بیلہ شار………سیل و چکر………(4)

قرطبہ اسکول اٹی انٹرویو:۔

اسکول اٹی سر مننگ تون صفائی، ماڑی نا رنگ و روغن و بھلا حویلی ٹی پھل و گڑاس بھلا درخت آتیان کنا ہم سفر خواجہ حاجی محمد امین، و خواجہ عابد حسین بھاز متاثر مسر۔ اوفک کوئٹہ غان داخس مُر علاقہ اسیٹی دن ءُ گچین ءُ اسکول ا س جوڑ کننگ آ کنے شاباشی تسر۔ 10:15 بجہ غا دا سنگت آتے اسکول نا حویلی ٹی الاٹ و تینٹ انٹرویو والا کمرہ ٹی ہناٹ۔ ہراڑے خواجہ عبدالستار رونجہ مُست آن ساڑی ئس۔ اوڑے انٹرویو کن 5، 6 اومیتدار آتیان تسلی اٹ انٹرویو کرین و اسکول نا مُست آن ساڑی وائس پرنسپل گودی مینا کماری ءِ انٹرویو ٹی سرسہب مننگ آ مبارکبادی تسن۔ و مون آ اودے اسکول نا پرنسپل نا زمواری ءِ تسن۔

محمد بن ہارون نا اَدیرہ:۔

اسکول اٹی انٹرویو آن پد ای اسکول ناحویلی ٹی بسٹ۔ہراڑے کنا ہمسفر سنگت آک انتظاری ئسُر۔داڑے اسکول نا اختیار دار آک نن کن چا انا پارٹی اس کریسر۔ چا بسکوٹ کننگ آن پد نن بیلہ ٹی تاریخی آ جاگہ غاتے سیل کننگ کن پیش تمان۔ کُل آن مُست ہرا تاریخی آ جاگہ غا ہنان او اسکول نا خڑک آ ئس او محمد بن ہارون نا ادیرہ ءِ۔

کیپٹن/جنرل محمد بن ہارون جنرل محمد قاسم نا اسہ فوجی افسر اس ئس۔ دن تو بلوچستان اٹی دین اسلام نا روشنائی حضرت عمر ؓ(ارٹمیکو خلیفہ) نا وخت اٹی سر مسوسُس۔ ولے حجاج بن یوسف نا زمانہ ٹی سندھ اٹی بخال آتا راجہ، راجہ داہر نا برخلاف اسہ مسلمان مسڑ اسے نا غاو آ محمد بن قاسم ناکماشی ٹی فوجی تا اسہ ٹولی اس راجہ داہر نا بیخ ءِ خلنگ کن مون تننگا۔ دا ٹولی مکران نا پتڑی علاقہ ٹی سمندر نا کسر اٹ جیٹی بندرگاہ غا سر مس۔ او ہنداڑے ڈغار نا کسر تیٹ تینا ایلو سفر ءِ برجا تخاسر۔

کنے محمد بن قاسم نا فوجی تا باقاعدہ وڑ اٹ قبر آتے کٹ ملیر اٹی مُست آن اسہ مش اسے آ ملانو۔ (اسہ روایت اسے نا رد اٹ محمد بن قاسم نا قبر ہم ہندا علاقہ ٹی ءِ) شار بیلہ ہم ہندا کسر اٹی بریک۔ محمد بن قاسم نا فوجی تا عارضی آ جہہ ہندا شار مننگ کیک مسنے۔ و ہندا عارضی آ جہہ ٹی کیپٹن محمد ہارون نا کزیت مروءِ۔ کیپٹن محمد ہارون او رمحمد بن قاسم نا دا مہم نا زیات سرجم معلومداری ٹی دُواٹ ہِننگ افٹ۔ دا ملاسی ءِ بروک آ وخت انا طالبعلم کن النگ اُٹ۔کہ او دا معلومداری تے نم کن مُچ کے۔ اؤ کنا اسہ کاریم اس سیلی نا رد اٹ تینا خوانوک آتیکن پاو تانکہ نم ہم کنتون اوار (خوانسا)سفر نا سنگت جوڑ مننگ کیرے۔

ہراڑے محمد بن ہارون نا اَدیرہ ءِ۔ دا شار انا بھلا جاگہ ءِ۔ دا نا خڑک آ جام صاحب نا محل (ماڑی) ءِ۔ دا جاگہ بیلہ شار آن بڑزی آٹے۔ ہراکان نم اینو ہم مچ آ شار انا ندارہ ءِ سیل کننگ کیرے۔ ہندا جاگہ نا سنگت آتا پاننگ ءِ کہ دا اَدیرہ ایشیا نا اولیکو اَدیرہ ءِ۔ تہٹی ہِننگ کن اسہ درگہ اس و دانا دارہ ایرہ اٹ مُتکن ءُ دیوال ءُ۔ ہرافتا تہٹی او پیشن تِرک کروک آ بئے و بوچ آک داجاگہ نا اَدیرہ نا شاہدی ءِ ایترہ۔

