صوبہ ٹی شونداری شاہراہ تا تفنگ تون گنڈوک ءِ، علی اکبر بلوچ
مر انگا علاقہ غاتا رابطہ ہندا شاہراہ تا سوب آن مننگ کیک‘ اگہ شاہراک جوان مسر تو صوبہ نا کیہی ویل آک ایسر مریرہ
Get real time updates directly on you device, subscribe now.
کوئٹہ: سیکرٹری مواصلات و تعمیرات علی اکبر بلوچ ناکماشی ٹی پی ایس ڈی پی 2023.24 ڈ آتے ٹی اوار روڈ سیکٹر نا بابت ڈویلپمنٹ سب کمیٹی نا جاچ دیوان اڈہلک‘ دیوان اٹ صوبہ نا چندی روڈ سیکٹر نا بابت شونداری ڈٹ آتا سرجم جاچ ءِ ہلنگا‘ دا وخت آ چیف انجینئر ڈیزائن محکمہ مواصلات و تعمیرات سجاد بلوچ و محکمہ مواصلات و تعمیرات نا بڑزکو کمامدار آتتون اوار محکمہ خزانہ محکمہ پی اینڈ ڈی و پی اینڈ ڈی سیل انا نمائندہ غاک ہم ساڑی ئسر۔ داوخت آ صوبائی سیکرٹری مواصلات و تعمیرات علی اکبر بلوچ پارے کہ صوبہ ٹی شونداری و شونہالی نا دارومدار شاہراہ تا تفنگ و انفراسٹرکچر نا گچینی آٹے‘ صوبہ نا مر انگا علاقہ غاتا رابطہ ہندا شاہراہ تا سوب آن مننگ کیک‘ اگہ شاہراک جوان مسر تو صوبہ نا کیہی ویل آک ایسر مریرہ‘ دُنکہ زمیندار تا ویل آک‘ تعلیم دوئی کننگ نا بابت کیہی ویل آک تینٹ ایسر مریرہ۔ او پارے کہ شاہراہ تا جوان مننگ آن الس و صوبہ غا مثبت زہم تمک‘ جوان و سوگو مواصلاتی نظام نا صوبہ نا زرگزرانی شونداری ٹی اہم ءُ کڑداراسے۔ مواصلاتی نظام اٹ گچینی آن صوبہ نا کل ضلع غاتے ٹی شونداری و شونہالی بریک۔ اوپارے کہ ساڑی صوبائی حکومت صوبہ ٹی شونداری ڈٹ آتے اولیت تننگ اٹی ءِ۔ سیکرٹری مواصلات و تعمیرات شونداری ڈٹ آتیا کاریم نا ترندی ءِ پین تیز کننگ نا پارت کرسا پارے کہ تعلقدار ڈٹ آتے زوت پورو کننگے تاکہ ڈٹ آتیان صوبہ نا الس ءِ فائدہ مننگ تون اوار شونداری نا عمل ہم مونی ہننگ کے۔ اوپارے کہ مچ آ صوبہ ٹی بنداوی بنچر نا گچینی کن گام گیج کننگے۔ او پارے کہ صوبہ نا شونداری کن ساڑی حکومت وزیراعلیٰ بلوچستان میر عبدالقدوس بزنجو ناکماشی ٹی کل وسیلہ غاتے کاریم اٹ اتنگ اٹی ءِ۔ سیکریٹری مواصلات و تعمیرات پارے کہ صوبہ ٹی انفراسٹرکچر نا گچینی کن ارب آروپئی تا شونداری ڈٹ آتیا تیزی اٹ کاریم برجاءِ ہرافتاپورو مننگ آن علاقہ تی شونداری وشونہالی بریک۔
(خ ن)