قومی اسمبلی ٹی صحابہ کرام ؓ نا توہین آ سزاتیٹی ودکی نا بل منظور

ڈاکٹر نفیسہ شاہ تحریک پیش کننگ آن پد قومی اسمبلی ٹی لیگل پریکٹیشنرز اینڈ بار کونسلز (ترمیمی)بل 2021ء نا ہم منظوری

0

Get real time updates directly on you device, subscribe now.

اسلام آباد: قومی اسمبلی صحابہ کرام ؓ نا توہین آ سزا تیٹی ودکی نا بل انا منظوری ءِ تس۔ سے شنبے نادے آ قومی اسمبلی ٹی دا بابت مولانا عبدالاکبر چترالی فوجداری کانود (ترمیمی) بل 2020ء ءِ پیش کننگ نا موکل خواہس۔ بل انا گرج و مسخت آتے بیان کرسا اوپارے کہ صحابہ کرام ؓ نا توہین آ داوخت آ مسہ سال بندی نا سزا ءِ وخت اس کہ شاری اسینا توہین نا سزا پنچ سال مقرر کننگانے۔ دابل آن صحابہ کرام ؓ نا توہین نا سزا ٹی ودکی مننگ کیک۔ بنجائی وزیر کانود بل انا مخالفت ءِ کتو اوکان پد او ایوان اٹ بل ءِ پیش کرے۔ اوکان پد ایوان بل انا شق وار منظوری ءِ تس۔ وخت اس کہ قومی اسمبلی لیگل پریکٹیشنرز اینڈ بار کونسلز (ترمیمی) بل 2021ء نا منظوری ءِ تس۔ سے شنبے نادے آ قومی اسمبلی ٹی دا بابت ڈاکٹر نفیسہ شاہ تحریک پیش کننگ نا موکل خواہس۔ موکل ملنگ آ او بل ءِ ایوان اٹ پیش کرے۔ ایوان بل انا شق وار منظوری ءِ تس۔ داکان بیدس قومی اسمبلی ٹی پاکستان شہریت (ترمیمی)بل 2023ء ءِ پیش کننگا۔ سے شنبے نادے آ قومی اسمبلی ٹی پیپلزپارٹی نا باسک قادر خان مندوخیل تحریک پیش کرے کہ پاکستان شہریت (ترمیمی)بل 2023ء ءِ پیش کننگ نا موکل تننگے ہرانا وزیر مملکت کانود و انصاف شہادت اعوان مخالفت ءِ کتو۔ قادر خان مندوخیل بل ءِ ایوان اٹ پیش کرے ہرادے تعلقدار کمیٹی نا دوٹی تننگا۔ ہندن قومی اسمبلی ٹی تنخواہ و الاؤنس آتا بریبری سکیل بل 2023ء ءِ پیش کننگا۔ سے شنبے نادے آ قومی اسمبلی ٹی کشور زہرا تحریک پیش کرے کہ بنجائی حکومت نا وزارت و ڈویژن نا برائے راست یا بالواسطہ زیر انتظام یا سرمایہ ٹی شریدار وتواجہ و نیم وتواجہ ادارہ، آئینی ادارہ، کارپوریشن، کمپنی، اتھارٹی و ایلو تنظیم یا ادارہ غاتیٹی تنخواہ ناجتا جتا استحصالی و چندی پیکج آتے چٹفنگ کن اوفتے ٹی تنخواہ، الاؤنسز و معاوضہ نا اسہ وڑ و بریبر اسکیل و اوفتے تون تعلقدار باندات پین پین کن پرمان وضع کننگ نا بل تنخواہ و الاؤنس آتا بریبری اسکیل بل 2023ء ءِ پیش کننگ نا موکل تننگے۔ حکومت نا کنڈآن بل انا مخالفت مفننگ آ کشور زہرا بل ءِ ایوان اٹ پیش کرے ہرا دے تعلقدار کمیٹی نا دوٹی تننگا۔ ہندن قومی اسمبلی ٹی انسٹیٹیوٹ آف سپیس ٹیکنالوجی (ترمیمی) بل 2023ء ءِ پیش کننگا۔ سے شنبے نادے آ قومی اسمبلی ٹی محمد جمال الدین تحریک پیش کرے کہ انسٹیٹیوٹ آف سپیس ٹیکنالوجی (ترمیمی) بل 2023ء ءِ پیش کننگ نا موکل تننگے۔ ایوان آن موکل ملنگ آ او بل ءِ ایوان اٹ پیش کرے ہرادے تعلقدار کمیٹی نا دوٹی تننگا۔ 

(اے پی پی)

Get real time updates directly on you device, subscribe now.

Leave A Reply

Your email address will not be published.