ڈیرہ مراد، پر و نوکاپ نا مون اٹ بروک علاقہ غاتیٹی ہلہلہ ئی کاریم نا بنا
نصیر آباد (خ ن) نصیرآباد نا جتا جتا علاقہ غاتیٹی ہُورہ و گروک اٹ پِر، کیہی علاقہ غاتے دِیر ہرفے، ڈیرہ مراد جمالی شار اٹ پِر انا دیر تے کشنگ کن ڈپٹی کمشنر نصیرآباد حافظ محمد قاسم کاکڑ نا پارت آ چیف آفیسرڈیرہ مرادجمالی حاجی آزادخان گرانی نا نگرانی ٹی میونسپل کمیٹی شار و گلی تیان پِر نا دیر تے کشنگ کن ہنگامی بنداو آ کاریم ءِ بنا کرے، چیف آفسیرمیونسپل کمیٹی آزاد خان گرانی پارینے کہ تدوک آ نن آن ڈیرہ مراد جمالی نا جتا تجا علاقہ غاتیٹی ہُورہ و گروک اٹ پِِر بنا کرے ہراکہ نن نیمہ اسکان برجا سلیس، ڈیرہ مراد جمالی شار اٹ پِر انا دیر تا سلنگ آن گلی و بازارک تلاپ نا وڑاٹ خننگارہ، سیوریج نا دیر نا قومی شاہراہ غا سلنگ نا سوب آن اُلس و واپاری تے کیہی ویل آک دوئی ئسر۔ اُلسی ویل آتا پوروی کن میونسپل کمیٹی نا کمامدار آک جوان کاریم کرسا ءُ، شار انا جتا جتا علاقہ غاتیٹی پِر نا دیر تے کشانو او کمامدار آک حالیت آتون مون تننگ کن تیار ءُ، نن اُلسی غاو تا پوروی کن ہر وڑ انا وسیلہ غاتیان کاریم ہلنگ اٹی اُن، پِر نا سوب آن ہڑدے ئی زند اٹ کیہی ویل آک دوئی ءُ، ولے نن کچ اٹ انگا وسیلہ غاتیٹی سلسا ویل آتا ایسری کن گام گیج کینہ۔ میونسپلٹی کمامدار آک شار و گلی تیٹی سلوک آ دِیر تا کشنگ کن ہنگانی بنداو آتیا گام گیج کننگ اٹی ءِ، پِر ہنداخس تیز ئس کہ سندھ بلوچستان قومی شاہراہ نا دِیر تلاپ نا وڑ اٹ خننگاکہ، میونسپلٹی کمامدار آتا نن و دے انا خواری آن پمپنگ مشین تا کمک اٹ بھلو کچ اسے ٹی دِیر تے کشانو ہراڑان پد اُلس نا پند اٹ اننگ نا برجا مس۔