اَدیرہ نا مون و پد اٹ منہ گز انا کھڈ و بینٹ ءُ حویلی اسے۔ مون اٹی بھلا اَدیرہءِ و دانا بامب گول ءِ۔ او تینا دور انا گچین آ کاریم تیان ءِ۔ نن اَدیرہ نا تہٹی ہِننگ خواہسنہ ولے تہٹی ہنوک آ درگہ غا قلف اس خلوک ءِ۔نن کُوکڑو کرسا تہٹی ہُننگ ئسن۔ تہٹی پین ہم ادیرہ ئسرہ ہرافتیا دُو اٹ لکھائی او نشخہ جوڑ ئسر۔

محمد بن ہارون کن ہمو وخت اٹی جوڑ کروک آ گچین آ اَدیرہ دا ہیت انا شاہدی ءِ کہ دا فوجی مہم اٹی اونا خاص ءُ کڑد اس مسوسُس۔ و اونا کہنگ آ ڈکھ و افسوز مسوسُس۔ و دا سوج آتے ہم ای تاریخ نا طالبعلم کن السا تینا ایلو مزل نا پارہ غان راہی مریوہ۔ کہ محمد بن ہارون دیر اس ئس؟ دا فوجی مہم آن بیدس ایلو ہرا مہم آک ئسر؟۔ہرافتیٹی او بشخ ہلکوسُس۔ اونا عمر، ودی مننگ نا جاگہ، نسل، باوہ پیری آ علاقہ ہراڑے ئس۔؟ و او ہرا خذمت آک ئسُر ہرافتیا او دے دا شرف تننگاسس……؟ دا سوج آک تاریخ نا طالبعلم اسے کُن ءُ۔ کنا دا خیالداری داسہ ہمو بندغ آتیکن ءِ ہرافک صاحب اختیار ءُ۔ ہمو ادارہ غاتیکن ہرا قومی و مذہبی میراث آتیا کاریم کیرہ۔ کہ اوفک دا مُتکن آ، بھلا و خاص آ میراث نا حالیت ہندن ئس ہرا اینو ءِ۔ نن اسہ قوم اسے نا رد اٹ تینا ہیرو تا قدر ءِ انتئے کپنہ ……؟ انت نن ہنداخس نالائخ اُن؟۔

جام غلام قادر (ایماندار)نا ماڑی1939ء:۔

محمد بن ہارون نا اَدیرہ ءِ سیل کننگ آن پد نن شار انا مُتکن آ و بھلا بشخ انا پارہ غا گام خلکن۔شار انا دا کل آن بڑزکو بشخ ءِ۔ ہرادے نم مُتکن آ بیلہ شار پارے تو نم غلط مفرورے۔شار انا دا بشخ سیل کننگ کڑزک۔ داڑے ماڑی (محل) اس 1939 ء اٹی جوڑ کننگا نے۔ہرا داسہ نا بلوچستان نا وزیراعلیٰ خواجہ جام کمال خان عالیانی نا پیرہ (ایماندار) خواجہ جام غلام قادر نا وخت اٹی ولدا جوڑ کننگاسُس۔ اینو ہم اگہ نم دا ماڑی نا پارہ غاکارے و سیل کیرے تو دانا ستا ءِ کرورے۔دا نا بنداوی سوب آتیٹی اسہ تو دانا جوڑ کروک آتا ہنر و ارٹمیکو گڑا ماڑی نا داجاگہ نا بڑز انگا جاگہ غا جوڑ مننگ ءِ۔

