زندگی و موت اللہ نا دوٹی ءِ، او بچفے تو کس خلنگ کپک، سینیٹر سراج الحق

ژوب : امیر جماعت اسلامی سینیٹر سراج الحق پارینے کہ موت و زندگی اللہ نا دوٹی ءِ‘ و اللہ ہرادے بچفے اودے کس اس خلنگ کپک۔جماعت اسلامی ملک انا ہر شاری کن عزت نا زند انا خواہندار ءِ‘ہر غریب نا چنا تعلیم دوئی کے‘ نن ہندن ءُ پاکستان اس خوانہ ہراٹی محمود و ایاز اسٹ مریر‘ نن کرپشن آن پاک پاکستان خوانہ‘ داڑے جرنیل آک ہم حکومت کریر و پن انا جمہوریت پسند آک ہم حکومت کریر ولے ملک ءِ امریکہ نا اسطبل جوڑ کریر‘ اینو ملک اٹ کرپشن کبینی‘ بے روزگاری بے ایمنی لس ءِ‘ ننا بدبخت حکمران آتا سوب آن ملک سیاسی زرگزرانی و آئینی تنکی تا گواچی ءِ‘ اگہ الس ہمت کے و سہی نمائندہ گچین کے تو ملک اسہ شون ہلوک و شونہال اسلامی ملک اس جوڑ مننگ کیک۔ مفاد پرست ٹولی ملک ءِ پلویڑ کرینے‘ دا امر ءُ پاکستان اسے ہراڑے نن رکھوک اف‘ ڈگری ہم ارے‘ ہنر ہم‘ معدنی وسیلہ غاتیان شُپ ان‘ داکان پد ہم نن زرگزرانی وڑ اٹ بھس ان۔ ملک آن سودی نظام ءِ چٹفوئی مریک۔ملک ءِ بیرہ جماعت اسلامی کل تنکی تیان کشنگ کیک۔

(آن لائن)