عبدالرازق ابابکی نا افسانہ غاتا مجموعہ ”بے ہندآ بندغی“ نا تنقیدی جاچ                             1

شاہین بارانزئی

0

Get real time updates directly on you device, subscribe now.

عبدالرازق ابابکی نا افسانہ غاتا مجموعہ ”بے ہند آ بندغی“ 2018ءٹی آماچ ادبی دیوان مستونگ نا پارہ غان شینک کننگانے، ہراٹی 17 افسانہ ساڑی ئُ۔ دا کتاب 108 پنہ غا تالان ءِ، ہرانا قیمت 200 روپئی تخنگانے، گونشت لکھوک اف، حفیظ الرحمن بلوچ نا کمپوز کروک ءِ، غمخوار حیات، منیر حنفی اس تا تبصرہ غاک ہم ساڑی ئُ، کتاب نا انتساب ”راج انا ارمان“ تا پن اٹ کننگانے۔

عبدالرازق ابابکی نا ترجمہ نا کتاب آک ”پند رند“ (بلوچی اکیڈمی2015ئ)، ”انیمل فارم“ (سنگت اکیڈمی کوئٹہ 2018ئ)، ”ارمان تا بھرم“ (براہوئی ادبی سوسائٹی 2019)۔ شینک مسنو۔ او ہڑدے ئی و ہفت دے ئی ”تلار“ نا شونکار ءِ۔ پین چندی جاگہ غاتا لکھنگ و خواننگ نا کاریمک برجا ئُ۔ عبدالرازق ابابکی نا بارو اٹ عبدالقیوم بیدار تینا ہفتہ ئی آ ادبی کالم ”براہوئی احوال“ جنگ اٹی لکھاسس کہ ”او اسہ جنونی ئُ بندغ اسے، دے و نن کاریم کیک۔ ہڑدے ئی و ہفتہ ئی تلار ءِ کشک۔“ ای دا سرپند مریوہ کہ عبدالرازق ابابکی جنونی ئُ بندغ اس اف، بلکن اسہ شعوری ئُ بندغ اسے۔ ہرا باقاعدہ شعوری وڑ اٹ کاریم کیک۔ اونا شعوری کاریم تا مثال اونا صحافیانہ کاریم تتون اوار اونا افسانہ و ترجمہ غاتےان ملک۔ انتئے کہ جنونی مننگ نا مطلب دادے کہ جذباتی مننگ ءِ، جذباتی لکھنگ ءِ، جذباتی وڑ اٹ کاریم کننگ ءِ۔ وخت اس کہ جذباتی ئُ ہچ ئُ کاریم اس داخس پاشت کپک۔ دا شعوری وڑ انا کاریم اسے کہ 2004ءآن داسکان صحافتی کاریمک برجا ئُ، داڑتون اوار ادبی کاریمک ہم ہمون برجا ئُ امر کہ اونا صحافت۔

کن کن عبدالرازق ابابکی نا افسانہ غاتیا لکھنگ ہم مشکل ئس۔ اونا وجہ دا ئس کہ ای ہرا وخت اِسکان اونا افسانہ غاتے خوانتویسٹ تو ہندا خیال کریٹہ کہ مننگ کیک کہ خواننگ آن پد دافتےا کنے لکھوئی تمے، ہرا وخت کہ لکھاٹ تو نن تون شینک کننگ کن ہندا اسہ پلیٹ فارم اسے ”تلار“۔ ای لکھاٹ تو اونا قینچی نا ہم کنے سما ئس۔ انتئے کہ مہالو تو ایلوفتا کتاب آتیا لکھوک آ مضمون تیا داخس قینچی چلیفیکہ کہ وخت وخت اس اُست پاریکہ داسہ لکھنگ آن بس کیو۔ داسہ تو اونا جند انا کتاب اسے آ لکھوہ تو گڑا مشن روڈ آن باقاعدہ تینا قینچی تیز کرو، سما اف کہ کنا مضمون نا انت مرو؟ ہرا وخت کہ ای اونا افسانہ غاتے خواناٹ کنا دا خُلیس تو ختم مس، ولے اسہ پین خلیس اس بنا کرے۔ ارٹمیکو خُلیس دا مس کہ امرکہ بھاز آ افسانہ نگار سنگت آتا افسانہ غاتے ٹی بھلو بھلو Blunder ئس۔ ای ہمو بلنڈر آتا پیدواری (نشاندہی) ءِ کریٹ۔ تو ہیت آک خرین ہم مسُّر۔ رازق ابابکی نا افسانہ غاتے ٹی ہمون ئُ بلنڈر اَلو، تو پاش ئُ ہیت اسے کہ کنے ہمون ئُ خرین ئُ ہیت لکھنگ نا ضرورت ہم پیش بتو۔ داسہ دا ارٹمیکو خُلیس ہرفے کہ مخلوق پارو کہ ای اونا اخبار اٹی لکھوہ ہندا خاطر آن اونا بارو اٹ ہیت آک ہم ہمے افس کہ ایلوفتے کن مریرہ۔

