پاکستان برطانیہ تون تعلقداری تے خاص اہمیت ایتک،مریم اورنگزیب

اسلام آباد : بنجائی وزیر حوالکاری و شینکاری مریم اورنگزیب تون برطانیہ نا قائم مقام ہائی کمشنر اینڈ ریوڈ یگلیش اوڑدہی کرے، ہڑتوم آ ملک آتا نیام اٹ سوشل و آن لائن میڈیا غا خارتس و دہشت گردی نا رویہ غاتا بابت مواد آتا چٹفنگ کن اواری اٹ کاریم کننگ آ امنا مس۔ اوڑدہی ٹی میڈیا نا چندی بشخ، ڈیجیٹل میڈیا، میڈیا ٹریننگ و فلم جوڑ کننگ اٹ کمکاری تون اوار ہڑتوم آ کنڈآتا سفارتی تعلقداری تا مون آ دننگ آ ہم گپ وتران مس۔ بنجائی وزیر حوالکاری شاہ چارلس سوئم نا تاجپوشی آ قائم مقام ہائی کمشنر و برطانیہ نا الس ءِ مبارکبادی تس۔ داوخت آ گپ وتران کرسا اوپارے کہ وزیراعظم شہباز شریف نا ساڑی آ دورہ برطانیہ و کنگ چارلس سوئم نا تاج پوشی ٹی شرکت ہڑتوم آ ملک آتا نیام اٹ شرف و تین پہ تینی پت آ تالان سنگتی نا درشانی ءِ۔ اوپارے کہ پاکستان برطانیہ تون تعلقداری تے خاص اہمیت ایتک۔ بنجائی وزیر حوالکاری ہڑتوم آ ملک آتا نیام اٹ تعلقداری تے پین سوگو کننگ نا عزم انا درشانی ءِ کرے۔ اوڑدہی ٹی فلم پالیسی و میڈیا ٹریننگ اٹ کمکاری آہم گپ وتران مس۔ بنجائی وزیر حوالکاری پارے کہ فلم و راگ ہرملک انا دودوربیدگ و مثبت دروشم ءِتالان کننگ اٹ اہم ءُ کڑد اس اد اکیک۔ اوپارے کہ پاکستان اٹ جان جوڑی، تعلیم، گورننس و انسانی وسیلہ غاتا شونداری ٹی برطانوی حکومت نا کڑد ستاکڑزک۔

(اے پی پی)