بھارت نا سرسہب آ کیپٹن مہندرا سنگھ دھونی ریٹائرمنٹ نا پڑو کرے

نئی دہلی (مانیٹرنگ ڈیسک) بھارتی کرکٹ ٹیم نا سرسہب آ کیپٹن مہندرا سنگھ دھونی کرکٹ آن ریٹائرمنٹ نا پڑو ءِ کرے وخت اس کہ مسکوہی کیپٹن نا کسر ءِ ہلسا سریش رائنا ہم کرکٹ آن ریٹائرمنٹ ہلک۔ انسٹا گرام آ اسہ ویڈیو کلہو اسے ٹی مہندرا سنگھ پاریسُس کہ منتوار منتوار، داخس مابت و کمک نا منتوار، 7بجکر 29 منٹ آن پد کنے ریٹائر تکنگے۔ بھارتی مسکوہی کیپٹن مہندرا سنگھ بھارت نا کنڈآن سرسہب آ کیپٹن نا اعزاز ءِ تینتون تخوہ، او تینا کماشی ٹی ٹیم ءِ 3 آئی سی سی چیمپئنز ٹرافی، 2007ء نا ٹی 20 ورلڈکپ و 2011ء نا ون ڈے کپ ءِ کٹفے۔ بھارتی میڈیا نا رداٹ گڈیکو وار او تینا میچ 2019ء ٹی آئی سی سی کرکٹ ورلڈکپ اٹ نیوزی لینڈ نا برخلاف گوازی کریسُس ہراٹی بھارت ءِ بے سہبی دوئی مسوسُس۔ مہندرا سنگھ دھونی دسمبر 2014ء آ ٹیسٹ کرکٹ آن ریٹائر مسوسُس او ٹی 20 و ورلڈکپ گوازی کریکہ، اونا کماشی ٹی بھارتی ٹیم 215ء و 2016ء نا ٹی ٹونٹی ورلڈکپ اٹ سیمی فائنل تیٹی سر مسوسُس۔ 350 ون ڈے میچ آتیٹی 10733 رنز جوڑ کرینے۔ دھونی ورلڈ ٹی ٹوئنی 2020 گوازی کرسا ریٹائر مننگ خواہسکہ ولے کورونا نا سوب آن ایونٹ ءِ کینسل کننگا وخت اس کہ اونا تُغ ناپورو سلیس۔ ایلو کنڈ آ مہندرا سنگھ نا کسر ءِ ہلسا بھارتی بیٹسمین سریش رائنا ہم کرکٹ آن ریٹائرمنٹ نا پڑو کرینے۔ دھونی نا پڑو آن منہ منٹ پد سریش رائنا ہم انسٹاگرام آ دھونی ءِ مخاطب کرسا پارے کہ نے تون اوار گوازی کننگ بھاز گچین ئس او داسہ ہم ای اُست انا ہب اٹ و فخر اٹی فیصلہ کرینٹ کہ ای نے تون اوار دا پُوسکن آ سفر اٹ اوار مریو۔