رازق ابابکی نا افسانہ غاک اگہ بھاز ہائی لیول نا افس تو بِسٹ نزور ہم افس۔ اونا افسانہ غاتا جوانی دادے کہ اوفتے ٹی آئیڈیا غان ہلیس اسلوب، مکالمہ نگاری، منظر کشی، اسلوب و بیان و کلہو (پیغام) اِسکان نیامیکو درجہ نا ئُ۔ عربی نا اسہ متل اسے ”خیرالامور اوسطہم“ یعنی جوان اِنگا کاریم ہمودے ہرا کہ نیام درجہ نا ءِ۔ براہوئی ادب اٹی کل آن جوان پاس تو ڈاکٹر نصیر عاقل نا افسانہ غاک ئُ۔ گل بنگلزئی، وحید زہیر نا افسانہ غاک ہم ہندن نیام درجہ نا ئُ۔ براہوئی افسانہ نا خوڑتی اٹ جاچ ءِ ہلنگے تو ڈاکٹر نصیر عاقل ہمو اسٹ اِنگا افسانہ نگار ءِ ہرانا کہ افسانہ غاک ہر حوالہ اٹ فنی و فکری سرجم ئُ، نزور اِنگا افسانہ غاک عمران فریق، غمخوار حیات نا ئُ کہ اوفتے ٹی بھلو بھلو Blunder ساڑی ءِ۔ حسن ناصر نا اُست اٹی شیفکو تپہ نا حق اٹی بھلو اُست خواہی اس ارے ولے او شیفکو تپہ نا ویل آتے بیرہ پیدوار (نشاندہی) کننگ کیک، راہشونی (نمائندگی) کننگ کپک۔ افضل مراد تون جوان ئُ آئیڈیا ارے ولے افسانوی اسلوب و تکنیک اف۔ عارف ضیاءنا افسانہ غاک بیوسی آن جوان ئُ۔ ڈاکٹر تاج رئیسانی نا افسانہ غاتا کریڈٹ دادے کہ او نا کتاب ”انجیر نا پھل“ (قلات پبلشرز کوئٹہ 1982ئ) براہوئی ٹی افسانہ غاتا اولیکو مجموعہ ءِ۔ ڈاکٹر منیر رئیسانی، حمیرا صدف اس تا افسانہ غاک قاری نا ذہن و اُست انا زی آ باریم جوڑ مریرہ، ہندا سوب آن بندغ خواننگ کپک تا۔

رازق ابابکی نا افسانہ غاتا بارو اٹ اگہ ای دا پاو کہ خوانوک اونا افسانہ ءِ اسہ وار بنا کرے ولدا تخپک تے، تو دا مبالغہ آرائی اس مرو۔ یا ایلو وڑ اٹی تخلیق کار نااُست ءِ خوش کننگ کن اسہ دروغ نا سفت اس مرو، ہرانا حقیقت تون ہچ ئُ تعلقداری اس مفرو۔ ولے ای دا ضرور پاوہ کہ کس اس افسانہ اسے بنا کرے تو اخیر اِسکان خواننگ کیک۔ ہندن ئُ کم خوانوک مرور کہ ہرافتا اُست و مزغ انا زی آ باریم مرے۔ اونا افسانہ غاک گیشتری خلقی زندگانی نا دامون اے مون اٹی پیری خلیرہ، اسلوب نا انداز بیانیہ ءِ۔

