بلوچستان اٹ گیس انا گرج آتے پورو کروئی تمک‘ ملک سکندر

کوئٹہ : جمعیت علماء اسلام نا راہشون بلوچستان اسمبلی ٹی اپوزیشن لیڈر ملک سکندر خان ایڈووکیٹ پارینے کہ بلوچستان اٹ گیس و بجلی نا ویل آتا ایسری کن اسمبلی نا باسک آک توار چست کرینو۔ پارلیمان نا نمائندہ غاتا اسہ ڈل اس وزیراعظم و گیس بجلی نا کماش آتون اوڑدہی کرسا بلوچستان نا حالیت و صوبہ ٹی توانائی نا کاختی نا بابت اٹ معلومدار کرسا پاہک کہ اوفتا سدباب کننگے۔ بنجاہ آن داکان بنجائی وزیر تا بروک آ کمیٹی کوئٹہ بریک۔ میڈیا تون ہیت وگپ کرسا او پارینے کہ بلوچستان نا پارلیمانی ڈل اٹ چار صوبائی وزیر انجینئر زمرک خان اچکزئی ٗ حاجی نور محمد دمڑ ٗ میر نصیب اللہ مری ٗ عبدالخالق ہزارہ ٗ ملک نصیر احمد شاہوانی ٗ نصر اللہ زیرے ٗ ملک اکبر مینگل ٗ اصغر علی ترین ٗ حاجی عزیز اللہ آغا ڈل اتون اوار اوڑدہی کرے۔ وزیراعظم نا کنڈآن بنجائی وزیر دفاع خواجہ آصف بنجائی وزیر پیٹرولیم سیکرٹری واپڈا سیکرٹری پیٹرولیم و بنجائی نمائندہ غاک ساڑی ئسر۔ بلوچستان نا نمائندہ غاک اُست ہسونی نا درشانی ءِ کرسا بنجائی کمامدار آتے معلومدار کرے۔ بلوچستان اسمبلی نا باسک آک آئین نا آرٹیکل 172 شق 3 نا رداٹ قدرتی وسیلہ غاتیا اواری ملکیت نا ویل آک قدرتی گیس بلوچستان نا ایلو علاقہ غاتیٹی گرج آتا رداٹ فراوان کروئی ءِ۔ آئین نا آرٹیکل 58 نا منشاء نا رداٹ فیصلہ کروئی ءِ۔ بلوچستان حکومت ءِ پی پی ایل ٗ او جی ڈی سی ایل ٗ ایس ایس جی ایل اٹ 20 درسد ہلنگ نا مست انا ویل سی سی آئی نومبر 2014 نا قرار داد نا رداٹ ایسر کننگ بلوچستان اٹ گیس نا بابت اٹ فکس بلنگ نا بابت بلوچستان اسمبلی نا 14 فروری 2019 نا منظور مروک آ قرار داد آ عملدرآمد کروئی ءِ۔ بلوچستان نا یخ انا علاقہ غاتے گیس انا آسراتی تننگانے اوڑے اُلس نا جان تے بچفنگ کن ستمبر آن مارچ اسکان 24 گھنٹہ سد درسد گیس انا فراوانی نا خواست کرینے بلوچستان اٹ گیس انا گرج 200 ایم ایم سی ءِ۔

(آن لائن)