا سیوت، حالیت آتا گچینی، ادارہ غاتا و الس نا نیام اٹ پتداری نا چاگڑد اس جوڑ کننگ کن کاریم کیر، بجٹ اٹ الس ءِ ریلیف تننگ کن گام گیج کننگے، کبینی نا دا دور اٹی غریب آتے بھلو ریلیف اس تننگ نا کوشست کننگ اٹی اُن۔ سرجم حوال آتا رداٹ وزیراعظم نا کماشی ٹی امن ایمنی نا بابت بڑزکو کہولی دیوان اس مس۔ ہراٹی نگران وزیراعلیٰ پنجاب محسن نقوی، بنجائی وزیرک اعظم نذیر تارڑ، مصدق ملک، خصوصی کمکار عطا تارڑ و خواجہ سیلمان رفیق اس تتون اوار ایلو ن لیگی راہشونک، و داکان بیدس سیکورٹی کمامدار آک ہم ساڑی ئسر۔ دیوان اٹی ملک انا پوسکن آ سیاسی حالیت، زرگزرانی پالیسی تون اوار اہم انگا باندات آتا جاچ ہلنگا۔ وزیر اعظم نا لیگل ٹیم تون سپریم کورٹ اٹ برجا مقدمہ غاتا بابت سرجم سلاہ کننگا۔ وزیر کانود اعظم نذیر تارڑ وزیراعظم شہباز شریف ءِ سپریم کورٹ اٹ برجا مقدمہ غاتا بابت حوال تس۔ دیوان اٹی لیک آڈیو تا بابت ٹہیفوک جوڈیشل کمیشن نا بابت ہم سجفنگا۔ دیوان اٹی وزیراعظم ءِ 9 مئی نا زموار کل کردار آتے کانود نا دنگ اٹ اتنگ کن داتم اسکان نا گام گیج، دزگیری، کانودی پیشرفت نا بابت حوال تننگا۔ دیوان اٹی آڈیو لیکس نا باندات ہم شرہ مس۔ دیوان اٹی وزیر کانود اعظم نذیر تارڑ بریفنگ تسا پارے کہ کمیشن آڈیو تا جاست پاست کن اوفتا فرانزک آڈت ءِ کرفنگ کیک۔ بڑزکو کہولی عدالت آتیا الس نا پت بنداوی آ گڑا ءِ۔ جج آتا شرف لپی مس تو ہور ہرفنگک۔ دیوان آن تران کرسا وزیراعظم پارے کہ کابینہ کمیشن آف انکوائریز ایکٹ 2017ء نا رداٹ آڈیو لیکس کمیشن جوڑ کرے، جوڈیشل کمیشن نا رپورٹ نا مونی بننگ آن پد کل گڑاک پاش مریرہ۔ عمران نیازی تیان ضد و مَر انا سوب آن ملک ءِ نسخان رسیفے۔ و ہندن ءُ کاریم کرے ہرانا درور ملپک۔ وزیراعظم پارے کہ 9 مئی نا دے پاکستان نا تاریخ اٹی تہار ءُ دے اسے نا وڑ یات تخنگک، دا دے آ پاکستان نا بیرشت بینوک آک دہشت گردی کریر۔ عمران نیازی نا پرمان آ اونا سلہہ بند جلہو گیر آک ملک دشمنی و بد قسمتی اٹ ہمو کاریم تے کریر ہرافتے ہفتاد و پنچ سال اٹی دشمن ہم کننگ کتنے، وزیر اعظم شہباز شریف پارے کہ دا ہیت ءِ یات تخوئی تمک کہ کالعدم تحریک طالبان جی ایچ کیو آ جلہو کریسس، دا ملک انا بدقسمتی ءِ ہربو کہ دا ’پاکستانی واج دشمن‘ آک ہم جی ایچ کیو آ جلہو کریر۔ ریڈیو پاکستان ءِ ہشار، ایف سی اسکول اٹ پرغ و بٹ کریر۔ لاہور اٹ قائد اعظم ہاؤس ءِ ہشار، ہرا کہ کمانڈر ہاؤس جوڑ مسنے۔ شہباز شریف پارت کرے کہ بجٹ اٹی الس ءِ ریلیف تننگ کن گام گیج کننگے۔ کبینی نا دا دور اٹ غریب الس ءِ بھلو ریلیف اس تننگ نا کوشست کننگ اٹی اُن۔

(آن لائن)