رسول حمزہ توف تون ”داغستان“ اٹی مجلس اس(2)

غمخوارحیات

0

Get real time updates directly on you device, subscribe now.

 

رسول حمزہ توف نا نوشتئی فنی کمال دادے کہ اوتینا ہیت آتتون اوار گچین ءُ مثال ترسا کیک و مثال آتے گواچنی واقعہ غاتا دروشم اٹی بیان کیک۔انتئے اودے خبر ءِ کہ کِسہ انسان نا فکری، راجی ردوم تون ازل آن تفوک ءِ۔ و بندغ ءِ کسہ شاغنگ کسہ بننگ حوال تننگ حوال بننگ سخت وڑک۔ ہنداڑان او تینا ہیت آتے کسہ غاتیٹ اوار شاغسا مون آ اتیک ہنداڑان او نوشت و ہیت آتے بندغ بھاز دلچسپی ٹی بنک و خوانک کہ اونا تینا قاری ءِ تین تون توننگ نا ہُنر آن واخب ءِ۔ ”کنا داغستان“ پنی آ داکتاب اٹی رسول حمزہ توف ہرسرحال آ گچین ءُ وڑاسے ٹی ہندن نوشتہ کرینے کہ خوانوک اوڑان بیزار مفک بلکہ چَس ہلیک۔

”چنا اِراسال اٹی ہیت کننگ ءِ ہیل کیک و انسان شَست سال انا وئی آ سر مننگ آن گُڈ دا سرپند مریک کہ ہیت آن باءِ تینا امر توررہ!“

داڑے رسول حمزہ لکھ انا ہیت اس کرینے کہ بندغ ءِ بھاز اُرے آ درک لگک کہ ہراہیت ءِ ہراڑے و امر کروئی ءِ۔ اصل دانشمندی ہندا عمل ءِ پارہ کہ بندغ دا پہہ مرے کہ ہیت ءِ امر تخوئیءِ۔ ایلو دا کہ ہرابندغ ءِ ہیت کننگ نا شوق ءِ اوڑکن چُپ کننگ یا اودے چُپ کرفنگ بھلو ویل اسے۔

کسہ سے کہ اسہ سادہ مزاج ءُ ربودہ ءُ بندغ اسے ناسانگ مس تو اوڑکن ہراتم مالم تے اِرغ کرے گڑا دا اُراوالاک تے پنت وفرمان کریر تے کہ ہُرس ایڑے ہیت کپیس بس چُپ تولس اگہ ہیت کریس ہم گڑا کبین ءُ ہیت کیس چسائی کپیس۔ پارے اؤ چُٹانُرے۔

خیر امبل ہنا مالم نا اُرا غا اِرغ کن توس ساہت اس چُپ کرے ولے ہراکان جارات بسکہ تے ہیت آک تہٹی تے مروڑی آن روتینک آنبار تپ لیٹ کریرہ۔ ہنداڑتون اونا مون آن کُچک اس تدے۔

یکدم سجفے تینے تینامنت آ کہ کبین ءُ ہیت اس کیو پارے”دا کُچک باٹی اخس ءِ؟“

نن تینا داپارایپار اٹی بھاز آ بھلا عمر انا بندغ تے ہم خنانُن کہ اوفتے ہیت کننگ نا فہم دُن اف کہ او مجلس نا رُخءِ ہُرپسہ بس تینا ہیت ءِ کیرہ دُن کہ اسہ بندغ اس دا خنک ہم کہ ای پُڑس اسے آ تولوک اُٹ ہموڑے ہم ہندن ءُ کسہ اس بیان کے ہرا شغلی اس مرے یا اخلاقی دائرہ غان پیشن مرے تو دُن انگا بندغ کہ ننا لس مخلوق اٹی داپاننگک کہ فلانی چَٹ چپوڑت و بے دماغ اسے۔ مجلس نا، ہیت وگپ نا فہم اف تے بس ہراکان مس گزکیک سَٹک تے۔

