پاکستان و آئر لینڈ نا نیام اٹ سیاسی سلابت نا چارمیکو دیوان

اسلام آباد: پاکستان و جمہوریہ آئر لینڈ نا نیام اٹ ہڑتوم آ کنڈآتا سیاسی سلابت نا چارمیکو دیوان اسلام آباد اٹی اڈ ہلک ہراٹی فریق آک ہڑتوم آکنڈآتا تعلقداری تا غٹ پلوآتا جاچ ءِ ہلکر۔ دفترخارجہ نا ترجمان نا کنڈآن جمعہ نادے آ جاری بیان نا رداٹ پاکستانی ڈل انا کماشی ءِ ایڈیشنل سیکرٹری خارجہ (یورپ) محمد سلیم کرے وخت اس کہ آئرش ڈل انا کماشی ءِ ڈپٹی سیکرٹری جنرل خارجیہ امور سونجا ہیلینڈ کرے۔ پاکستان اٹ آئر لینڈ نا سفیر سونیا میک گینس ہرا انقرہ ٹی مقیم ءِ ہم آئرش ڈل انا بشخ ئسک۔ بیان نا رداٹ فریق آک گپ وتران اٹی ہڑتوم آ کنڈآتا تعلقداری تا غٹ پلوآتا جاچ ءِ ہلکر۔ ایڈیشنل سیکرٹری آئر لینڈ تون واپار، تعلیمی تبادلہ، دودوربیدگ، گوازی، سائنس و ٹیکنالوجی، ویزانظام اٹی ہم گرنچی و ایلو بشخ آتیٹی پاکستان نا تعلقداری تے پین ودفنگ نا عزم آ زور شاغا۔ ایڈیشنل سیکرٹری خارجہ اسلام آباد اٹی تینا سفارت خانہ ملنگ نا آئر لینڈ نا فیصلہ نا ستاءِ کرسا داہیت آ زور شاغا کہ دا پاکستان و آئرلینڈ نا تعلقداری ٹی اسہ اہم ءُ مزل اس جوڑ مریک۔ اسلام آباد اٹی آئرش سفارت خانہ و ڈبلن اٹی پاکستانی سفارت خانہ ہڑتوم آ کنڈآتا تعلقداری تے ودفنگ و الس تون الس نا رابطہ غاتے مون آ دننگ خاص وڑاٹ پاکستانی پوریاگر و طالب علم آتے آسراتی فراوان کننگ اٹ اہم ءُ کڑد اس ادا کیک۔ بیان نا رداٹ ہڑتوم آ فریق آک اقوام متحدہ تون اوار جہانی فورم تیا کمکاری آ ہم گپ وتران کریر۔ اواہم امور آ ہم گرنچی و کثیر الجہتی فورم تیا کمکاری ءِبرجا تخنگ آ امنا کریر۔ سلابت اٹی تین پہ تینی است خواہی نا علاقائی و جہانی امور آ ہم گپ وتران کننگا۔ ہڑتوم آ فریق آک ہڑتوم آ کنڈآتا سیاسی سلابت ءِ ہڑتوم آ کنڈآتا مذاکرات و مشغولیت ءِ باقاعدہ جوڑ کننگ آ ہم امنا کریر۔ پاکستان و جمہوریہ آئرلینڈ نا نیام اٹ سلابت نا بروک آ دور 2024 اٹی ڈبلن اٹی مریک۔

(اے پی پی)