پاکستان ءِ سخاوت، ہشر، و راجی خذمت نا روایت آتیا گمر ءِ، اسحاق ڈار

اسلام آباد، نائب وزیراعظم و وزیر خارجہ سینیٹر محمد اسحاق ڈار پارینے کہ انسانی ہمدردی نا جہانی دے انا وخت آ پاکستان جہانی برادری تون اواری اٹ ہمو کل انسانی خذمت گار و رضاکار آتے خراجِ تحسین پیش کیک ہرا ضرورت نا وخت آ مخلوق نا کمک کن تینے وقف کیرہ۔ چارشنبے نا دے آدفتر خارجہ نا رداٹ انسانی ہمدردی نا جہانی دے انا وخت آ تینا کلہو اٹ او پارے کہ دا دے ننے ہمدردی، خذمت و آفت و ایلو ہلہلہ ئی حالیت آتیان زہمی مروک آ بندغ آتا کمک کن سلنگ نا اہمیت نا یات ترفک۔ نائب وزیراعظم پارے کہ دا عزم انا پوسکنی نا وارخواہی ہم ارے کہ نن اجتماعی وڑ اٹ نزورو زہمی تپہ غاتا کمک و انسانیت نا خذمت کن تینا کڑد ءِ ادا کرسا کین۔ او پارے کہ پاکستان تینا سخاوت، رضاکارانہ خذمت و راجی خذمت نا متکن آ روایت آ تیا گمر کیک، دا شرف ننا راج اٹی بھلو ماس اس تخک و سخت انگا وخت اٹ مدام ننا الس ءِ یکجا کننگ نا سوب مسنے۔ سینیٹر محمد اسحاق ڈار پارے کہ موسمیاتی بدلی نا سوب آن بروک آ آفت آتا بابت ننا آزموندہ وار وار آپاکستانی الس نا استقامت، یکجہتی و کمک نا جوزہ ءِ پک کرینے۔ شاریک بنجائی و صوبائی ادارہ غاتتون اواری اٹ زہمی آبادی تا کمک، و بحالی نا کوشست آتیٹی پبی کڑد ادا کرینو۔ او پارے کہ دا وخت آ ای انسانی خذمت کن کاریم کروک کل بندغ آتے خراجِ تحسین پیش کیوہ و ہمدردی، یکجہتی و انسانیت نا خذمت نا اصول آتیا پاکستان نا عزم انا درشانی ءِ کیوہ۔