رازق ابابکی نا افساغاتےان مسٹ کنے بھاز وڑار۔ ہرافتےان اسٹ نا عنوان ”خرین آ زند“ ارٹمیکو ”دیر مروک آ بندغ“ مسٹمیکو “بیرہ اسہ ہیت اس“ ءِ۔ دا افسانہ غاتے ٹی اسلوب تو ایلو افسانہ غاتےانبار ءِ، ولے دافتے ٹی جوان ئُ فکر اس ساڑی ءِ۔ ”خرین آ زند“ اٹی ہمو بے گوا مروک آ ورناک ئُ، ہرا کہ اینو آن چندی سال مُست آن بے گوا ئُ، اوفتےان گڑاسے نا لاشک ملانو۔ افسانہ ٹی بیان کننگانے کہ جیئند و زرینہ میڈیکل کالج نا اسٹوڈنٹ ئسر۔ ہڑتوم آک بھاز محنتی و لائخ ہم ئسر۔ اوفک اسٹ ایلو ءِ دوست ہم ئسر، اوفتا تین پہ تین سانگ ہم مس۔ ولے جیئند ءِ لاپتہ کننگا، منہ وخت آن پد اونا لاش خننگا۔ اونا ڈکھ اٹی زرینہ نا حالیت دا ئس کہ وار وار آ تُسینگاکہ، او مرگی و ہسٹریا نا ناجوڑ اس جوڑ مس۔ افسانہ ٹی ہندا اِرا کڑدار نا کمک اٹ مچ آ بے گوا مروک آ ورنا تا نمائندگی ءِ کننگانے۔

”دیر مروک آ بندغ“ اٹی مولابخش ہندن ئُ کڑدار اسے کہ تینا ورنائی ءِ بے کاری ٹی تیر کرے، نئے خوانا نئے کہ ہنر اس ہیل کرے۔ دا رویہ من حیث القوم ننا کل ورنا تا ارے۔ باوہ کٹاکہ مولا بخش کُنگکہ، ہرا وخت کہ باوہ پیر مس ہچ اس کننگ کتوکہ، لمہ ہم پیر مس ہنا تو اوفتا سنبھالنگ مولا بخش نا زمواری ئس۔ داسہ فریشانیک اودے پلویڑ کریر، ولے داسہ او انت کننگ کریکہ؟ ہچ کننگ کتوکہ انتئے کہ او ہچ اس کتویسس، ہندا سوب آن ہچ کننگ کتوکہ۔ دا افسانہ ٹی قوم انا ورناتے کلہو (پیغام) تننگانے کہ اوفک وخت ءِ نہادی سرپند مرسا تینا ورنائی ٹی گڑاس کیر۔ آخا تو حالیت بھاز خراب مریک۔

”بیرہ اسہ ہیت اس“ ہم اسہ جوان ئُ افسانہ اسے۔ داٹی ادب نا کمک اٹ ہدایت نا کسر ءِ ملانے۔ دا افسانہ ٹی نشان دا تننگانے کہ اسہ غریب ئُ بندغ اسے تینا چُنا کن اسکول نا وردی ہلنگ کن کاہک۔ ولے کسری گاڈی ٹی اسہ جلال پنی ئُ ”گنڈکپ“ اس اونا جیب آن پیسہ غاتے کشک۔ گنڈکپ آتیان اسٹ شے یار ہم ارے کہ دا غریب اِنگا بندغ نا ارمانی مننگ ءِ خنک، اودے ارمان بریک او دُزی ءِ اِلک۔ ولے جلال دُزی ءِ اِلیپک۔ او ہندن دُزی کرسا کرسا اسہ گاڈی سے آن پتنک اس دُزک ولدا خنک کہ داٹی تو پین ہچ اف بیرہ اسہ کتاب اسے۔ دا کتاب اٹی دا جملہ ”اللہ تعالیٰ تینا حق ءِ مخلوق آ بشخک ولے مخلوق نا حق ءِ اسل بشخپک“ ءِ خوانک تو دُزی آن توبہ کیک۔

(برجا ءِ)

Get real time updates directly on you device, subscribe now.

Leave A Reply

Your email address will not be published.