ترک صدر نا سعودیہ نا دورہ، کیہی بشخ آتیٹی کمکاری نا معاہدہ
سعودی ولی عہد محمد بن سلمان ترک صدر طیب اردگان کن تینٹ گاڈی چلیفے، تعلقداری تے سوگو کننگ آ ہیت و گپ
Get real time updates directly on you device, subscribe now.
ریاض: سعودی ولی عہد محمد بن سلمان دوشنبے نادے جدہ نا قصر السلام اٹ مروک اوڑدہی آن پد ترک صدر رجب طیب اردگان کن تینٹ گاڈی ءِ چلیفے و اونا رہینگ نا ہند اسکان سر کرے۔ میڈیار پورٹ آتا رد اٹ ویڈیو فوٹیج اٹ ہڑتوم آ راہشونک کار اٹ سوار مننگ آن مست محل آن پیش تمنگ آ خننگرہ‘ سعودی ولی عہد گاڈی ءِ چلیفیکہ و ترک صدر مسافر نشست آ تولوک ئس۔ ترک صدر سعودی شاہ سلمان و ولی عہد ہڑتوم آتے ترکی نا اِرا الیکٹرک کار ٹیکی تس۔ اردگان تینا خلیجی دورہ نا اسہ بشخ انا وڑ اٹ جدہ غا سر مس اوکان گڈ او قطر و متحدہ عرب امارات آ ہم کاہک‘ ہڑتوم آراہشونک باضابطہ گپ وتران ناوخت آ ہڑتوم آ ملک آتا نیام اٹ تین پہ تینی تعلقداری تا شونداری آ ہیت وگپ کریر‘ اوڑدہی ناوخت آ توانائی، دفاع و زرکاری تون اوار چندی بشخ آتے ٹی تین پہ تینی معاہدہ غاتیا دستخط ہم کننگا‘ اوڑدہی ناوخت آ توانائی، رکھ‘ صنعت، پٹ وپول و شونداری و زرکاری و میڈیا نا بشخ آتے ٹی کمک کن مفاہمت نا یادداشت آتیا دستخط کننگا۔ یات سلے کہ ترکیہ نا صدر طیب اردگان ارٹمیکو وار صدر جوڑ مننگ آن پد پین ملک اسے نا تینا اولیکو سرکاری دورہ غا سعودی عرب آسر مس۔ جہانی خبررساں ادارہ نا رد اٹ ترک صدر رجب طیب اردگان نا ڈل اٹ وزیرک‘ کاروباری شخصیت وزرکار آک ہم اوار ءُ‘ ہرانا مسخت ہڑتوم آ ملک آتا نیام اٹ واپاری ءِ شون تننگ ءِ‘دورہ نا وخت آ ترک صدر سعودی فرمانروا شاہ سلمان بن عبدالعزیز و ولی عہد شہزادہ محمد بن سلمان تون ہم اوڑدہی کیک و چندی بشخ آتے ٹی زرکاری آ گپ وتران کننگک۔ سعودی عرب آ راہی مننگ آن مست صدر طیب اردگان میڈیا تون ہیت وگپ کرسا پارے کہ سنگت ملک آتا نیام اٹ تین پہ تینی واپاری نا کمک اٹ تعلقداری تے سوگو کننگ نا خواہندار ان۔ ترک و سعودی الس نا نیام اٹ رشتہ سوگو ءِ‘ یات سلے کہ ترک صدرطیب اردگان سعودی عرب آن سدھا قطر ومتحدہ عرب امارات آ ہم کاہک و گمانی وڑ اٹ زرگزرانی و واپاری معاہدہ غاتیا دستخط کیک۔ ترک صدرنا سعودی عرب، قطر و متحدہ عرب امارات نا دورہ ٹی نیامئی دے ٹک نا حالیت آتیا خصوصی وڑ اٹ ہیت وگپ کننگک و ہموڑے واکداری نا بریبری ءِ برجا تخنگ کن لائحہ عمل آ سجفنگک۔
(آن لائن)