دا ہمو بھلا جاگہ ءِ ہراکان اینو ہم پوسکن آ بیلہ ءِ ہر چار پارہ غان سیل کننگ کیرے۔دا ماڑی ٹی ہِننگ نا کنا دا ارٹمیکو وار ئس۔ دن تو اصول و اخلاقی وڑ اٹ دا فرض ءِ کہ ہرافتا نی اُرا غا کاس تو اوفتے مُست آن اطلاع کر و اوفتا ہموڑے مننگ آ نی ہِن۔ و اگہ اوفک اوڑے مفس و نی مُست آن ہم اوفتے اطلاع کتنس موکل ہلتنُس۔تو اوڑے ہِننگ نا خیال ءِ اُست آن کشہ۔ولے ننا ہیت پین ئس۔ داسہ نا جام صاحب انتئے کہ کوئٹہ ٹی تینا منصب نا زمواری تا سوب ہموڑکنے۔ ای خیال کریٹ کہ اوڑتون وڑ انا وڑ اسیٹ رابطہ کیو۔ و موکل ہلیو۔ ولے بیلہ نا جئی آ سنگت آک ماڑی نا رکھ و سنبھال کن سلوک آتیان موکل ہلکر تو اوفک ننے اسہ شڑت اسے آ تہٹی الار کہ نم فوٹو ہلپرورے۔نن داشڑت ءِ منان و پیشن نا درگہ غان تہٹی ہنان۔ تہٹی ہِننگ تون ہرپارہ غا رکھ و سنبھال کروک آ و نوکر آتارہینگنگ ناجاگہ غاک ئسُر۔ و ہرا سڑک اٹ نن ہِننگ اٹی ئسن اونا ہڑتوم آ پارہ غا درخت ئسر۔ و ننا مون اٹی اسہ پیہن ءُ ماڑی اس ئس۔ ہرانا خڑک آ ہِننگ تون خبر تما کہ دا ”دیوان عام“ ءِ۔ داٹی پیہنگ و پیش تمنگ نا چندی درگہ غاک ئسُر۔ نن تہٹی ہنان تو اسہ بھلو ہال اس خنان۔او کنے خبر مس کہ داٹی چنکو چنکو بیست(20) درگہ ءُ۔ ہراکہ مخلوق نا آسراتی کن جوڑ کننگاسُر۔ یا تہو و روشنائی کن۔دا ہمو جاگہ مسنے کہ وخت اس جام صاحب آک مخلوق نا فیصلہ غاتے کننگ کن توسنو۔ ہنداکان ریاست لسبیلہ نا بندوبست آک سنبھالنگارہ۔ و ہندا ہال اٹی سزا و جزا نا فیصلہ غاک مسرہ۔ ”دیوان عام“ آن پیش تمنگ تون نن اونا خڑک آ اسہ پین بھلو و زیبدار ءُ ماڑی اسیٹی ہنان۔ ماڑی نا اسُل بڑزکو بشخ اٹی نمے ”جام غلام قادر 1939 ء“ نوشتہ نظر بریک۔ و گڑاس فارسی ٹی ہم نوشتہ ءِ۔ داماڑی اینو ہم تینا زیبداری ٹی تینا مٹ تینٹ ءِ۔اینو ہم جوڑ و رنگ کروک ءِ۔ و دا ہمو ماڑی ءِ ہرادے نن سیل کننگ کن بسوسُن۔ ماڑی نا دا بشخ رہینگنگ نا جاگہ ءِ۔ داڑے جام صاحب آک تینا خاہوت تون ہمو وخت اٹی و اینو ہم رہینگرہ۔دا اخس کہ پیشن آن زیبدار ءِ ہنداخس تہہ آن ہم۔ انت کہ آسراتیک مریرہ۔ اوفک کل ساڑی ئسُر۔ دفتری معاملہ و مہمان تیکن مہمان خانہ نا آسراتیک ہم۔انتئے کہ دا اُرا نا تہہ انا بشخ ئس ہندا سوب آن تہٹی ہننگ نا نئے است خواہی کرین و نئے موکل ہلکن۔ ولے کنا است خواہک کہ جام صاحب نا داڑے ساڑی مننگ تون تہٹی کاو و تہہ آن دا دے خنو و پہہ مریو۔

