المصور جل جلالہٗ:

دا اسم مبارک نا بارو اٹ علامہ خطابیؒ فرمائفک ”المصورجل جلالہٗ“ ہمو ذات ءِ ہرا تینا مخلوق ءِ وڑ وڑ انا شکل و صورت آتیٹ ودی کرینے، تانکہ اسہ ایلو آن درست مریر۔ قرآن پاک اٹ اللہ تعالیٰ نا مصوری نا بارو اٹ دا وڑ ارے کہ اللہ پاک ہمو ذات ءِ کہ نما دروشم تے جوڑ کرے، و بھاز جوان جوڑ کرے تا۔

مطلب دادے کہ ہر ہر مخلوق ءِ جتا جتا شکل و دروشم تِس، ہرانا سوب آن ہر اسٹ اسہ ایلو آن بدل ءِ، دا قدرت تَنے تنیا ہمو اسہ ذات انا ءِ، ہرانا مصوری ٹی پین کس اس شریک اف۔ سورۃ آل عمران اٹ ارے کہ ”اللہ تعالیٰ ہمو مصور آ ذات ءِ ہرا لمہ نا پڈ اٹ امر کہ خواہے نما چہرہ غاتے جوڑ کیک، اوڑان بیدس پین کس معبود اف، او زوراک ءِ، حکمت والا ءِ“۔ دا آیت کریمہ ٹی ”المصور جل جلالہٗ“ نا قدرت کاملہ و قادر مطلق مننگ نا بیان ءِ کہ او بندغ ءِ اونا لمہ نا پڈ اٹ و تارمہ ٹی اخس دانائی ٹی جوڑ کیک کہ دنیا ٹی ارب آ بندغ آک اریر، و کیہی کھرب آتیان زیات بندغ آک برسا ہنسا کرینو، ولدا ہم اوفتا شکل و دروشم آک اسہ ایلوڑان بدل ءُ۔ 

اللہ تعالیٰ نا مخلوق اٹ بندغ کل آن زیبا ءِ، پاش وڑ اٹ ہم اندر ہم، زیبائی و جمال اٹ ہم و قد و بالاد اٹ ہم۔

تفسیر روح المعانی ٹی ارے کہ بندغ تینا خلقت نا اعتبار اٹ کل مخلوق آن افضل ءِ، ولے فرشتہ غاتیان کم درجہ تخک، ولے ہرا وخت کہ او نیک انگا عمل نا کوشست ءِ کے (یعنی خدا ءِ راضی کے) تو فرشتہ غاتیان افضل و اشرف مریک۔ اگہ حق و اطاعت ءِ اِلا گڑا او ساہدار آن ہم گندہ مریک۔

از ابن الحسن ابابکی