ایران و سعودی عرب نا تعلقداری تا بحالی ستا کڑزک، پاکستان

اسلام آباد : پاکستان ایران و سعودی عرب نا تعلقداری تا بحالی نا ستاءِ کرینے و پارینے کہ ڈیہہ اٹ امن نا خواہندار ان‘ امن بحالی کون آ گام گیج آتا مخ تفی ءِ کینہ‘،ایٹمی پروگرام ناباندات ہچ ءُ مالیاتی ادارہ سے تون ایجنڈا غا اف‘ ایٹمی پروگرام آ مروک ہیت آتیا ہچ ءُ تبصرہ اس کننگ مفک۔ بھارت و یورپ اٹ مسلمان تا برخلاف خار تروک ڈوہ تا ودنگ آ ننا گڑتیک اریر‘ وزیراعلیٰ کرناٹک نا ریمارکس آک ڈیہہ اٹ منفی زہم شاغنگ اٹی ءُ،کشمیری سرکڑدہ غاتا غیرکانودی دزگیری و اوفتے تنک کننگ نا چرجوئی بایدے بند کننگے۔ ترجمان دفتر خارجہ ممتاز زہرہ بلوچ ہفتہ وار پریس بریفنگ ترسا پارے کہ وزیرخارجہ بلاول بھٹو زرداری نا موریطانیہ نا دورہ پورو مسنے‘ وزیر خارجہ او آئی سی وزرائے خارجہ کونسل نا کماشی ءِ موریطانیہ نا دوٹی تس‘ فلسطین و کشمیر نا باندات ءِ مون آاتنگا‘ اوغانستان ناحالیت آتیا ہم وگپ مس‘ وزیرخارجہ او آئی سی رابطہ گروپ برائے کشمیر نا دیوان اٹ ہم بشخ ہلک۔