تاریخی آجامع مسیت:۔

مسیت آک اللہ نا اُراک ءُ۔ مسلمان تا جہہ، راجی خڑکی نا کل آن بھلا و گچین آ ور۔ ماڑی آن پیش تمنگ تون اسہ چنکو سڑک اس دے ٹکی پارہ غا جام آف لسبیلہ(مننگ کیک جام غلام قادر (ایماندار)) نا وخت انا اسہ گچین ءُ مسیت اسے۔ دا مننگ کیک ہمو وخت انا مسیت اس مرو۔ ہراتم بلوچستان نا جتا جتا شار آتیٹی خان و جتاجتا ریاست آتا والیان آتا بست و بند اٹی ئس۔دا مسیت آک دا ہیت انا شاہدی ءِ ایترہ کہ داجاگہ نا خواجہ غاک مذہبی طب انا ئسُر۔ و مچ آ راج دین اسلام آ چلینگوک مسنے۔ و اسلام نا اسہ بھلو ہند و جاگہ اس مسنے۔دا مچ آ مسیت و دا مچ آ نواب، سردار او والیان تا شیف انا علاقہ غاتیٹی جتا جتا جھیڑہ غاتا ایسری کن شریعت ناوڑ و ڈول اٹی بلوچستان نا کماش آ مخلوق نا طب ناشاہدی ءِ ہم ایترہ۔ بیلہ شار انا دا تاریخی آ مسیت ءِ خننگ تون اُست جم مس۔جامع مسیت نا بھلا درگہ تو بند ئس ولے وضو نا جاگہ غاتا پارہ غان اسہ درگہ اس یلہ ئس۔ نن کل ہمو درگہ غان تہٹی ہنان۔ مسیت نا تہٹی مصلح غاک شاغوک ئسر۔مسیت نا دا بشخ پد آن اسہ وخت اسیٹی ولدا جوڑ کننگاسس۔ انتئے کہ دا علاقہ باسن ءِ ہندا سوب آن درزن اسے آن زیات پنکھہ غاک خلوک ئسر۔یخ و تازہ غا تہو کن ہڑتوم آ پارہ غان کھڑکیک جوڑ ءُ۔ مسیت اٹی لاؤڈ اسپیکر تو داسہ نا وخت انا ضرورت نا گڑاسے ولے داڑے اسہ ہندو جاگہ اس جوڑ ئس ہراڑا لگسا اذان کننگاکہ تو توار مچ آ شار اٹی بننگاکہ۔ مسیت نا تہٹی ہراڑے ممبر ومحراب ءِ ہموڑے ہنان۔ بڑزا ہُران تو بامب اسُل تینا اصلی آ دروشم اٹی ئس۔تہہ انا دیوال آتیا دُو اٹ تراشنگوک آ چندی وڑ انا خل تیا نشخہ جوڑ کننگاسُس۔ مسیت ءِ جوڑ کننگ نا نشخہ ءِ ہرسا بندغ حیران مریک۔ کنے ہموڑے مسیت نا حجرہ غانبار ءُ کمرہ اسیٹی کچرہ تموک نظر بسر۔ ہرا مسیت نا امام یا مہتمم نا بنداوی زمواری تیٹی بریک کہ مسیت نا صفائی نا خیال ءِ تخر۔خیر مسیت تہہ آن چُنک ضرور ئس ولے دا ٹی لگوک آ فانوس، محراب نا تہٹی نوشتہ غا کلیمہ و ایلو آیت آک بھاز زیبدار ئسر۔ مسیت نا تہہ ہندن جوڑ مسنے کہ مچے بھاز دا لاہور نا بادشاہی مسیت آنبار ءِ۔نن داڑے مچے سلیسُن۔ہراتم پیش تمان تو پیشیم نا نماز آن بھاز وخت ئس۔ ای تینا سنگت آتتون سلاہ کریٹ کہ ننے داڑے نفل ضرور خوانوئی ءِ۔ کنا دا نیک آ سلاہ و است خواہی نا کل خیال ءِ تخار و نن مسیت ناراستیکو پارہ غا مُست انا وڑ و ڈول ولے گچین ءُ وڑ اٹ جوڑ وضو خانہ آ ہنان۔

مسیت نا پنچ یا شش سیڑھی دڑنگ تون نمے وضو کن، وخت اس کہ پنچ یا شش سیڑھی دڑنگ تون بیت الخلاء مِلک۔ نن کل وضو کرین ولدا مسیت اٹی ہنان۔ شکرانہ نا نفل خوانان۔ہنداخسے ٹی پیشیم نا نماز ہم خڑک تما۔ عابد حسین نا امامت اٹی نن پیشیم نا نماز ءِ ہم ہنداڑے خوانان۔ او کان پد راستیکو پارہ غا مسیت نا بندوبست کروک آتا رہینگ نا جاگہ ءِ ہننگ آن پد نن مسیت آن پیش تمان۔داسہ انتئے کہ پیشیم مسوسُس ہندا سوب آن نن بھاز بینگن مسن۔ و خواجہ عبدالستار رونجہ ننے ارغ تننگ کن تینا اُرا غا درے۔ ہراڑے او بھاز تینے تکلیف کریسس۔ و بھازجوان ءُ ارغ اس کریسس۔ نن جوان سیر کرین کنگن۔ ارغ آن پد نن ہموڑے مچے گپ شپ خلکن۔ و اوکان موکل کرین۔ کسر اٹی رابرٹ گروز سنڈیمن نا قبر انا خڑک آ ئسن۔

(برجاءِ)

ہفتئی تلار
تاک: 35
24-18 ستمبر 2021ء
پنہ: 04