زندان نا ڈائری1973ء، (7)۔

انجمن متحدہ طلباء بلوچستان نا دا برانزی ریلی طالب علم سرکڑدہ غاتا کماشی ٹی پیش تما۔ خیر جان بلوچ، حکیم لہڑی، بسم اللہ خان کاکڑ ریلی نا اولیکو لین اٹ ئسر۔ دُوریڑھی ٹی علی احمد کرد، امان اللہ بازئی، سعید اقبال و صوفی عبدالخالق سوار ئسر۔ ہرا مائیکرو فون نا کمک اٹ نعرہ خلسا ہنارہ۔ و جلوس نا بشخندار آک دا نعرہ غاتا ورندی ءِ ترسا ہنارہ۔ طالب علم آتا دا برانزی ریلی میزان چوک نا کنڈ آ گام کرسا ئس۔ ”ون یونٹ توڑ دو، صوبوں کو بحال کرو، ایوبی آمریت مردہ باد“ نا نعرہ غاک لگسا ہنارہ۔ و ریلی نا بشخندار آک ترند ءُ توار اسے ٹی ورندی ترسا ئسر۔ سَٹ اس ہننگ آن پد اناگت نعرہ غاتیٹی بدلی بس۔ ”ایوبی چمچے مردہ باد“ نا نعرہ پدریسہ مائیکرو فون آن لگسا ہنا۔ کنا اِلہ محمد مراد کُرد ہرا نن تون ہم گام راہی روان ئس، اسہ وار آ کراکلی نا دکان نا کنڈ آ ترندی اٹ مون کرے، پدی بننگ آ اونا دوٹی دہ دوانزدہ چمچہ ئسرہ۔ او دا چمچہ غاتے مخلوق ءِ تس۔ ”ایوبی چمچے مردہ باد“ نا نعرہ خلوک آک نعرہ خلسا چمچہ غاتے بڑزا توریسر۔ ریلی ٹی پُس پُس بنا کرے۔ کس پاریکہ کہ پد اٹ نیاڑی تا جلوس ءِ۔ مخلوق پدی چک ہڑسسا پٹ و لعنت نا ہم توار خلنگ ئس۔ دا چرجوئی جوان زرس برجا سلیس۔ ای پدی چک ہڑسنگ و نعرہ خلنگ آتے پہہ متوٹ۔ چنک سن مننگ نا سوب آن بھلا تا دا مچی ٹی پد انا ندارہ غاتے خنتوٹہ۔ و ایب کیب انا بندغ آتا پُس پُس ءِ بنگٹہ کہ نیاڑی تا جلوس ءِ۔ انجمن متحدہ طلباء نا دا جلوس لیاقت بازار آن مرسا میزان چوک، گوشت مارکیٹ نا مون آ اسہ جلسہ اسے ٹی بدل مس۔

جلسہ غان خیر جان بلوچ، عبدالحکیم لہڑی نا تران آن پد علی احمد کرد ہرانا جوزہ غاک مہالو آن ترند ئسر، لار کرسا جوزہ اٹ مائیکرو فون ءِ تینا دوٹی ہلک، و تران ءِ بنا کرے۔ علی احمد کرد تون اوار دا دُو ریڑھی ٹی امان اللہ شادیزئی، صوفی عبدالخالق و سعید اقبال اسک ہم سلوک ئسر۔ دا وخت آ اسہ پین جلوس اس ہرا قندھاری بازار آن میزان چوک نا کنڈ آ گام کرسا ئس، اوفتا دوٹی فیلڈ مارشل صدر ایوب خان نا فوٹوک ئسر، دا جلوس نا بشخندار آک صدر ایوب خان نا مخ تفی ٹی نعرہ خلسا ئسرہ۔ داسہ ای پہہ مسٹ کہ دا ہمو جلوس ءِ، ہرانا بارو اٹ ”نیاڑی تا جلوس“ نا پُس پُس آک خف تیا تماسر۔ اوکان پد بنگن کہ دا کوئٹہ ٹی رہینگوک مانسہرہ و ایبٹ آباد نا رہینگوک آ بندغ آتا جلوس ئسکہ۔ ہرافتا کماشی ءِ ہمو وخت انا کنونشن مسلم لیگ نا راہشون سید الطاف احمد کننگ ئس۔ ولدا مخلوق بنگ کہ دا جلوس گوردت سنگھ روڈ آن بنا کریسس، ہرا پرنس روڈ، قندھاری بازار آ ننا جلوس آن مست بسوسس۔ اوفک ننے خنار تو سورج گنج بازار نا کنڈ آ مون کریسر۔ ہراتم ننا جلوس میزان چوک آ اسہ جلسہ اسے نا دروشم دوئی کرے تو علی احمد کرد انا جم و جوش آ تران نا وخت آ ایوب خان نا مخ تف جلوس سورج گنج بازار آن ولدا قندھاری بازار نا کنڈ آ مون کرسا ننا کنڈ آ بننگ آ خننگا۔ و اسہ سجفوک ءُ سازش اسے نا رد اٹ ہڑدڑ نا نیت اٹ دوٹی لٹ ہرفسا جلسہ نا کنڈ آ گام کریرہ۔ اوفتے خننگ تون ننا جلوس نا بندغ آک ہرا مہالو آن خار اٹ ئسرہ، جوزہ ٹی برسا مخالف اٹ نعرہ خلنگ ءِ بنا کریر، و چمچہ نشان ترسا مونی گام کریر۔ حالیت آک خراب مسر، پولیس داسکان تولوک ئس سیل کریکہ۔ علی احمد کرد ریڑھی آ سلوک ترند ءُ تران اس کرسا ئس۔ ہڑتوم آ جلوس آک مون پہ مون مسر، ننا بندغ آک میزان چوک نا مون پہ مون سبزی منڈی ٹی پترینگار، و مخالف آتیا پیماز پٹاٹہ و ٹماٹر آتا پر دسیر۔ داڑان ایوب خان نا مخ تف آک نزور مسر، و مارکیٹ نا مون پہ مون جامع مسجد قندھاری بازار ءِ تینا ناؤچہ جوڑ کریر۔ و اوکان، مسیت نا ہرا پوسکن آ دیوال جوڑ مرسا ئس، اونا خشت آتے ہرفنگ خسنگ ءِ بنا کریر۔ ولدا طالب علم آتا جلوس نا بندغ آک ہندا خشت آتے ہرفسا پدی خسسا کریر۔ جلوس آتا جھیڑہ ءِ ترند مننگ آ خنار تو پولیس افسر آک ہرا داتم اسکان تولوک سیل کریرہ، سما کریر۔ سپرنٹنڈنٹ پولیس انیس لٹکاری و آنسو گیس نا شیلنگ نا پرمان کرے۔ شیلنگ آن پد ہم علی احمد کرد دُوریڑھی ٹی سوار مائیکرو فون آن اوفتے ہکل ترسا ئس۔ میر عبدالجبار ریڑھی نا رہی آ بس، علی احمد کرد و ایلوفتے منت زاری کرسا ریڑھی آن دڑفے، دا وخت آ ڈوکاری آن میر عبدالجبار و ای، اے، سی ملک تاج محمد ہم ٹھپی مسر۔

