وزیرخزانہ برطانوی ہائی کمشنر آن آئی ایم پروگرام کن کمک خواہک
اسحاق ڈار برطانوی ہائی کمشنر تون ورچوئل اوڑدہی کیک، معاہدہ نا سرسہبی نا بابت گپ و تران کیک
Get real time updates directly on you device, subscribe now.
اسلام آباد : وزیرخزانہ سینیٹر اسحاق ڈار آئی ایم ایف وام پروگرام نا بحالی کن برطانوی ہائی کمشنر آن کمک خواہس۔ برطانوی ہائی کمشنرآئی ایم ایف تون پروگرام بحالی کن ہیت وگپ کیک‘ حوالی نا رد اٹ آئی ایم ایف آن وام پروگرام نا بحالی کن وزیر خزانہ اسحاق ڈار نت دو خلنگ اٹی ءِ۔ وزیرخزانہ برطانوی ہائی کمشنر تون ورچوئل اوڑدہی کرے‘ ہراٹی اسحاق ڈار برطانوی ہائی کمشنر ءِ ساڑی زرگزرانی حالیت آتتون اوار آئی ایم ایف تون سلوک معاہدہ نا بارو اٹ معلومدار کرے‘ حوالی نا رد اٹ وزیر خزانہ برطانو ی ہائی کمشنر ءِ آئی ایم ایف تون معاہدہ کننگ اٹ کمک نا خواست کرینے ہراڑا برطانوی ہائی کمشنر وزیرخزانہ ءِ آئی ایم ایف تون معاہدہ کن کمک کننگ نا باور کرفینے‘ برطانوی سفیر آئی ایم ایف تون پروگرام بحالی کن ہیت وگپ کیک‘ آئی ایم ایف تون مذاکرات سرسہب مفننگ آن پد وزیرخزانہ چندی ملک آتا سفیر تتون اوڑدہی کرینے و اوفتے آئی ایم ایف تون مذاکرات آن معلومدار کرے‘ وزیرخزانہ ناخواست آ ہندا ملک آتا سفیرک ہم آئی ایم ایف تون ہیت کیرہ۔ داکان بیدس آئی ایم ایف نا نہمیکو جاچ انا پورو کننگ کن حکومت بااثر ملک آتتون رابطہ غاتا بناءِ کرینے۔ وزیراعظم شہباز شریف بااثر ملک آتا سفیرتتون اوڑدہی ٹی آئی ایم ایف ءِ منفنگ کن کڑد ادا کننگ نا خواست کرے۔ وزیراعظم شہباز شریف تون تدوک آدے امریکہ، برطانیہ فرانس، جاپان، جرمنی، چین و سعودی عرب تون اوار ایلو بااثر ملک و یورپی یونین نا سفیرک اوڑدہی کریر‘ حوالی نا رد اٹ اوڑدہی تا وخت آ حکومت ناکنڈآن دا باور کرفنگا کہ پاکستان آئی ایم ایف نا نہمیکو جاچ انا پورو کننگ کن بجٹ آن مست کل شڑت آتیا عملدرآمد ءِ پک کرینے‘ حوالی نا رد اٹ درملکی سفیرک پاکستانی زرگزران نابابت وزیراعظم آن سوج ہم ہرفیر و باور کرفیر کہ او تینا حکومت آتتون دا بابت ہیت کیرہ‘ حوالی نا رد اٹ اوڑدہی ٹی سفیر تے پاننگا کہ برجا سال انا بناٹی آئی ایم ایف نا کل شڑت آتے پورو کننگاسس۔ حکومت 170 ارب روپئی منی بجٹ پیش کرے‘داڑتون اوار بجلی، گیس انا نرخ و سوچ انا کچ ءِ ہم ودفنگا۔
(آن لائن)