ورلڈبینک پاکستان نا اسہ ارب ڈالر نا وام تا منظوری ءِ تورے

0

Get real time updates directly on you device, subscribe now.

اسلام آباد: ورلڈبینک پاکستان نا اسہ ارب ڈالر نا وام تا منظوری ءِ تورینے، ورڈ بینک درآمد آتیا فلڈ لیوی خلنگ ءِ ہم شیف خلکنے، و پارینے کہ دا امنا کننگ نا وڑ اٹ اف۔ حوال آتا ر داٹ اڑزان توانائی کن 60 کروڑ ڈالر نا وامک ہم توننگانو، ورلڈ بینک نا رد اٹ سوگو زرگزران کن ورلڈ بینک نا وام تا مالیت 45 کروڑ ڈالر ئسکہ، داکان بیدس اڑزان توانائی کن 60 کروڑ ڈالر نا وام تے ہم پد بٹنگانے۔ ایلو کنڈ آ ایشیائی شونداری پروگرام (اے ڈی بی) پارینے کہ پاکستان تون اوار نیامی ایشیائی علاقائی ملک آتیٹی توانائی نا گرج آک 2030 اسکان 30 درسد وَدرہ۔ داہیت ءِ ایشیائی شونداری بینک انا کاریک آؤٹ لک رپورٹ 2030اٹی پاننگانے۔ رپورٹ اٹی پاننگانے کہ ودوک آ زرگزران و آبادی اتون، نیامی ایشیاو علاقائی ملک آتے تینا شونداری کن پین توانائی نا گرج ءِ۔ ڈیہہ ٹی موسمیاتی بدلی تا ودوک آ اثرآتا رداٹ دا ملک آتے تینا کاربن نا پیش تمنگ اٹ نمان کمتی کننگے و ساف و قابل تجدید توانائی نا ذریعہ غاتا کنڈا گدریفنگ ءِ ترند کننگے۔ رپورٹ اٹی نیامی ایشیا وقفقاز تون اوار اوار ہمسایہ ملک منگولیا، پاکستان و السی جمہوریہ چین نا زرگزران تا جاچ ءِ ہلنگانے۔ رپورٹ اٹی پاننگانے کہ ایشیائی شونداری بینک چاگڑد دوست بجلی و توانائی اسکان رسینگ ءِ ودفنگ و ڈیہہ ٹی پین ساف توانائی نا فراوانی ٹی دا ملک آتے کمک فراوان کننگ ءِ۔ رپورٹ اٹی پاننگانے کہ 2020اٹی چین آن بیدس کاریک ملک آتیٹی توانائی نا طلب 204 ملین ٹن تیل۔ 2030اسکان دا طلب 254 ملین آن 290 ملین ٹن مننگ نا گمان ءِ یعنی داٹی 30 آن ہلیس 32درسد اسکان ودکی ممکن ءِ، بجلی توانائی نا غٹ آن بھلا ذریعہ غاتیان اسٹ ءِ۔ انرجی مکس اٹی قدرتی گیس انا کھپت اٹی ہم ودکی گمانی ءِ، رپورٹ اٹی کاریک ملک آتیٹی بجلی نا فراوانی بنداوی پنجر ءِ گچین کننگ آ زور شاغسا پاننگانے کہ چین آن بیدس کاریک ملک آتیٹی بجلی نا فراوانی پنجر ءِ گچین کننگ کن 25 آن ہلیس 49 ارب ڈالر اسکان نا زرکاری نا گرج ءِ وخت اس کہ چین ءِ اوار کننگ آن زرکاری نا گرج 768 آن ہلیس 901 ارب ڈالر اسکان ودنگ نا گمان ءِ۔ ہندا وڑ رپورٹ اٹی 2030 اسکان چین آن بیدس کاریک ملک آتیٹی توانائی نا بشخ (بجلی نا پیدوار و موثریت) اٹی 136آن ہلیس 339 ارب ڈالر اسکان نا پوسکن آ زرکاری نا گرج انا پیدواری ءِ کننگانے، چین ءِ اوار کننگ نا دروشم اٹ توانائی نا بشخ اٹی 2.9 ٹریلین ڈالر آن ہلیس 3.8 ٹریلین ڈالر اسکان نا زرکاری نا گرج آ زور شاغنگانے۔

(مانیٹرنگ ڈیسک/اے پی پی)

Get real time updates directly on you device, subscribe now.

Leave A Reply

Your email address will not be published.