مذمت گنج اس اف، دا بھلا ڈوہ ہور اٹ ڈکنگ مفک، مریم اورنگزیب

اسلام آباد : وزیر حوالکاری مریم اورنگزیب پارینے کہ مذمت آن 9 مئی نا ڈوہ ڈکنگ مفک ونئے ڈوہدار‘ پولیس آ پٹرول بمب‘ سم و خل کاری کروک آ بیرہ مذمت کرسا تینا جان ءِ خلاس کننگ کیک۔ عمران خان نا بیان آ ردِعمل ترسا حوالکاری وزیر پارے کہ اقتدار اٹ ملک ءِ ڈنڈور کرفے و اقتدار آن پیشن ہم تینا ہر اعمال و حرکت آتیان ملک ءِ ڈنڈور کرفنگ ءِ‘ سعودی عرب نا تروک گھڑی ءِ بہا کرسا‘ سائیفر نا دروغ گڑسا ملک ءِ ڈنڈور کرے‘ اقتدار آن پیش تمسا قومی ادارہ، شہید آتا یاتگار تیا جلہو کرسا ملک ءِ ڈنڈور کرے‘ 9 مئی نا ڈوہ انا مذمت گنج اس اف‘ ڈوہ ءِ پک کر‘زمواری ءِ قبول کر۔ او پایر کہ مذمت آن نئے 9 مئی نا ڈوہ ڈکنگ مریک و نئے ڈوہدار‘ ڈوہ ءِ امنا کر کہ 9 مئی نا دہشت گردی وشہید آتا یاتگار آتا بے حرمتی نا پد اٹ نی ماسٹر مائنڈ ئسس و نی ڈٹ بندی کریس‘ منہ کہ نی ہسپتال اسکول مسیت ایمبولنس و کور کمانڈر نا اُراءِ خاخر تننگ نا ڈٹ بندی کریر‘ مذمت کپہ دہشت گردی ناہند زمان پارک اٹ ڈکوک دہشت گردآتے کانود نا دوٹی ایت۔ او پارے کہ پولیس آ پٹرول بمب‘ سم کاری و خل کاری کروک آ بیرہ مذمت کرسا جان ءِ خلاس کننگ مفک، ریاست آ جلہو کروک آتے سزا تننگ‘ دنیا ٹی اسہ جاگہ اس ہم انسانی حق آتا خلاف ورزی کتنے۔ اسکول‘ ہسپتال‘ ناجوڑ آتیا جلہو کرسا ایمبولینس، بے زبان سہدار تے زندہ ہشنگ انسانی حق آتا خلاف ورزیک ءُ۔ حوالکاری وزیر پارے کہ دا وحشی تے سزا تننگ انسانی حق آتا خلاف ورزی اف۔ فاشسٹ نا دو اٹ مسڑ‘ نشار ایڑھ تے دروغ نا مقدمہ غاتے ٹی دزگیر کننگ انسانی حق آتا خلاف ورزی ئس۔ طیبہ گل ءِ برمتہ کرسا وزیراعظم ہاؤس اٹ بندی کننگ انسانی حق آتا خلاف ورزی ئس‘ صحافی تے راست پاننگ آبندی کننگ‘ سم خلنگ‘ برمتہ کننگ‘ ترک آتے پرغنگ و باسن ءِ پرغنگ انسانی حق آتا خلاف ورزی ئس۔ ہزارہ نا مظلوم شہید آتا خاہوت آتے“ جنازہ غاتیان بلیک میل مفرہ پاننگ انسانی حق آتا خلاف ورزی ئس۔

(آن لائن)