پاکستان و انگلینڈ نا نیام اٹ مروک آ مسٹمیکو ٹیسٹ انا ہم پِر آن زہمی مننگ نا گمان

ساؤتھمپٹن (مانیٹرنگ ڈیسک) انگلینڈ نا برخلاف مسٹمیکو ٹیسٹ نا تیاری تے کن پاکستان کرکٹ ٹیم نا ٹریننگ سیشن اینو آن بنا مریک، ساؤتھمپٹن اٹ وقفہ وقفہ ٹی پِر برجا ءِ ہرانا سوب آن ٹریننگ سیشن زہمی مننگ نا گمان ارے۔ پاکستان کرکٹ ٹیم اسہ دے انا آرام آن پد اینو آن ولدا پِڑ انا کنڈ آ راہی مننگ اٹی ءُُ۔ ٹیم سہب انا سیشن اٹ 10 بجہ غا ٹریننگ کیک، بیٹنگ باولنگ تون اوار اوار فیلڈنگ و فزیکل ڈرزل ہم کننگک۔ ساوتھمپٹن اٹ اینو مچ آ دے پِر نا برجا سلنگ نا پیشگوئی کننگانے، ہرانا سوب آن ٹیم گراونڈ اٹ ٹریننگ کننگ کپک وخت اس کہ انڈور ٹریننگ سیشن کیک۔ پاکستان و انگلینڈ نا نیام اٹ سیریز نا مسٹمیکو ٹیسٹ میچ 21 اگست آن بنا مریک، گمان ارے کہ جمعہ نا دے آ پِر مننگ کیک۔ یات سلے کہ سیریز نا ارٹمیکو ٹیسٹ میچ پر انا سوب آن ڈرا مسوسُس وخت اس کہ سیریز اٹ انگلینڈ  1-0 ٹی مونی ءِ۔