فیڈل کاسترو(3)۔

براہوئی بدل: جیلانی الفت

اینجل کاسترو، ننا ہمو سنگت نا باوہ نا پِن ئس، او اسہ غریب ءُ بندغ اس ئس، نور محمد ترہ کئی نا ناول ”سنگسار“ نا ہیرو نا وڑ اٹ فیڈل کاسترو نا باوہ ءِ ہم اسہ امیر ءُ بندغ اس تینٹ فوج اٹی ہِننگ نا جاگہ غا پیسہ ترسا تینا جاگہ غا اودے فوج اٹی راہی کرے۔

ننا بلوچستان اٹی داڑان چَپ مریک۔ ننا داڑے لازمی فوجی سروس مفک۔ لیویز نا نوکری مِلِّک او ہم بھلا بندغ آتے، او تینا دا نوکری آ اسہ غریب اسے تخرہ ہرادے کہ ”بازگیر“ پارہ، و بازگیر لیویز نا نوکری ءِ کیک۔ او تُو انا اخیر اٹ ہرا وخت آ تنخواہ مِلِّک تو اونا اسہ بشخ اس نوکری نا مالک ءِ ایتک۔ ہرادے کہ نن ”کاٹ“ پانہ۔ 

اسپین نا دا بازگیر فوجی سپاہی ءِ کیوبا غا راہی کننگا۔ فیڈل نا باوہ نا چنکی ہم بھاز بدبختی اٹ گدرینگاسُس۔ یانزدہ سال انا وئی اٹ اونا لُمّہ کسکوسُس۔ اونا باوہ ارٹمیکو برام ءِ کریسُس۔ چنا قسمت نا دوٹی……

پنداوڑی آ تخوک آ سپاہی جنگ انا ایسری آ 1898ء ٹی پدی اسپین آ راہی کننگا۔ ولے ارٹمیکو سال او بے روزگاری آن بے وس مرسا بندغ آتتون اوار خواری کشنگ و مزوری کننگ کن کیوبا غا بس۔ نئے جیب اٹی آنہ ئس، نئے کاٹم ءِ ڈکنگ نا جاگہ ئس۔ 

ولدا امریکی کمپنیک کیوبا نا ڈغار آ کمُند نا کشار ءِ بنا کریر۔ دا کمپنیک جنگل آتے گڈسا اوڑے کھیتی کریرہ۔ کاسترو نا باوہ ہنداڑے مزوری ءِ بنا کرے۔ 

منہ وخت آن گُڈ او دا کمپنی تے مزور تننگ نا ٹھیکیدار جوڑ مس۔ ایلو غریب آک ہرا لاطینی امریکہ نا ملک آتیان بسرہ، دا بے روزگار آتے دا کمپنی تے مزور تا حیثیت اٹ سپلائی کریکہ۔ دا وڑ او امیر ءُ بندغ اس مرسا ہِنا۔ او پٹہ غا ڈغار ہلنگ ءِ بنا کرے۔ پد اٹ تو او تینا جند اکن ڈغار ہلنگ نا بِنا ءِ ہم کرے و کرسا کرسا او اسہ بھلو زمیندار اس جوڑ مَس۔ اوڑتون دیری و خشکاوہ کم و وَد 25 ہزار ایکڑ آن زیات ڈغار ئس۔

ہفتئی تلار

تاک: 34

05-11 September 2020

پنہ:5