پی ایس ایل 5‘ کرونا وائرس نا سوب آن پی سی بی و فرنچائز مالک آتے کروڑ آ روپئی تا نسخان

کراچی( آن لائن )پی ایس ایل5 نا ملک اٹ اڈ ہلنگ آن پیسہ کٹنگ نا ڈٹ ءِ دِیر درے، خالی آ گراونڈ آتیٹی میچ آک او اوفتا چٹفنگ آن فرنچائز آتے بھلو کچ اسے ٹی نسخان ہرفوئی تما۔ مچ آ دنیا ٹی کرونا وائرس نا سوب آن خلیس اس تالان مسنے، گوازی تا پِڑک ویران مسنو، پی سی بی اولیکو پی ایس ایل میچ آتے خالی گراونڈ آتیٹی کرفنگ نا پڑو کرے، کراچی ٹی میچ آک مسر، ولدا پلے آف ءِ چٹفسا بیرہ سیمی فائنل آتے کرفنگ نا پڑو کرے، اسہ میچ اس کم مس، ہر مسٹ انگا ناک آوٹ مقابلہ غاتے قذافی اسٹیڈیم لاہور اٹ مروئی ئس ولے سیمی فائنل آن منہ گھنٹہ مست در ملکی گوازی گر اسے ٹی کرونا نا نشانی تا ظاہر مننگ آن پد ایونٹ ءِ ملتوی کرفنگ نا پڑو مون آ بس۔ حوال نا رداٹ کہ مکمل ایونٹ نا ملک اٹ اڈ ہلنگ آن پی سی بی و فرنچائز آک بھلو کچ اس کٹنگ نا اندازہ خلکوسر، ولے وائرس اوفتا ارمان تیا دِیر شاغا، داسہ پی ایس ایل ءِ وخت آن مست چٹفنگ آن بھلو کچ اسے ٹی مالی نسخان اس ہرفوئی تمک۔ 4میچ آتا چٹفنگ آن پد گیٹ منی نا کروڑ آ روپئیک دو آن ہنار۔ خالی آ گراو ¿نڈ آتیٹی میچ آتا کرفنگ آن ہم کٹنگ زہمی مس۔ ولدا ہم لیگ انا میچ آک انشورڈ ئسر ولے داسہ بیرہ چٹفنگ نا پڑو مسنے ہندا سوب آن کلیم کننگ مفک، کینسل مننگ نا حالیت اٹ ہروئی تمک کہ قدرتی آفت آتا سوب آن پیسہ ملک یا آخا، براڈ کاسٹر آتے ہم بھلو کچ اسے ٹی نسخان رسینگک۔