لٹکاری و آنسو گیس انا شیلنگ نا سوب آن خل تا ڈوکاری سلیس و ہڑتوم آ کنڈ انا جلوس آک تارتار مسر۔ دا پولیس کارروائی نا انچارج انگریز پولیس سپرنٹنڈنٹ انیس ئسکہ۔

ایوب خان نا مخ تف آک تالان مسر، طالب علم آتا تار تار مروک آ مچی چندی کسر تیان مرسا اسہ وار ولدا لیاقت بازار نا کاٹم آ جوڑ اسلامی جمعیت طلباء نا دفتر نا مون آ مچ مس۔ داکان دوارہ برانزی جلوس پیش تما۔ طالب علم آتا دا برانزی جلوس بھاز خار اٹ ئسکہ۔ لیاقت بازار آن میزان چوک، قندھاری بازار آن جناح روڈ نا چارچوک آ سر مس۔ داڑے طالب علم آتا جلوس آن خیر جان بلوچ، علی احمد کرد، حکیم لہڑی و ایلو ترانکار آک تران کرسا ترند تینا است انا لار ءِ کشار۔ طالب علم آتا پرامن جلوس آ ڈوکاری کروک آتے ایوب خان نا مخ تف گوندسا دا واقعہ ءِ بھلو سازش اس پاریر۔ و سازشی تا دا گام ءِ رزاک آ شار انا امن ایمنی ءِ بھس کننگ نا سازش اس گوندار۔

طالب علم راہشونک تینا تران اٹی دا پر امن برانز آ ڈوکاری کروک آتے دزگیر کرسا سزا ترفنگ نا خواست کریر۔

طالب علم تنظیم و ایوبی آمریت نا مخ تف آتا نیام اٹ مروک دا جنگ اٹی ہڑتوم آ کنڈ آتیان کیہی بندغ آک خل و لٹ آتا لگنگ آن ٹھپی مسر۔ خاص وڑ اٹ طالب علم آتا ہمو راہشونک ہرا دُوریڑھی ٹی سوار ئسر۔ ہرافتیٹی بی ایس او نا صوفی عبدالخالق بلوچ، اسلامی جمعیت طلباء نا امان اللہ شادیزئی بھاز ٹھپی مسر۔ خیر جان بلوچ، حکیم لہڑی و سعید اقبال اس تے چنکو دَک لگاسس۔

صوفی عبدالخالق بلوچ و امان اللہ شادیزئی دا جنگ اٹی بھاز ٹھپی مسر۔ صوفی عبدالخالق نا چپیکو خن نا کیرغ آن ٹھپ و کاٹم اٹ بھلو دَک اس لگاسس، ہراڑان او تسینگاسس۔ و اونا مخ آن شیف ”ہپ بون“ نا ہڈ تل کریسس۔ صوفی عبدالخالق نا کاٹم نا ٹھپ اٹ چار ٹانکہ و چپیکو خن انا کیرغ نا ٹھپ اٹ مسہ ٹانکہ لگار۔ تل کروک آ ہڈ ءِ پلستر اس خلکر۔ امان اللہ شادیزئی نا راستیکو خن بھاز ٹھپی مسوسس۔ ہندن کہ اونا زیان مننگ نا گمان ئس۔ ہرادے آپریشن کرسا بچفیر۔ صوفی عبدالخالق و امان اللہ شادیزئی کیہی ہفتہ اسکان سول ہسپتال اٹی درمان مسر۔

ہفتئی تلار

تاک: 34

05-11 September 2020

پنہ:3