یا خاص ننا گور آ نرینہ و زالبول نا مجلس اٹی فرق ارے۔ یعنی نرینہ ہرا ہیت آتے نرینہ غاتا نیام اَٹ تولک بے تکلف کننگ کیک اوہیت آتے زالبول آتا رہی آ تولوک کننگ وخت آ بھاز پامداری کیک انتئے کہ ننا ربیدگی اقدار (and culture values) تے ہندن تخنگانے کہ زالبول آتا مون آ نرینہ اوڈول بے تکلف مف ہرا ننا راجی میار آن برخلاف مرے ہندن نیاڑی کن ہم داپابندی ءِ کہ اوہم دا میارنا پامداری ءِ کرسا نرینہ نا مون آ بے تکلف مف (داڑے اَرغ وزئیفہ نا نیام اٹی مجلس وہیت گپ نا ہیت ءِ کننگ افٹ) ولے بھاز آ بندغ آتے دا فہم مفک گڑا ہندن ءُ کوچرائی یا آمخی کیرہ ہراڑان اوفک ایلوفتے سُبک لگرہ دن کہ لوکل گاڈی تیٹ سفر وختا نرینہ اسے دا خبر ہم ارے کہ دا گاڈی ٹی زالبول آک ہم سوار ءُ اوہندن ءُ پُوچ ءُ ہیت کس اتون فون آ یا تولوک ہمرہ تون تینا کے ہراڑان زالبول انت کہ نرینہ غاک ہم خجالت مریرہ۔

داڑے رسول حمزہ چُنا نا مثال ءِ تسنے کہ ہیت تو چُنا ہم کیک ولے چُنانا ہیت آتے بندغ اوڈول تَک اٹی اتپک کہ چُناسے واہم وخت وخت چُنا ہم ہندن ءُ گپ اس کیک کہ بھلاتے حیران کیک۔

ولے بھاز کم بندغ دا چارہ کہ اوعقلی آ عمر ہراسٹ ءِ ہراوخت اودا چاہک کہ کنے تینا ہیت وگپ آتیٹ سوبری اتوئی ءِ گُڑا او ہیت کننگ وخت آ بھاز احتیاط کیک کہ دُن مف کنا ہیت رد ءُ کنڈ اسے آ کاہے یا کناہیت آن کس انا اُست آزاری مرے۔

ہنداوڑ ءُ ہیت اس ننا راج انا پنی آ راجی شاعر ”پروفیسر نادرقمبرانی“ ہم تینا شاعری اسے ٹی کرینے کہ:

زند انا راز ءِ اگہ کس پہہ مس

اونا با آن گُڑا ہیت بفک

(شنزہ گروک)

ہنداوڑ انا ہیت اس پنی آ شاعر ‘میرتقی میر’ ہم کرینے:

یہی جانا کہ کچھ نہ جانا ہائے

سو بھی اک عمر میں ہوا معلوم

یعنی ذہینی بلوغت نا اسٹ انگا نشانی ہندادے کہ نی ہیت امر ءُ کیسہ

دُن کہ اف کہ نا ہیت آک داسکان چل سال انا وئی اٹی ہم ہموڈول ہراتم نی اِراسال نا چُناس ئسس۔۔۔۔۔۔۔۔۔

ہندا تران ءِ مون مستی درسا ”رسول حمزہ توف“ پاہک

”نئے ای اِراسال نا چناسے اُٹ نئے شَست سال نا پیروس۔ ای تینا زندانا نیام تیائی وئی اٹی اُٹ ولے عمر انا گُڈیکو مِزل آن خڑک اُٹ۔ ہنداڑان ہمو لوز آک ہرا داسکان کنا دوی آن پیشن متنو کنا خڑک آ دا غٹ لوز آتا مون اٹی زیات قیمتی ءُ ہرافک زبان آن شینک مسنو۔“

آن ہیت کہ با آن پیشن مس ولدا اونا قابو ٹی مفک بلکہ بالی آ چُک آنبار بال کیک۔ براہوئی نا متل ءِ کہ ”ہیت سی ودو دنّان نا نیام آن پیشن مننگ تون سی و دو بندغ آ سرمریک۔ و اسہ پین متل اس ہم پارینو کہ ہیت ءِ خلاسہ کشہ۔

ہیت آن پد انا پشیمانی آن جوان ءِ کہ ہیت آن مُست ہیت انا بھرم آ سوچ لازم ءِ ہمو ہیت زیات نہادی ءِ ہراداسکان نا دوی آن سرہلتنے۔

برجاءِ

ہفتئی تلار
تاک: 35
24-18 ستمبر 2021ء
پنہ: 06

Get real time updates directly on you device, subscribe now.

Leave A Reply

Your email address will not be published.