نوا ز شریف ملک ءِ دہشتگردی و لوڈشیڈنگ آن خلاسی ترفے، بنجائی وزیر داخلہ

اسلام آباد: بنجائی وزیر داخلہ رانا ثناء اللہ خان پارے کہ 2013 آن 2018 محمد نواز شریف نا کماشی ٹی ملک ءِ دہشت گردی نا سیخا ولوڈشیڈنگ نا اذیت آن نجات ترفیسن، شونداری ڈٹ آک مسلم لیگ ن نا حکومت و سرکڑدہ غاتا خاصہ مریرہ، اگہ پاکستان مسلم لیگ ن نا محمد نواز شریف و شہباز شریف نا دورتے کشر تو ولدا ملک اٹی ہچ ءُ شونداری کاریم اس نظر بفک۔ او سے شنبے نادے آ مارگلہ ایونیو نا بنائی دود آن تران کریکہ۔ بنجائی وزیر داخلہ رانا ثناء اللہ خان پارے کہ وزیراعظم شہباز شریف اِرا بھاز بے کچ اہمیت تخوک ڈٹ آتا بناءِ کرینے، مارگلہ ایونیو پوسکن آباد مروک آ سیکٹرآتے جی ٹی روڈ تون ملفک ٹریفک نا لوڈ کم مننگ تون اوار مخلوق کن سفر آسان مریک۔ اینو وزیراعظم 20 ارب خڑچ انا شونداری کاریم تا ہم بناءِ ہم کرینے۔ اوپارے کہ سرسہب بے پتی تحریک آن پد شہباز شریف دا حکومت ءِ سنبھالا ملک ءِ ویل آتیان کشنگ کن دے و نن ءِ اسٹ کرے، تیناحکومت نا اولیکو تُو اٹی اسلام آباد ایئر پورٹ میٹرو بس سروس نا بنا ءِ کرے اوکان پد شونداری نا سفر ترند آن ترند تر مرساہنا۔ وزیرداخلہ رانا ثناء اللہ خان پارے کہ وزیراعظم شہباز شریف سیاست اٹ خذمت ءِ مون آ درے، اوڑا تنقید ہم مس ولے او کسر ءِ بدل کتو، خذمت نا سیاست ملک و قوم انا نجات نا سوب جوڑ مننگ کیک۔ اوپارے کہ 1997 ٹی الس اِرا تہائی گیشتری تس تو شونداری نا سفر ہندا رفتار اٹ برجائسک، 12 اکتوبر نا سانحہ متوکہ تو پاکستان شون ہلوک ملک آتا صف اٹی اوار مسکہ۔

(اے پی پی)